ಮಹತ್ವದ ಆಸಿಯಾನ್‌ ಸಮ್ಮೇಳನ ಇಂದು

Team Udayavani, Jan 25, 2018, 8:54 AM IST

ಹೊಸದಿಲ್ಲಿ: ದಕ್ಷಿಣ ಏಷ್ಯಾ ವ್ಯಾಪ್ತಿಯಲ್ಲಿ ಸರ್ವ ರೀತಿಯಲ್ಲಿ ಶಕ್ತಿ ವರ್ಧಿಸುತ್ತಿರುವ ಚೀನಗೆ ಸವಾಲು ಹಾಕುವ ನಿಟ್ಟಿನಲ್ಲಿಯೇ ಗುರುವಾರ ಹೊಸದಿಲ್ಲಿಯಲ್ಲಿ ಆಸಿಯಾನ್‌ -ಭಾರತ ರಾಷ್ಟ್ರಗಳ ಸಮಾವೇಶ ನಡೆಯಲಿದೆ. ಅದಕ್ಕಾಗಿ ಹತ್ತು ರಾಷ್ಟ್ರಗಳ ಮುಖ್ಯಸ್ಥರು ಹೊಸದಿಲ್ಲಿಗೆ ಆಗಮಿಸಲಾರಂಭಿಸಿದ್ದಾರೆ. ಗಮನಾರ್ಹ ವಿಚಾರವೆಂದರೆ ಆಸಿಯಾನ್‌-ಭಾರತ ಒಕ್ಕೂಟ ಅಸ್ತಿತ್ವಕ್ಕೆ ಬಂದು 25 ವರ್ಷಗಳಾಗಿರುವ ಹಿನ್ನೆಲೆಯಲ್ಲಿ ಈ ಸಮಾವೇಶ ಮಹತ್ವ ಪಡೆದಿದೆ. ಅವರು ಶುಕ್ರವಾರ ನಡೆಯುವ ಗಣ ರಾಜ್ಯೋತ್ಸವ ಸಮಾರಂಭದ ಮುಖ್ಯ ಅತಿಥಿಗಳಾಗಿಯೂ ಭಾಗವಹಿ ಸಲಿದ್ದಾರೆ. ಆಸಿಯಾನ್‌ ದೇಶಗಳೊಂದಿಗೆ ಭಾರತದ ಸಹಭಾಗಿತ್ವಕ್ಕೆ 25 ವರ್ಷಗಳು ಪೂರೈಸಿದ ಹಿನ್ನೆಲೆಯಲ್ಲಿ ಈ ಸಮ್ಮೇಳನವನ್ನು ಹಮ್ಮಿಕೊಳ್ಳಲಾಗಿದೆ.

ವ್ಯಾಪಾರ ಮತ್ತು ವಹಿವಾಟು ಒಪ್ಪಂದಗಳು ಮತ್ತು ಚರ್ಚೆಗಳು ಈ ಸಮ್ಮೇಳನದಲ್ಲಿ ಪ್ರಮುಖವಾಗಿರಲಿದೆ. ಪ್ರತಿ ವರ್ಷ ಆಸಿಯಾನ್‌ ದೇಶಗಳೊಂದಿಗೆ ಆರ್ಥಿಕ ಹಾಗೂ ರಾಜಕೀಯ ವಿಚಾರಗಳನ್ನು ಚರ್ಚಿಸಲು ದಿಲ್ಲಿ ಡೈಲಾಗ್‌ ಎಂಬ ಕಾರ್ಯಕ್ರಮನ್ನು ನಡಸಲಾಗುತ್ತದೆ. ಈ ಮಧ್ಯೆ ಹತ್ತು ದೇಶಗಳ ಗಣ್ಯರು ಆಗಮಿಸಿದ್ದರಿಂದ ದಿಲ್ಲಿಯಲ್ಲಿ ಹಲವು ರಸ್ತೆಗಳನ್ನು ಭದ್ರತಾ ಕ್ರಮವಾಗಿ ಮುಚ್ಚಲಾಗಿದೆ. ಇದರಿಂದಾಗಿ ದಿಲ್ಲಿಯಲ್ಲಿ ಸಾರ್ವಜನಿಕ ಸಂಚಾರ ದುಸ್ತರವಾಗಿದೆ.