ಫ‌ುಟ್ಬಾಲ್‌ ವಿಶ್ವ ಶ್ರೇಯಾಂಕ: ಭಾರತಕ್ಕೆ 102ನೇ ಸ್ಥಾನ

Team Udayavani, Feb 16, 2018, 6:45 AM IST

ಲೂಸಾನ್‌: ಗುರುವಾರ ಪ್ರಕಟಗೊಂಡಿರುವ ನೂತನ ಫಿಫಾ ವಿಶ್ವ ಫ‌ುಟ್ಬಾಲ್‌ ಶ್ರೇಯಾಂಕದಲ್ಲಿ ವಿಶ್ವ ವಿಜೇತ ಜರ್ಮನಿ ಅಗ್ರಸ್ಥಾನದಲ್ಲಿದ್ದು, ಭಾರತ 102ನೇ ಸ್ಥಾನದಲ್ಲಿದೆ. ಒಲಿಂಪಿಕ್‌ ಚಾಂಪಿಯನ್‌ ಬ್ರೆಜಿಲ್‌ 2ನೇ, ಯುರೋಪಿಯನ್‌ ಪ್ರಶಸ್ತಿ ವಿಜೇತ ಪೋರ್ಚುಗಲ್‌ 3ನೇ ಸ್ಥಾನದಲ್ಲಿದೆ. 

ಜನವರಿಯಲ್ಲಿ ನಡೆದ ಸೌಹಾರ್ದ ಪಂದ್ಯದಲ್ಲಿ ಇಂಡೋನೇಷ್ಯಾವನ್ನು ಸೋಲಿಸಿದ್ದ ಐಸ್‌ಲ್ಯಾಂಡ್‌ 20ರಿಂದ 18ನೇ ಸ್ಥಾನಕ್ಕೆ ಜಿಗಿದಿದೆ. ಕಳೆದೆರಡು ವರ್ಷಗಳಿಂದ ಸೌಹಾರ್ದ ಪಂದ್ಯಗಳಲ್ಲಷ್ಟೇ ಪಾಲ್ಗೊಂಡಿದ್ದ ರಷ್ಯಾ 61ನೇ ಸ್ಥಾನದಲ್ಲಿದೆ. ಟಾಪ್‌-10 ರಾಷ್ಟ್ರಗಳ ಸಾಲಿನಲ್ಲಿ ಯುರೋಪ್‌ನ 7 ದೇಶಗಳಿದ್ದರೆ, ದಕ್ಷಿಣ ಅಮೆರಿಕದ 3 ರಾಷ್ಟ್ರಗಳು ಸ್ಥಾನ ಗಿಟ್ಟಿಸಿವೆ. ಮೊದಲ ಹತ್ತು ರಾಷ್ಟ್ರಗಳಲ್ಲಿ ಅರ್ಜೆಂಟೀನ, ಬೆಲ್ಜಿಯಂ, ಸ್ಪೇನ್‌, ಪೋಲೆಂಡ್‌, ಸ್ವಿಜರೆಲಂಡ್‌, ಫ್ರಾನ್ಸ್‌, ಚಿಲಿ ಕ್ರಮವಾಗಿ 4ರಿಂದ 10ನೇ ಸ್ಥಾನದಲ್ಲಿವೆ. ಇಟಲಿ 14ನೇ, ಇಂಗ್ಲೆಂಡ್‌ 16ನೇ, ಮೆಕ್ಸಿಕೋ 17ನೇ ಶ್ರೇಯಾಂಕ ಹೊಂದಿವೆ.