ನವಿ ಮುಂಬಯಿ ಪಂದ್ಯ: 14ರ ತಾನಿಷ್ಕ್ ಗಾವಟೆ ಅಜೇಯ 1,045 ರನ್‌

Team Udayavani, Jan 31, 2018, 3:19 PM IST

ಮುಂಬಯಿ : ನವೀ ಮುಂಬಯಿಯ ಸ್ಥಳೀಯ ಕ್ರಿಕೆಟ್‌ ಪಂದ್ಯಾವಳಿಯಲ್ಲಿ 14ರ ಹರೆಯದ ಬ್ಯಾಟ್ಸ್‌ ಮನ್‌ ತಾನಿಷ್ಕ್ ಗಾವಟೆ ಅಜೇಯ 1,045 ರನ್‌ ಬಾರಿಸಿರುವುದಾಗಿ ಆತನ ಕೋಚ್‌ ಹೇಳಿದ್ದಾರೆ. 

ಕೋಪರ್‌ಖೈರ್‌ನೆ ಯಲ್ಲಿನ ಯಶ್ವಂತರಾವ್‌ ಚವಾಣ್‌ ಇಂಗ್ಲಿಷ್‌ ಮಾಧ್ಯಮ ಶಾಲೆಯ ಆಟದ ಮೈದಾನದಲ್ಲಿ ನಡೆದಿದ್ದ ಸ್ಥಳೀಯ ಕ್ರಿಕೆಟ್‌ ಪಂದ್ಯಾವಳಿಯ ಸೆಮಿಫೈನಲ್‌ ನಲ್ಲಿ ಸೋಮವಾರ ಮತ್ತು ಮಂಗಳವಾರ ಬ್ಯಾಟ್‌ ಮಾಡಿದ್ದ ಗಾವಟೆ ಅಜೇಯ 1,045 ರನ್‌ ಬಾರಿಸಿದರೆಂದು ಆತನ ಕೋಚ್‌ ಮನೀಷ್‌ ಹೇಳಿದರು.

ಕೋಚ್‌ ಮನೀಷ್‌ ಅವರು ಹೇಳುವ ಪ್ರಕಾರ ಗಾವಟೆ ಆಡಿರುವ ಕ್ರೀಡಾಂಗಣದ ಲೆಗ್‌ ಸೈಡ್‌ ಬೌಂಡರಿ 60-65 ಯಾರ್ಡ್‌ ಹಾಗೂ ಆಫ್ ಸೈಡ್‌ ಬೌಂಡರಿ 50 ಯಾರ್ಡ್‌ ನದ್ದಾಗಿತ್ತು. 

ಗಾವಟೆ ಬಾರಿಸಿರುವ ಅಜೇಯ 1,045 ರನ್‌ಗಳಲ್ಲಿ 149 ಬೌಂಡರಿ, 67 ಸಿಕ್ಸರ್‌ ಗಳಿದ್ದವು. ಗಾವಟೆ ಯಶ್ವಂತರಾವ್‌ ಚವಾಣ್‌ ತಂಡದ ಪರ ಆಡಿದ್ದರು. ಈ ತಂಡವನ್ನು ಸಂಘಟಕರೇ ರೂಪಿಸಿದ್ದರು. ಸಂಘಟಕರಾಗಿದ್ದವರು ಸ್ವತಃ ಮನೀಷ್‌ ಮತ್ತು ಯಶ್ವಂತ್‌ರಾವ್‌ ಚವಾಣ್‌ ಇಂಗ್ಲಿಷ್‌ ಮಾಧ್ಯಮ ಶಾಲೆ. 

ನವೀ ಮುಂಬಯಿ ಶೀಲ್ಡ್‌ ಅಂಡರ್‌ 14 ಪಂದ್ಯಾವಳಿಯನ್ನು ಎಂಸಿಎ ಮಾನ್ಯ ಮಾಡಿಲ್ಲ ಎಂದು ಎಂಸಿಎ ಹಿರಿಯ ಅಧಿಕಾರಿಯೋರ್ವರು ಹೇಳಿದ್ದಾರೆ.