ಮೇಜರ್‌ ವಿರುದ್ಧ ಕ್ರಮ ಬೇಡ

Team Udayavani, Feb 13, 2018, 8:15 AM IST

ನವದೆಹಲಿ: ಶೋಪಿಯಾನ್‌ನಲ್ಲಿ ಕಲ್ಲೆಸೆದ ಕಾಶ್ಮೀರಿ ಯುವಕರ ಮೇಲೆ ಗುಂಡಿನ ದಾಳಿ ನಡೆಸಿದ ಮೇಜರ್‌ ಆದಿತ್ಯ ಕುಮಾರ್‌ ಸೇರಿದಂತೆ ಯಾವುದೇ ಸೇನಾಧಿಕಾರಿಗಳ ವಿರುದ್ಧ ಕ್ರಮ ಕೈಗೊಳ್ಳದಂತೆ ಜಮ್ಮು ಕಾಶ್ಮೀರ ಪೊಲೀಸರಿಗೆ ಸುಪ್ರೀಂಕೋರ್ಟ್‌ ನಿರ್ದೇಶಿಸಿದೆ. ಅಲ್ಲದೆ ಈ ಬಗ್ಗೆ ಪ್ರತಿಕ್ರಿಯಿಸುವಂತೆ ರಾಜ್ಯ ಸರ್ಕಾರಕ್ಕೆ ಸೂಚಿಸಿದೆ. ಜತೆಗೆ, ಪ್ರಕರಣಕ್ಕೆ ಸಂಬಂಧಿಸಿ ಮೇಜರ್‌ ಆದಿತ್ಯ ಅವರ ತಂದೆ ಲೆಫ್ಟಿನೆಂಟ್‌ ಕರ್ನಲ್‌ ಕರಮ್‌ವೀರ್‌ ಸಿಂಗ್‌ ಸಲ್ಲಿಸಿರುವ ಅರ್ಜಿಯ ಪ್ರತಿಯನ್ನು ಅಟಾರ್ನಿ ಜನರಲ್‌ಗೆ ನೀಡುವಂತೆಯೂ ಹೇಳಿದೆ. ಈ ಪ್ರಕರಣದಲ್ಲಿ ಸೇನೆಯ ಒಂದು ತುಕಡಿಯೇ ಭಾಗವಹಿಸಿದ್ದು, ರಕ್ಷಣಾತ್ಮಕವಾಗಿ ಗುಂಡಿನ ದಾಳಿ ನಡೆಸಲಾಗಿತ್ತು. ಆದರೆ ದುರುದ್ದೇಶದಿಂದ ಕೇವಲ ಮೇ. ಆದಿತ್ಯ ವಿರುದ್ಧ ಎಫ್ಐಆರ್‌ ದಾಖಲಿಸಲಾಗಿದೆ ಎಂದು  ಸಿಂಗ್‌ ಆರೋಪಿಸಿದ್ದರು.