ಚುಡಾಯಿಸುತ್ತಿದ್ದವನಿಗೆ ಗತಿ ಕಾಣಿಸಿದ ದಿಲ್ಲಿಯ ‘ದಬಾಂಗ್‌’ ಮಹಿಳೆ

Team Udayavani, Feb 27, 2018, 6:55 PM IST

ಹೊಸದಿಲ್ಲಿ: ದಿಲ್ಲಿಯ “ದಬಾಂಗ್‌’ ಮಹಿಳೆಯೊಬ್ಬಳು ತನ್ನನ್ನು  ಚುಡಾಯಿಸಿದ ಕಾಮುಕನೋರ್ವನ ಕಾಲರ್‌ ಹಿಡಿದು, ಕಪಾಳ ಮೋಕ್ಷ ಮಾಡಿ, ಆತನನ್ನು ಪೊಲೀಸ್‌ ಠಾಣೆಗೆ ಎಳೆದೊಯ್ದ ಘಟನೆ ವರದಿಯಾಗಿದೆ. 

ಈ ಘಟನೆ ನಡೆದದ್ದು ಪಶ್ಚಿಮ ದಿಲ್ಲಿಯಲ್ಲಿ ಫೆ.25ರ ಭಾನುವಾರದಂದು. ಮಹಿಳೆಯು ತನ್ನ ಸ್ನೇಹಿತನ ಜತೆಗೆ ಕರೋಲ್‌ ಬಾಗ್‌ನ ಗಫ‌ರ್‌ ಮಾರ್ಕೆಟ್‌ಮಾರ್ಗವಾಗಿ ನಡೆದುಕೊಂಡು ಹೋಗುತ್ತಿದ್ದಾಗ ಐವರು ವ್ಯಕ್ತಿಗಳು ಮಹಿಳೆಯನ್ನು ಚುಡಾಯಿಸಲು ಆರಂಭಿಸಿದರು. ಇವರಿಂದ ತಪ್ಪಿಸಿಕೊಳ್ಳಲು ಮಹಿಳೆ ಮತ್ತು ಆಕೆಯ ಸ್ನೇಹಿತ ಸೈಕಲ್‌ ರಿಕ್ಷಾ ಏರಿದರು. ಆಗ ಚುಡಾಯಿಸುವ ತಂಡದವರು ಕೂಡ ಇವರನ್ನು ಹಿಂಬಾಲಿಸುತ್ತಾ ಅಶ್ಲೀಲ ಪದಗಳನ್ನು ಬಳಸಿ ಅವಹೇಳನ ಮಾಡತೊಡಗಿದರು. 

ಆಗ ಮಹಿಳೆಗೆ ಇದ್ದಕ್ಕಿದ್ದಂತೆಯೇ ವಿಪರೀತ ಸಿಟ್ಟು ಬಂದು ಸೈಕಲ್‌ ರಿಕ್ಷಾದಿಂದ ಇಳಿದು ಚುಡಾಯಿಸುತ್ತಿದ್ದವರಲ್ಲಿ ಒಬ್ಟಾತನ ಕಾಲರ್‌ ಹಿಡಿದು ಕೆನ್ನೆಗೆ ಬಾರಿಸಿ ಆತನನ್ನು ದರದರನೆ ಪೊಲೀಸ್‌ ಠಾಣೆಗೆ ಎಳೆದೊಯ್ದಳು. ಇದನ್ನು ನೋಡುತ್ತಿದ್ದ ಜನರು ಸ್ತಂಭೀಭೂತರಾದರು. 

ಮಹಿಳೆ ಕೊಟ್ಟ ದೂರಿನ ಪ್ರಕಾರ ಪೊಲೀಸರು ಆಕೆಯನ್ನು ಚುಡಾಯಿಸಿದವರ ಪೈಕಿ ಇನ್ನೂ ಇಬ್ಬರನ್ನು ಸೆರೆ ಹಿಡಿದರು. 

ಎಫ್ಐಆರ್‌ ದಾಖಲಿಸಿಕೊಂಡ ಪೊಲೀಸರು ಈಗ ಪ್ರಕರಣದ ತನಿಖೆ ನಡೆಸುತ್ತಿದ್ದಾರೆ.