ಭಾರತ್‌ ಮಾತಾ ಕೀ ಜೈ ಎನ್ನದವರು ಪಾಕಿಸ್ಥಾನೀಯರು: ಬಿಜೆಪಿ ಶಾಸಕ

Team Udayavani, Feb 26, 2018, 11:39 AM IST

ಹೊಸದಿಲ್ಲಿ : “ಭಾರತ್‌ ಮಾತಾ ಕೀ ಜೈ ಎಂದು ಹೇಳದವರನ್ನು ಭಾರತೀಯರೆಂದು ಒಪ್ಪಲು ನಾನು ತಯಾರಿಲ್ಲ” ಎಂದು ಹೇಳುವ ಮೂಲಕ ಬಿಜೆಪಿ ಶಾಸಕ ಸುರೇಂದ್ರ ಸಿಂಗ್‌ ಅವರು ಇನ್ನೊಮ್ಮೆ ವಿವಾದವನ್ನು ಸೃಷ್ಟಿಸಿದ್ದಾರೆ. 

“ಭಾರತ್‌ ಮಾತಾ ಕೀ ಜೈ ಎಂದು ಹೇಳಲು ಸಂಕೋಚಿಸುವವರನ್ನು ನಾನು ಪಾಕಿಸ್ಥಾನೀಯರೆಂದು ಕರೆಯುತ್ತೇನೆ” ಎಂದು ಬೈರಿಯಾ ಶಾಸಕ ಸುರೇಂದ್ರ ಸಿಂಗ್‌ ಹೇಳುವ ವಿಡಿಯೋ ಈಗ ವೈರಲ್‌ ಆಗಿದೆ. ಅವರು ಈ ವಿವಾದಿತ ಹೇಳಿಕೆಯನ್ನು ನಿನ್ನೆ ಭಾನುವಾರ ಮಾಡಿದರು. 

ಇದೇ ಶಾಸಕ ಸುರೇಂದ್ರ ಸಿಂಗ್‌ ವರು ಈ ವರ್ಷ ಜನವರಿಯಲ್ಲಿ “ಭಾರತವು 2024ರೊಳಗೆ ಹಿಂದೂ ರಾಷ್ಟ್ರವಾಗುತ್ತದೆ’ ಎಂಬ ವಿವಾದಾತ್ಮಕ ಹೇಳಿಕೆ ನೀಡಿದ್ದರು. 

“ಮುಸ್ಲಿಮರಲ್ಲಿ ಕೆಲವೇ ಕೆಲವರು ಮಾತ್ರವೇ ದೇಶಪ್ರೇಮಿಗಳು. ಭಾರತವು ಹಿಂದೂ ರಾಷ್ಟ್ರವಾದಾಗ ಭಾರತೀಯ ಸಂಸ್ಕೃತಿಯೊಂದಿಗೆ ಸಮ್ಮಿಳಿತಗೊಳ್ಳುವವರು ಮಾತ್ರವೇ ಭಾರತದಲ್ಲಿ ಉಳಿಯುತ್ತಾರೆ. ಹಾಗೆ ಸಮ್ಮಿಳಿತರಾಗದವರು ಬೇರೆ ಯಾವುದೇ ದೇಶಕ್ಕೆ ಹೋಗಲು ಸ್ವತಂತ್ರರಿರುತ್ತಾರೆ’ ಎಂದು ಬೈರಿಯಾ ಶಾಸಕ ಸುರೇಂದ್ರ ಸಿಂಗ್‌ ಹೇಳಿದ್ದರು. 

#WATCH Ballia: Bairia BJP MLA Surendra Singh said’ aise logon ko Pakistani kehta hun jo Bharat Mata ki jai bolne se katrate hain’ (25.02.18) pic.twitter.com/lZX3D3MIZ2

— ANI UP (@ANINewsUP) February 26, 2018

ಸಿಂಗ್‌ ಅವರು ಮುಂದುವರಿದು “ಪ್ರಧಾನಿ ನರೇಂದ್ರ ಮೋದಿ ಅವರು ಓರ್ವ ಅವತಾರೀ ಪುರುಷ’ ಎಂದು ವರ್ಣಿಸಿದ್ದರು. 

“ರಾಹುಲ್‌ ಗಾಂಧಿಯವರಲ್ಲಿ ಎರಡು ರೀತಿಯ ಮೌಲ್ಯಗಳಿವೆ : ಒಂದು ಇಟಾಲಿಯನ್‌ ಮೌಲ್ಯ; ಇನ್ನೊಂದು ಭಾರತೀಯ ಮೌಲ್ಯ. ಆದುದರಿಂದ ಅವರು ಎಂದೂ ಭಾರತೀಯ ಚಿಂತನೆಗಳ ಜ್ಯೋತಿಯನ್ನು ಕೊಂಡೊಯ್ಯಲಾರರು’ ಎಂದು ಸಿಂಗ್‌ ಹೇಳಿದ್ದರು.