ಯುವಕನ ಕೊಂದ ಮೂವರ ಬಂಧನ

Team Udayavani, Feb 7, 2018, 12:12 PM IST

ಬೆಂಗಳೂರು: ಕ್ಷುಲ್ಲಕ ವಿಚಾರಕ್ಕೆ ಯವಕನಿಗೆ ಚಾಕುವಿನಿಂದ ಇರಿದು ಕೊಂದಿದ್ದ ಮೂವರು ಆರೋಪಿಗಳನ್ನು ಜ್ಞಾನಭಾರತಿ ಠಾಣೆ ಪೊಲೀಸರು ಬಂಧಿಸಿದ್ದಾರೆ. ಚಿಕ್ಕಸ್ವಾಮಿ ಲೇಔಟ್‌ನ ಪ್ರದೀಪ್‌ (25), ಯಲಚೇನಹಳ್ಳಿ ನಿವಾಸಿ ಶಿವರಾಜು (24) ಮತ್ತು ಮಲ್ಲತಹಳ್ಳಿ ನಿವಾಸಿ ಸತೀಶ್‌(29) ಬಂಧನ.

ಶುಕ್ರವಾರ ರಾತ್ರಿ ಜ್ಞಾನಭಾರತೀ ನಿವಾಸಿ ಅರುಣ್‌ನನ್ನು ಕೊಂದು, ಈತನ ಸ್ನೇಹಿತ ಸೋಮಯ್ಯನ ಮೇಲೆ ಮಾರಣಾಂತಿಕ ಹಲ್ಲೆ ನಡೆಸಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ. ಶುಕ್ರವಾರ ರಾತ್ರಿ ಮಾರುತಿ ಬಾರ್‌ ಆ್ಯಂಡ್‌ ರೆಸ್ಟೋರೆಂಟ್‌ಗೆ ಹೋಗುವ ಮೊದಲೇ ಬೇರೆಡೆಯೇ ಸೋಮಯ್ಯ ಮತ್ತು ಅರುಣ್‌ ಕಂಠಪೂರ್ತಿ ಮದ್ಯ ಸೇವಿಸಿದ್ದರು. ಬಳಿಕ ಸೋಮಯ್ಯ ಮಾರುತಿ ಬಾರ್‌ ಬಳಿ ಬಂದು ಬಿಯರ್‌ ತರಲು ಒಳ ಹೋಗಿದ್ದಾನೆ.

ಈ ವೇಳೆ ಮದ್ಯ ಸೇವಿಸುತ್ತಿದ್ದ ಆರೋಪಿಗಳು ಸೋಮಯ್ಯನ ಕಡೆ ನೋಡಿದ್ದಾರೆ. ಮದ್ಯದ ಅಮಲಿನಲ್ಲಿದ್ದ ಸೋಮಯ್ಯ ನಮ್ಮ ಏರಿಯಾಗೆ ಬಂದು ನನಗೆ ದುರುಗುಟ್ಟಿ ನೋಡುತ್ತಿರಾ ಎಂದು ಆರೋಪಿಗಳ ಜತೆ ಜಗಳ ತೆಗೆದಿದ್ದಾನೆ. ಆಗ ಆರೋಪಿಗಳ ಪೈಕಿಯೊಬ್ಬ ಸೋಮಯ್ಯನಿಗೆ ಜಗಳ ಮಾಡದಂತೆ ಮನವಿ ಮಾಡಿದ್ದಾನೆ. ಆದರೂ ಸುಮ್ಮನಾಗದ ಸೋಮಯ್ಯ ಏರುಧ್ವನಿಯಲ್ಲಿ ಜಗಳ ತೆಗೆದಿದ್ದಾನೆ. ಇದರಿಂದ ರೊಚ್ಚಿಗೆದ್ದ ಶಿವರಾಜ್‌ ಮತ್ತು ಪ್ರದೀಪ್‌ ಸೋಮಯ್ಯ ಮೇಲೆ ಹಲ್ಲೆ ನಡೆಸಿದ್ದಾರೆ.

ಇದೇ ವೇಳೆ ಹೊರಗಡೆ ನಿಂತಿದ್ದ ಅರುಣ್‌ ಕೂಡಲೇ ಒಳಬಂದು ಆರೋಪಿಗಳ ಮೇಲೆ ಹಲ್ಲೆ ನಡೆಸಿದ್ದಾನೆ. ಈ ವೇಳೆ ಶಿವರಾಜ್‌ ತನ್ನ ಜೇಬಿನಲ್ಲಿದ್ದ ಚಾಕು ತೆಗೆದು ಅರುಣ್‌ಗೆ ಇರಿದಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ. ಬಂಧಿತ ಆರೋಪಿಗಳ ವಿರುದ್ಧ ಕೆ.ಎಸ್‌.ಲೇಔಟ್‌,ಸುಬ್ರಹ್ಮಣ್ಯಪುರ ಠಾಣೆಗಳಲ್ಲಿ ಕೊಲೆ ಯತ್ನ, ಡಕಾಯಿತಿ, ದರೋಡೆಗೆ ಸಿದ್ಧತೆ ಪ್ರಕರಣಗಳು ದಾಖಲಾಗಿವೆ ಎಂದು ಪೊಲೀಸರು ತಿಳಿಸಿದ್ದಾರೆ.