ಶಿವಜ್ಯೋತಿ ಒಯ್ಯುತ್ತಿದ್ದ ಟ್ರಕ್‌ ಅಪಘಾತ: 5 ವಿದ್ಯಾರ್ಥಿಗಳ ಸಾವು

Team Udayavani, Feb 19, 2018, 11:49 AM IST

ಮುಂಬಯಿ : ಪಶ್ಚಿಮ ಮಹಾರಾಷ್ಟ್ರದ ಕೊಲ್ಹಾಪುರ ಜಿಲ್ಲೆಯಲ್ಲಿ ಇಂದು ಬೆಳಗ್ಗೆ ಸಂಭವಿಸಿದ ಭೀಕರ ರಸ್ತೆ ಅಪಘಾತದಲ್ಲಿ ಐವರು ವಿದ್ಯಾರ್ಥಿಗಳು ಮೃತಪಟ್ಟು ಇತರ 29 ಮಂದಿ ಗಾಯಗೊಂಡರೆಂದು ಪೊಲೀಸರು ತಿಳಿಸಿದ್ದಾರೆ.

ಈ ದುರಂತವು ಮುಂಬಯಿ – ಬೆಂಗಳೂರು ಹೈವೇಯಲ್ಲಿ ನಗಾಂವ್‌ ಸಮೀಪ ಸಂಭವಿಸಿತು. ಛತ್ರಪತಿ ಶಿವಾಜಿ ಮಹಾರಾಜ್‌ ಅವರ ಜನ್ಮ ದಿನ ಸಂಬಂಧವಾಗಿ ಸುಮಾರು 44 ವಿದ್ಯಾರ್ಥಿಗಳು “ಶಿವಜ್ಯೋತಿ’ಯನ್ನು ಟ್ರಕ್ಕಿನಲ್ಲಿ ಸಾಂಗ್ಲಿಗೆ ಒಯುತ್ತಿದ್ದರು ಎಂದು ಹಿರಿಯ ಪೊಲೀಸ್‌ ಅಧಿಕಾರಿ ತಿಳಿಸಿದ್ದಾರೆ.

ಟ್ರಕ್ಕಿಗೆ ವಾಹನವೊಂದು ಹಿಂಬದಿಯಿಂದ ಢಿಕ್ಕಿ ಹೊಡೆಯಿತು; ಟ್ರಕ್ಕಿಗೆ ಬೆಂಗಾವಲಾಗಿ ಬರುತ್ತಿದ್ದ  ಎರಡು ಮೋಟಾರ್‌ ಬೈಕ್‌ಗಳಿಗೂ ಈ ವಾಹನ ಢಿಕ್ಕಿ ಹೊಡೆಯಿತು. 

ಗಾಯಾಳುಗಳನ್ನು ಒಡನೆಯೇ ಆಸ್ಪತ್ರೆಗೆ ಒಯ್ಯಲಾಯಿತು. ಆದರೆ ಅವರ ಪೈಕಿ ಐವರು ವಿದ್ಯಾರ್ಥಿಗಳು ಅದಾಗಲೇ ಮೃತಪಟ್ಟಿರುವುದಾಗಿ ವೈದ್ಯರು ಹೇಳಿದರು. ಇತರ 29 ಗಾಯಾಳುಗಳು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. 

ಅಧಿಕಾರಿಗಳ ಪ್ರಕಾರ ವಿದ್ಯಾರ್ಥಿಗಳು ಕೊಲ್ಹಾಪುರ ಜಿಲ್ಲೆಯ ಪನ್‌ಹಾಲಾ ಕೋಟೆಯಿಂದ ತಮ್ಮ ಪ್ರಯಾಣವನ್ನು ಆರಂಭಿಸಿದ್ದರು ಎಂದು ತಿಳಿಸಿರುವ ಪೊಲೀಸ್‌ ಅಧಿಕಾರಿ, ಪ್ರಕರಣದ ಬಗ್ಗೆ ಕೇಸು ದಾಖಲಿಸಿಕೊಂಡು ತನಿಖೆ ನಡೆಸಲಾಗುತ್ತಿದೆ ಎಂದು ಹೇಳಿದ್ದಾರೆ.