ಪಿಸ್ತೂಲ್‌ ತೋರಿಸಿ ಕೊಲೆ ಬೆದರಿಕೆ

Team Udayavani, Feb 2, 2018, 11:18 AM IST

ಬೆಂಗಳೂರು: ಸ್ನೇಹಿತನಿಗೆ ಗನ್‌ ತೋರಿಸಿ ಪ್ರಾಣಬೆದರಿಕೆ ಹಾಕಿದ ಆರೋಪ ಸಂಬಂಧ ಬಿಹಾರ ಮೂಲದ ನಿತಿನ್‌ ಎಂಬಾತನನ್ನು ಬಂಧಿಸಿರುವ ವರ್ತೂರು ಠಾಣೆ ಪೊಲೀಸರು, ಆತನಿಂದ ಒಂದು ಕಂಟ್ರಿಮೇಡ್‌ ಪಿಸ್ತೂಲ್‌ ಹಾಗೂ ನಾಲ್ಕು ಜೀವಂತ ಗುಂಡುಗಳನ್ನು ಜಪ್ತಿ ಮಾಡಿಕೊಂಡಿದ್ದಾರೆ.

ಬಿಟೆಕ್‌ ಪದವಿಯನ್ನು ಅರ್ಧಕ್ಕೆ ಬಿಟ್ಟಿರುವ ನಿತಿನ್‌ ಕುಂದನಹಳ್ಳಿಯಲ್ಲಿ ಹಲವು ದಿನಗಳಿಂದ ರೂಂನಲ್ಲಿ ನೆಲೆಸಿದ್ದಾನೆ.  ಬುಧವಾರ ರಾತ್ರಿ ತನ್ನ ಬರ್ತಡೇ ಪಾರ್ಟಿಗೆ ಸ್ನೇಹಿತನನ್ನು ಆಹ್ವಾನಿಸಿದ್ದಾನೆ. ಪಾರ್ಟಿಬಳಿಕ  ಕ್ಷುಲ್ಕ ಕಾರಣಕ್ಕೆ ಜಗಳವಾಗಿದ್ದು, ತನ್ನ ಬಳಿಯಿದ್ದ ಕಂಟ್ರಿಮೇಡ್‌ ಪಿಸ್ತೂಲ್‌ ತೆಗೆದು ಶೂಟ್‌ ಮಾಡುತ್ತೀನಿ ಎಂದು ಹೆದರಿಸಿದ್ದಾನೆ ಎಂದು ಆತ ದೂರು ನೀಡಿದ್ದ.

ಈ ಹಿನ್ನೆಲೆಯಲ್ಲಿ ಕಾರ್ಯಾಚರಣೆ ನಡೆಸಿ ನಿತಿನ್‌ನನ್ನು ಅಕ್ರಮ ಶಸ್ತ್ರಾಸ್ತ್ರ ಹೊಂದಿದ ಕಾಯಿದೆ ಅಡಿ ಬಂಧಿಸಲಾಗಿದ್ದು, ಪಿಸ್ತೂಲ್‌ ಹಾಗೂ ಗುಂಡುಗಳನ್ನು ಜಪ್ತಿ ಮಾಡಲಾಗಿದೆ. ಕಂಟ್ರಿಮೇಡ್‌ ಪಿಸ್ತೂಲ್‌ ಹೇಗೆ ಬಂತು, ಇನ್ನಿತರೆ ಮಾಹಿತಿ ಸಂಬಂಧ ತನಿಖೆ  ಮುಂದುವರಿಸಲಾಗಿದೆ ಎಂದು ಪೊಲೀಸ್‌ ಅಧಿಕಾರಿಯೊಬ್ಬರು ತಿಳಿಸಿದರು.