ಬಾಲ್ಯದ ದಿನಗಳ ನೆನೆದು ಸಂಭ್ರಮಿಸಿದ ಗೆಳೆಯರು

Team Udayavani, Feb 13, 2018, 12:02 PM IST

ಯಲಹಂಕ: ಬಾಲ್ಯದ ಗೆಳೆಯ, ಗೆಳತಿಯರು, ತಿದ್ದಿ ಬುದ್ಧಿ ಹೇಳಿದ ಶಿಕ್ಷಕರೆಲ್ಲ ಒಂದೆಡೆ ಸೇರಿದರೆ ಹಳೆಯ ನೆನಪುಗಳು ಸಂಭ್ರಮಿಸುತ್ತವೆ. ಇಂಥದ್ದೇ ಒಂದು ಅಪರೂಪದ ಕ್ಷಣಕ್ಕೆ ಕಾಕೋಳು ಸರ್ಕಾರಿ ಪ್ರೌಢ ಶಾಲೆ ಸಾಕ್ಷಿಯಾಯಿತು.

ಕಾಕೋಳು ಸರ್ಕಾರಿ ಶಾಲೆಯಲ್ಲಿ ಕಲಿತು ಭವಿಷ್ಯ ಕಟ್ಟಿಕೊಂಡ ಹಳೇ ವಿದ್ಯಾರ್ಥಿಗಳು, 25 ವರ್ಷಗಳ ಬಳಿಕ ತಮ್ಮ ಶಿಕ್ಷಕರ ಇಂದಿನ ವಿಳಾಸ ಪತ್ತೆ ಮಾಡಿ, ಅವರನ್ನೆಲ್ಲ ಕಾರ್ಯಕ್ರಮಕ್ಕೆ ಕರೆದು, ಗೌರವಿಸುವ ಜತೆಗೆ, ದಿನವಿಡೀ ಅವರೊಂದಿಗೆ ಬೆರೆತು ನೆನಪುಗಳ ಮೆಲುಕುಹಾಕಿದರು.

ಹಾಗೇ ಎರಡು ದಶಕಗಳ ನಂತರ ಪರಸ್ಪರ ಭೇಟಿಯಾದ ಗೆಳೆಯ, ಗೆಳತಿಯರೂ ಭಯ ಕುಶಲೋಪರಿ ವಿಚಾರಿಸುವುದರಲ್ಲಿ ತಲ್ಲೀನರಾಗಿದ್ದರು. ಐಎಎಸ್‌ ಅಧಿಕಾರಿಗಳು, ವ್ಯಾಪಾರಿಗಳು, ವಿವಿಧ ವೃತ್ತಿಗಳಲ್ಲಿ ಯಶಸ್ಸು ಸಾಧಿಸಿರುವ ಶಿಷ್ಯರನ್ನು ಕಂಡು ಶಿಕ್ಷಕರು ಹಿರಿಹಿರಿ ಹಿಗ್ಗಿದರು. 

ನಿವೃತ್ತ ಶಿಕ್ಷಕಿ ಜಿ.ಪುಟ್ಟಹನುಮಕ್ಕ ಮಾತನಾಡಿ, ಶಾಲೆಯಲ್ಲಿ ಕಲಿತ ವಿದ್ಯಾರ್ಥಿಗಳು ಮುಂದೆ ಉತ್ತಮ ಭವಿಷ್ಯ ಕಟ್ಟಿಕೊಂಡಾಗ, ವಿದ್ಯೆ ಕಲಿಸಿದ ಗುರುವಿಗೆ ಆಗುವ ಸಂತೃಪ್ತಿಯ ಅನುಭವವೇ ಬೇರೆ. ಬದುಕಿನಲ್ಲಿ ಸಾಧನೆ ಮಾಡುವ ಮನೋಭಾವ ಎಲ್ಲರಿಗೂ ಇರಬೇಕು ಎಂದು ತಿಳಿಸಿದರು.

ಶಿಕ್ಷಕ ಓಂಕಾಂರ್‌ ನಾಯಕ್‌ ಮಾತನಾಡಿ, ಇದೊಂದು ಅದ್ಭುತ ಕ್ಷಣ. 25 ವರ್ಷಗಳ ಹಿಂದೆ ಶಾಲೆಯಿಂದ ಹೊರಬಿದ್ದು, ಭವಿಷ್ಯ ಅರಸುತ್ತ ದಿಕ್ಕು ದಿಕ್ಕಿಗೆ ಸಾಗಿದವರ ಜಾಡು ಹಿಡಿದು ಅವರನ್ನು ಸಂಪರ್ಕಕ್ಕೆ ತಂದು, ಗುರುಗಳನ್ನು ಶಿಷ್ಯರನ್ನು ಒಂದೆಡೆ ಸೇರಿಸಿರುವ ವಿನೂತನ ಕಾರ್ಯಕ್ರಮವಿದು ಎಂದರು.

ಮುಖಂಡ ರಫೀಕ್‌ ಪಾಷ ಮಾತನಾಡಿ, ನಾವೆಷ್ಟೇ ದೊಡ್ಡ ಹುದ್ದೆ ಅಲಂಕರಿಸಿದರೂ ಶಿಕ್ಷಣದ ದಾರಿ ತೋರಿದ ಗುರುವಿಗೆ ಚಿರರುಣಿಗಳಾಗಿರಬೇಕು. ಒಬ್ಬ ವಿದ್ಯಾರ್ಥಿ ಸಾಧನೆ ಮಾಡಿದಾಗ ಪೋಷಕರಿಗಿಂತ ಹೆಚ್ಚು ಹೆಮ್ಮೆ ಪಡುವವವರು ಗುರುಗಳು ಎಂದು ಅಭಿಪ್ರಾಯಪಟ್ಟರು.

ಹಳೆ ವಿದ್ಯಾರ್ಥಿನಿ ನಳಿನಾಕ್ಷಿ ಮಾತನಾಡಿ, ಇಲ್ಲಿ ಕಲಿತ ನಾವು ಇಂದು ಎಲ್ಲೋ ಬದುಕು ಕಟ್ಟಿಕೊಂಡಿದ್ದೇವೆ. ವಿದ್ಯಾರ್ಥಿ ಜೀವನದಲ್ಲಿ ನಮ್ಮ ತುಂಟಾಟಗಳನ್ನು ಮನ್ನಿಸಿ ನಮ್ಮ ಬದುಕನ್ನು ಹಸನಾಗಿಸಿದ ಗುರುಗಳನ್ನು  ಗೌರವಿಸುವುದೇ ಒಂದು ಸಂಭ್ರಮ ಎಂದರು.

ಹಳೇ ವಿದ್ಯಾರ್ಥಿ ಸಂಘ: ಹಳೆ ವಿದ್ಯಾರ್ಥಿಗಳ ಮುಖಂಡರಾದ ರಾಜಣ್ಣ,ನರಸಿಂಹಮೂರ್ತಿ, ಅನ್ನಪೂರ್ಣ,ಶ್ರೀನಿವಾಸ್‌, ರಾಜು, ಅಶಥನಾರಾಯಣ,ನಾಗಮಣಿ ಸೇರಿದಂತೆ 15ಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಗುರುಗಳಾದ ಆರ್‌. ಗೋವಿಂದಯ್ಯ,

ಓಂಕಾರ್‌ ನಾಯಕ್‌, ಕೆಎನ್‌.ಪ್ರಭುದೇವ್‌, ಆರ್‌.ವಿ.ರತ್ನಕರವೈದ್ಯ, ಜಿ ಪುಟ್ಟಹನುಮಕ್ಕ, ಹೆಚ್‌.ಎಸ್‌. ಮಂಗಳಾಂಬ ಎಸ್‌.ಆರ್‌.ಹೆಚ್‌.ಆರಾಧ್ಯ ಇವರನ್ನು ಸನ್ಮಾನಿಸಿ ಗೌರವಿಸಿ ನೆನಪಿನ ಕಾಣಿಕೆಯನ್ನು ನೀಡಿ ಹಳೆ ಸಹಪಾಟಿಗಳೆಲ್ಲರೂ ಪೋಟೊ ತೆಗೆಸಿಕೊಂಡರು.