ಟ್ರ್ಯಾಕ್ಟರ್‌ ಕೆರೆಗೆ ಉರುಳಿ ಚಾಲಕ ಸಾವು

Team Udayavani, Feb 10, 2018, 12:06 PM IST

ಕೆ.ಆರ್‌.ಪುರ: ಟೆಂಪೋ ಚಾಲಕನ ಅಜಾಗರೂಕತೆಯಿಂದ ಟ್ರ್ಯಾಕ್ಟರ್‌ ಕೆರೆಗೆ ಉರಳಿದ ಪರಿಣಾಮ ಚಾಲಕ ಸ್ಥಳದಲ್ಲೇ ಮೃತಪಟ್ಟು, ಮತ್ತೋರ್ವ ಗಂಭೀರವಾಗಿ ಗಾಯಗೊಂಡ ಘಟನೆ ಬಾಣಸವಾಡಿ ಸಂಚಾರ ಪೊಲೀಸ್‌ ಠಾಣೆ ವ್ಯಾಪ್ತಿಯ ಆಗರದಲ್ಲಿ ನಡೆದಿದೆ. 

ಕೊಪ್ಪಳ ಮೂಲದ ಕಳ್ಕಪ್ಪ(31) ಮೃತ ಚಾಲಕ. ರಾಂಪುರದಿಂದ ಸುಬ್ಬಯ್ಯನಪಾಳ್ಳಗೆ ಹೊರಟಿದ್ದ ವೇಳೆ ಹೊರಮಾವು ಆಗರ ಕೆರೆ ಬಳಿ ಟೆಂಪೋ ಚಾಲಕ  ಟ್ರ್ಯಾಕ್ಟರನ್ನು ಓವರಟೇಕ್‌ ಮಾಡಿದ್ದಾನೆ. ಈ ವೇಳೆ ಚಾಲಕನ ನಿಯಂತ್ರಣ ತಪ್ಪಿ ಟ್ರ್ಯಾಕ್ಟರ್‌ ಕೆರೆಗೆ ಉರುಳಿದೆ. ಪರಿಣಾಮ ಎಂಜಿನ್‌ ಕೆಳಗೆ ಸಿಲುಕಿದ ಚಾಲಕ ಸ್ಥಳದಲ್ಲೇ ಮೃತಪಟ್ಟಿದ್ದಾನೆ.

ಗಂಭೀರವಾಗಿ ಗಾಯಗೊಂಡಿರುವ ಬಂಡೆಪ್ಪ ಎಂಬಾತನನ್ನು ಖಾಸಗಿ ಅಸ್ಪತ್ರೆಗೆ ದಾಖಲಿಸಲಾಗಿದೆ. ಅಗರ ನಿವಾಸಿ ಕೃಷ್ಣಪ್ಪ ಎಂಬುವವರ ಬಳಿ ಟ್ರ್ಯಾಕ್ಟರ್‌ ಚಾಲಕನಾಗಿ ಶುಕ್ರವಾರವಷ್ಟೇ ನೇಮಕಗೊಂಡಿದ್ದ ಕಳ್ಳಪ್ಪ, ಅಪಾರ್ಟಮೆಂಟ್‌ನ ಅವಶೇಷಗಳು ಹಾಗೂ ಮಣ್ಣು ಸಾಗಿಸುವಾಗ ಅಪಘಾತ ಸಂಭವಿಸಿದೆ.

ಅಪಘಾತದ ನಂತರ ಟೆಂಪೋ ಸ್ಥಳದಲ್ಲೇ ಬಿಟ್ಟು ಚಾಲಕ ಪರಾರಿಯಾಗಿದ್ದಾನೆ. ಬಾಣಸವಾಡಿ ಸಂಚಾರ ಪೊಲೀಸರು ಸ್ಥಳ ಪರಿಶೀಲಿಸಿದ್ದು, ಟ್ರ್ಯಾಕ್ಟರ್‌ ಹಾಗೂ ಮೃತ ಚಾಲಕನ ದೇಹವನ್ನು ಹೊರತೆಗೆಸಿದ್ದಾರೆ. ಶವವನ್ನು ಮರಣೋತ್ತರ ಪರಿಕ್ಷೆಗಾಗಿ ಆರ್‌.ಟಿ.ನಗರದ ಅಂಬೇಡ್ಕರ್‌ ಆಸ್ಪತ್ರೆಗೆ ಕಳಿಸಲಾಗಿದೆ. ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು, ಟೆಂಪೋ ಚಾಲಕನ ಪತ್ತೆಗೆ ಬಲೆ ಬೀಸಿದ್ದಾರೆ.