ಆಡಳಿತವನ್ನು ಹೋಲಿಕೆ ಮಾಡಿ ನೋಡಿ

Team Udayavani, Feb 26, 2018, 10:10 AM IST

ಪುದುಚೇರಿ: ಕಾಂಗ್ರೆಸ್‌ ನಾಲ್ಕು ದಶಕದ ಆಡಳಿತವನ್ನು ಎನ್‌ಡಿಎ ಸರಕಾರದ 48 ತಿಂಗಳ ಆಡಳಿತದೊಂದಿಗೆ ಹೋಲಿಕೆ ಮಾಡುವಂತೆ ಜನರಿಗೆ ಹೇಳಲಾಗುತ್ತಿದೆ. ಬುದ್ಧಿವಂತರು ಕಾಂಗ್ರೆಸ್‌ ಏನನ್ನು ಸಾಧಿಸಿದೆ ಮತ್ತು ಬಿಜೆಪಿ ನೇತೃತ್ವದ ಎನ್‌ಡಿಎ ಸರಕಾರ ಏನನ್ನು ಸಾಧಿಸಿದೆ ಎಂದು ಹೋಲಿಕೆ ಮಾಡಿ ಚರ್ಚಿಸಬಹುದು ಎಂದು ಪ್ರಧಾನಿ ನರೇಂದ್ರ ಮೋದಿ ಪುದುಚೇರಿಯಲ್ಲಿ ಕಿಡಿ ಕಾರಿದ್ದಾರೆ.

ಅಲ್ಲದೆ ಕೇಂದ್ರಾಡಳಿತ ಪ್ರದೇಶ ಪುದುಚೇರಿ ಕಾಂಗ್ರೆಸ್‌ ಸಂಸ್ಕೃತಿಯ ಸಂತ್ರಸ್ತ ಪ್ರದೇಶವಾಗಿದೆ. ಮೂಲಸೌಕರ್ಯ ಕಳಪೆ ಯಾಗಿದೆ. ಮುಂಬರುವ ವಿಧಾನಸಭೆ ಚುನಾವಣೆಯಲ್ಲಿ ಕರ್ನಾಟ ಕ ದಲ್ಲಿ ಬಿಜೆಪಿ ಅಧಿಕಾರಕ್ಕೇರಲಿದ್ದು, ಪುದುಚೇರಿಯಲ್ಲಿ ವಿ.ನಾರಾ ಯ ಣಸ್ವಾಮಿ ಸರಕಾರವನ್ನು ಮಾತ್ರ ಕಾಂಗ್ರೆಸ್‌ ಹೊಂದಿರಲಿದೆ. ಜೂನ್‌ನ ನಂತರ ನಾರಾಯಣಸ್ವಾಮಿ ಒಂದು ಉದಾಹರಣೆಯಾಗಿ ನಿಲ್ಲುತ್ತಾರೆ ಎಂದು ಮೋದಿ ವ್ಯಂಗ್ಯವಾಡಿದರು.

ಪುದುಚೇರಿಯಲ್ಲಿ ಅರೋವಿಲ್ಲೆ ಇಂಟರ್‌ನ್ಯಾಷನಲ್‌ ಟೌನ್‌ಶಿಪ್‌ನ ಸ್ವರ್ಣ ಮಹೋತ್ಸವ ಕಾರ್ಯಕ್ರಮವನ್ನು ಉದ್ಘಾಟಿಸಿ ಮೋದಿ ಮಾತನಾಡಿದರು. ವಿಶ್ವದ ಹಲವು ಧರ್ಮಗಳು ಇಲ್ಲಿ ಹುಟ್ಟಿವೆ. ಅಷ್ಟೇ ಅಲ್ಲ, ಅವು ಜೀವನದ ವಿವಿಧ ಘಟ್ಟದಲ್ಲಿ ಜನರನ್ನು ಧಾರ್ಮಿಕತೆಯತ್ತಪ್ರೋತ್ಸಾಹಿಸಿವೆ. ಅರವಿಂದರ ಧಾರ್ಮಿಕ ನಾಯಕತ್ವ ಇಂದಿಗೂ ನಮ್ಮಲ್ಲಿ ಮಹತ್ವ ಪಡೆದಿದೆ ಎಂದು ಅವರು ಹೇಳಿದರು. ಅರವಿಂದರ ಸಿದ್ಧಾಂತವನ್ನೇ ಆಧರಿಸಿದ ಅರೋವಿಲ್ಲೆ ಟೌನ್‌ಶಿಪ್‌ 1968ರಲ್ಲಿ ಸ್ಥಾಪನೆಯಾಗಿ, 124 ದೇಶಗಳಲ್ಲಿ ಅಸ್ತಿತ್ವ ಹೊಂದಿದೆ.