ರಾಜುಗಾಗಿ ಬಂದ್ರು ಆವಂತಿಕಾ

Team Udayavani, Jan 29, 2018, 11:39 AM IST

“ಚಿತ್ರದಲ್ಲಿ ನಾನು ಸಾಫ್ಟ್ವೇರ್‌ ಎಂಜಿನಿಯರ್‌ ಆಗಿ ಕಾಣಸಿಕೊಂಡಿದ್ದೇನೆ. ಆದರೆ, ನನ್ನ ಫೋರ್ಶನ್‌ ಅನ್ನು ಎಷ್ಟು ಇಟ್ಟಿದ್ದಾರೋ ಗೊತ್ತಿಲ್ಲ. ನಾನು ನಟಿಸಿ ಬಂದಿದ್ದೇನಷ್ಟೇ..’ -“ರಾಜು ಕನ್ನಡ ಮೀಡಿಯಂ’ ಚಿತ್ರದ ಬಗ್ಗೆ ಕೇಳಲು ಆವಂತಿಕಾ ಶೆಟ್ಟಿಗೆ ಫೋನ್‌ ಮಾಡಿದರೆ ಅವರಿಂದ ಈ ಉತ್ತರ ಬರುತ್ತಿತ್ತು. ಅದಕ್ಕೆ ಕಾರಣ ಚಿತ್ರತಂಡದ ಜೊತೆಗೆ ಅವರಿಗಿದ್ದ ಮುನಿಸು.

ಅದೇ ಕಾರಣದಿಂದ ಚಿತ್ರ ಬಿಡುಗಡೆ ಮುಂಚಿನ ಪ್ರಮೋಶನ್‌ನಲ್ಲಿ ಆವಂತಿಕಾ ಶೆಟ್ಟಿ ಭಾಗಿಯಾಗಿರಲಿಲ್ಲ. ಚಿತ್ರ ಈಗಾಗಲೇ ಬಿಡುಗಡೆಯಾಗಿದೆ. ಚಿತ್ರದುದ್ದಕ್ಕೂ ಆವಂತಿಕಾ ಶೆಟ್ಟಿ ಸಾಗಿ ಬಂದಿದ್ದು, ಮೆಚ್ಚುಗೆ ಕೂಡಾ ವ್ಯಕ್ತವಾಗಿದೆ. ಇತ್ತ ಕಡೆ ಸಿನಿಮಾ ಬಗ್ಗೆಯೂ ಒಳ್ಳೆಯ ಮಾತುಗಳು ಕೇಳಿಬಂದಿವೆ. ಹೀಗಿರುವಾಗಲೇ ಆವಂತಿಕಾ ಶೆಟ್ಟಿ ಮುಂಬೈನಿಂದ ಬಂದು ಚಿತ್ರದ ಪ್ರಮೋಶನ್‌ನಲ್ಲಿ ಪಾಲ್ಗೊಂಡಿದ್ದಾರೆ.

ಚಿತ್ರದ ತಮ್ಮ ಪಾತ್ರ, ಜನ ಸ್ವೀಕರಿಸಿದ ರೀತಿ ಬಗ್ಗೆ ಖುಷಿಯಾಗಿದ್ದಾರೆ. “ಸಿನಿಮಾ ಚೆನ್ನಾಗಿ ಹೋಗುತ್ತಿದೆ. ಜನ ಚಿತ್ರವನ್ನು ಇಷ್ಟಪಟ್ಟಿದ್ದು, ನನ್ನ ಪಾತ್ರದ ಬಗ್ಗೆಯೂ ಮೆಚ್ಚುಗೆ ವ್ಯಕ್ತವಾಗುತ್ತಿದೆ’ ಎಂದು ಖುಷಿಯಿಂದ ಹೇಳುತ್ತಾರೆ ಆವಂತಿಕಾ ಶೆಟ್ಟಿ. ಚಿತ್ರದಲ್ಲಿ ಆವಂತಿಕಾ ಸಾಫ್ಟ್ವೇರ್‌ ಕಂಪೆನಿಯ ಉದ್ಯೋಗಿಯಾಗಿ ನಟಿಸಿದ್ದು, ಸಿನಿಮಾದುದ್ದಕ್ಕೂ ಅವರ ಪಾತ್ರ ಸಾಗಿ ಬಂದಿದೆ.

ಈಗ ಪಾತ್ರವನ್ನು ಜನ ಇಷ್ಟಪಟ್ಟಿರೋದರಿಂದ ಆವಂತಿಕಾ ಖುಷಿಯಾಗಿದ್ದಾರೆ. ಗೆಲುವು ಬಂದಾಗ ಮುನಿಸುಗಳೆಲ್ಲವೂ ಮರೆತು ಹೋಗುತ್ತದೆ ಎಂಬಂತೆ ಆವಂತಿಕಾ ಈಗ “ರಾಜು’ ತಂಡ ಸೇರಿಕೊಂಡಿದ್ದಾರೆ. “ರಾಜು ಕನ್ನಡ ಮೀಡಿಯಂ’ನಲ್ಲಿ ಗುರುನಂದನ್‌ ನಾಯಕರಾಗಿದ್ದು, ನರೇಶ್‌ ನಿರ್ದೇಶಿಸಿದ್ದಾರೆ. ಸುರೇಶ್‌ ಈ ಸಿನಿಮಾದ ನಿರ್ಮಾಪಕರು.