ಜನನ ಲಿಂಗಾನುಪಾತ: ಕರ್ನಾಟಕದಲ್ಲಿ 11 ಅಂಕ ಇಳಿಕೆ

Team Udayavani, Feb 18, 2018, 8:15 AM IST

ಹೊಸದಿಲ್ಲಿ: ಜನನ ಲಿಂಗಾನುಪಾತ ಕರ್ನಾಟಕ ಸೇರಿದಂತೆ 21 ದೊಡ್ಡ ರಾಜ್ಯಗಳಲ್ಲಿ ಗಮನಾರ್ಹ ಇಳಿಕೆ ಕಂಡಿದೆ. ನೀತಿ ಆಯೋಗ ಈ ವರದಿಯನ್ನು ಬಿಡುಗಡೆ ಮಾಡಿದ್ದು, ಕರ್ನಾಟಕದಲ್ಲಿ 11 ಅಂಕ ಇಳಿಕೆ ಕಂಡಿದೆ. ಗುಜರಾತ್‌ನಲ್ಲಿ 53 ಪಾಯಿಂಟ್‌ಗಳಷ್ಟು ಇಳಿಕೆ ಕಂಡಿರುವುದು ಎಚ್ಚರಿಕೆಯ ಗಂಟೆಯಾಗಿದೆ. ಇದರಿಂದಾಗಿ ಲಿಂಗ ಆಧರಿತ ಗರ್ಭಪಾತ ಪ್ರಕರಣ ಹೆಚ್ಚುತ್ತಿದೆಯೇ ಎಂಬ ಅನುಮಾನವೂ ಉಂಟಾಗಿದೆ.

2012-14ರ ವರ್ಷವನ್ನು ಮೂಲ ವರ್ಷವನ್ನಾಗಿರಿಸಿ ಕೊಂಡು ಈ ವಿಶ್ಲೇಷಣೆ ಮಾಡಲಾಗಿದ್ದು, ಆಗ ಅನುಪಾತ 1000:907ರಷ್ಟಿತ್ತು. ಪ್ರಸಕ್ತ ವರ್ಷ ಇದು 1000:854 ಕ್ಕೆ ಇಳಿಕೆ ಕಂಡಿದೆ. ಗುಜರಾತ್‌ ನಂತರದಲ್ಲಿ ಹರಿಯಾಣದಲ್ಲಿ ಹೆಚ್ಚು ಇಳಿಕೆಯಾಗಿದ್ದು, 35 ಅಂಶ ಕುಸಿದಿದೆ. ಇದೇ ರೀತಿ ರಾಜಸ್ಥಾನ (32), ಉತ್ತರಾಖಂಡ (27), ಮಹಾರಾಷ್ಟ್ರ (18), ಹಿಮಾಚಲ ಪ್ರದೇಶ (14), ಛತ್ತೀಸ್‌ಗಢ (12)ದಲ್ಲೂ ಇಳಿಕೆ ಕಂಡುಬಂದಿದೆ.

ಈ ಹಿನ್ನೆಲೆಯಲ್ಲಿ  ಗರ್ಭಧಾರಣೆ ಪೂರ್ವ ಮತ್ತು ಶೈಶವ ಪೂರ್ವ ತಪಾಸಣೆ ತಂತ್ರಗಳ ಕಾಯ್ದೆ 1994ರ ಪರಿಣಾಮಕಾರಿ ಅನುಷ್ಠಾನ ಕೈಗೊಳ್ಳುವ ಅಗತ್ಯವಿದೆ ಎಂದು ನೀತಿ ಆಯೋಗ ತನ್ನ ವರದಿಯಲ್ಲಿ ತಿಳಿಸಿದೆ.