ಕೋಮು ಫ್ಯಾಕ್ಟರಿ ಬಂದ್‌ ಮಾಡಿಸುತ್ತಿದ್ದೆ: ಸಚಿವ ರಾಮಲಿಂಗಾರೆಡ್ಡಿ 

Team Udayavani, Feb 8, 2018, 6:55 AM IST

ವಿಧಾನಪರಿಷತ್‌: ಎರಡು ವರ್ಷದ ಹಿಂದೆ ಗೃಹ ಸಚಿವನಾಗಿದ್ದಿದ್ದರೆ ರಾಜ್ಯದಲ್ಲಿ ಕೋಮು ಉತ್ಪಾದನೆ ಫ್ಯಾಕ್ಟರಿ ಬಂದ್‌ ಮಾಡಿಸುತ್ತಿದ್ದೆ ಎಂದು ಗೃಹ ಸಚಿವ ರಾಮಲಿಂಗಾರೆಡ್ಡಿ ಹೇಳಿದ್ದಾರೆ.

ಹಿಂದೂಪರ ಕಾರ್ಯಕರ್ತರ ಹತ್ಯೆ ಪ್ರಕರಣಗಳ ಕುರಿತ ಚರ್ಚೆಗೆ ಸರ್ಕಾರದ ಪರವಾಗಿ ಉತ್ತರಿಸಿದ ಅವರು, ಎರಡು ವರ್ಷಗಳ ಹಿಂದೆ ಈ ಖಾತೆ ಸಿಕ್ಕಿದ್ದಿದ್ದರೆ ರಾಜ್ಯದಲ್ಲಿ ಕೋಮು ಗಲಭೆ ಸೃಷ್ಟಿಸುತ್ತಿರುವ ಸಂಘಟನೆ, ವ್ಯಕ್ತಿಗಳ ಸದ್ದು ಅಡಗಿಸುತ್ತಿದ್ದೆ
ಎಂದು ತಿಳಿಸಿದರು.

ಇದಕ್ಕೆ ಪ್ರತಿಪಕ್ಷ ನಾಯಕ ಈಶ್ವರಪ್ಪ, ಎರಡು ವರ್ಷ ಸಮಯ ಸಿಕ್ಕಿದ್ದರೆ ಎಲ್ಲವನ್ನು ಸರಿ ದಾರಿಗೆ ತರುತ್ತೇನೆ ಎಂದು
ರಾಮಲಿಂಗಾರೆಡ್ಡಿ ಹೇಳಿದ್ದಾರೆ. ಆ ಮೂಲಕ ಇವರಿಗಿಂತ ಮೊದಲು ಈ ಸರ್ಕಾರದಲ್ಲಿ ಗೃಹ ಸಚಿವರಾಗಿದ್ದವರು ನಾಲಾಯಕ್‌ ಎಂದು ಒಪ್ಪಿಕೊಂಡಂ ತಾಯಿತು ಎಂದು ಹೇಳಿದರು.

ನನಗೆ ಸರ್ಕಾರ ನೀಡಿದ್ದ ಎಸ್ಕಾರ್ಟ್‌, ಸೈಕಲ್‌ಗಿಂತ ಕಡೆಯಾಗಿ ಓಡುತ್ತಿದೆ. ಬೆದರಿಕೆ ಕರೆ ಬರುತ್ತಿದೆ. ಪ್ರತಿಪಕ್ಷದ ನಾಯಕರಿಗೆ ರಕ್ಷಣೆ ಕೊಡಲು ಆಗುತ್ತಿಲ್ಲ ಎಂದು ಆರೋಪ ಮಾಡಿದರು. ಆ ಸಂದರ್ಭದಲ್ಲಿ ಸಭಾಪತಿ ಸ್ಥಾನದಲ್ಲಿ ಕೂತಿದ್ದ ರಾಮಚಂದ್ರಗೌಡರು ಗೃಹ ಸಚಿವರು ರಕ್ಷಣೆಗೆ ಗನ್‌ ಮ್ಯಾನ್‌ ಕೂಡ ಇಟ್ಟುಕೊಂಡಿಲ್ಲ ಎಂದರು. ಆಗ ಕಾಂಗ್ರೆಸ್‌ನ ನಾರಾಯಣ ಸ್ವಾಮಿ, ಗೃಹ ಸಚಿವರು ಗನ್‌ಮ್ಯಾನ್‌, ಎಸ್ಕಾರ್ಟ್‌ ಯಾವುದೇ ಸೌಲಭ್ಯ ಪಡೆದುಕೊಂಡಿಲ್ಲ. ಅವರಿಗೆ ಯಾರ ಭಯವೂ ಇಲ್ಲ ಎಂದರು. ಈ ಸಂದರ್ಭದಲ್ಲಿ ಪ್ರತಿಪಕ್ಷದ ನಾಯಕರೂ ಅವರ ಸರಳತೆಗೆ ಮೆಚ್ಚುಗೆ ವ್ಯಕ್ತಪಡಿಸಿದರು.

ರಾಮಚಂದ್ರಗೌಡರು ಮಧ್ಯ ಪ್ರವೇಶಿಸಿ, ನೆಹರು ಅವರು ಪ್ರಧಾನಿಯಾಗಿದ್ದಾಗ ಓಪನ್‌ ಜೀಪಿನಲ್ಲಿಯೇ ತಿರುಗಾಡುತ್ತಿದ್ದರು. ಈಗ ಆಧುನಿಕತೆಯ ಹೆಸರಿನಲ್ಲಿ ಯಾವ ದಾರಿಗೆ ಸಾಗುತ್ತಿದ್ದೇವೆ ಎಂದು ಬೇಸರ ವ್ಯಕ್ತಪಡಿಸಿದರು.