ಇಸ್ರೋ ಸಾಧನೆಗೆ ವಿಶ್ವವೇ ಬೆರಗು

Team Udayavani, Mar 1, 2018, 2:20 PM IST

ದೊಡ್ಡಬಳ್ಳಾಪುರ: ಇಸ್ರೋದ ಇಂದಿನ ಸಾಧನೆಗೆ ಇಡೀ ಜಗತ್ತೇ ಭಾರತದತ್ತ ನೋಡು ವಂತಾಗಿದೆ. ಜೀವನ ಮಟ್ಟ ಸುಧಾರಣೆ ಹಾಗೂ ಉತ್ತಮ ಸಮಾಜದ ನಿರ್ಮಾಣಕ್ಕೆ ವಿಜ್ಞಾನ ಮತ್ತು ತಂತ್ರಜ್ಞಾನ ಬಳಸಿಕೊಳ್ಳಲು ಮುಂದಾಗಬೇಕಿದೆ ಎಂದು ಇಸ್ರೋ ನಿಕಟಪೂರ್ವ ಅಧ್ಯಕ್ಷ ಎ.ಎಸ್‌.ಕಿರಣ್‌ ಕುಮಾರ್‌ ಸಲಹೆ ನೀಡಿದರು. ನಗರದ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜು ಹಾಗೂ ಜ್ಞಾನ ಶಿಕ್ಷಣ ಟ್ರಸ್ಟ್‌ ವತಿಯಿಂದ ನಡೆದ ರಾಷ್ಟ್ರೀಯ ವಿಜ್ಞಾನ ದಿನಾಚರಣೆ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.

ಚಂಡಮಾರುತ ಮುನ್ಸೂಚನೆ: ತಂತ್ರಜ್ಞಾನದ ಬೆಳವಣೆಗೆಯಿಂದ ಹಲವು ರೀತಿಯ ಅವಕಾಶಗಳು ಸೃಷ್ಟಿಯಾಗುತ್ತಿದೆ. ಸವಾಲುಗಳನ್ನು ಎದುರಿಸುವ ಮೂಲಕ ಹೊಸ ದಾರಿ ಕಂಡುಕೊಳ್ಳಬಹುದು. ವಿಜ್ಞಾನ ಮತ್ತು ತಂತ್ರಜ್ಞಾನಗಳನ್ನು ಈ ಹಿಂದಿಗಿಂತಲೂ ಹೆಚ್ಚು ಸಮರ್ಪಕವಾಗಿ ಬಳಸಿಕೊಳ್ಳುತ್ತಿರುವ ದೇಶ ಗಳಲ್ಲಿ ಭಾರತ ಮುಂಚೂಣಿಯಲ್ಲಿದ್ದು, ಜ್ಞಾನವನ್ನು ಸಮರ್ಪಕವಾಗಿ ಬಳಸಿಕೊಳ್ಳುತ್ತಿ ರುವ ಹಿರಿಮೆ ಇಸ್ರೋಗೆ ಇದೆ. ನಮ್ಮ ದೇಶದಲ್ಲಿ 45 ಉಪಗ್ರಹಗಳ ಉಡಾವಣೆ ಮಾಡಲಾಗಿದೆ. ಜೊತೆಗೆ 28 ದೇಶಗಳ 237 ಉಪಗ್ರಹಗಳನ್ನು ಹಾರಿಸಲು ಸಾಧ್ಯವಾಗಿದೆ.

ನಾಲ್ಕು ಉಪಗ್ರಹಗಳನ್ನು ಒಂದೇ ಬಾರಿಗೆ ಉಡಾವಣೆ ಮಾಡಿದಾಗ ಇಡೀ ಪ್ರಪಂಚವೇ ನಿಬ್ಬೆರಾಗಿ ಭಾರತದ ಕಡೆ ನೋಡಿತು. ಮೊದಲ ಪ್ರಯತ್ನದಲ್ಲೇ ಮಂಗಳ ಗ್ರಹಕ್ಕೆ ಉಪಗ್ರಹ ಉಡಾವಣೆ ಮಾಡಿದ್ದು, ಭಾರತದ ಸಾಧನೆ. ಬಾಹ್ಯಾಕಾಶದ ತಂತ್ರಜ್ಞಾನದ ನೆರವಿನಿಂದ ಸಂಪರ್ಕ ಸಾಧನಗಳ ಅಭಿವೃದ್ಧಿಯಾಗಿದೆ. ಬೆಳೆಗಳ ಬಗ್ಗೆ ಮಾಹಿತಿ, ರೈತರು, ಮೀನುಗಾರರಿಗೆ ಮಾಹಿತಿ ನೀಡಲು ಸಾಧ್ಯವಾಗಿದೆ. ಚಂಡಮಾರುತ ಮುನ್ಸೂಚನೆಯನ್ನು ವಿಪತ್ತು ನಿರ್ವಹಣಾ ಪಡೆಗೆ ನೀಡುವ ಮೂಲಕ ಜನರನ್ನು ಸುರಕ್ಷಿತ ಸ್ಥಳಗಳಿಗೆ ಸ್ಥಳಾಂತರಿಸಿ ಜನರ ಪ್ರಾಣ ಉಳಿಸಲೂ ಇಸ್ರೊ ನೆರವಾಗಿದೆ ಎಂದು ವಿವರಿಸಿದರು.

ಮಾಹಿತಿ ಸಂವಹನ ನೀಡುವ ಯೋಜನೆ: ಉಪಗ್ರಹ ತಂತ್ರಜ್ಞಾನದಿಂದ ಕೇರಳದ ಸಮುದ್ರ ತೀರದಿಂದ 120 ಮೈಲು ದೂರದಲ್ಲಿ ಮೊಬೈಲ್‌ನಲ್ಲಿ ತಮ್ಮದೇ ಭಾಷೆಯಲ್ಲಿ ಮಾಹಿತಿ ನೀಡಲು ಸಾಧ್ಯವಾಗಿದೆ. 

ಅಂತಾರಾಷ್ಟ್ರೀಯ ಸಮುದ್ರ ಗಡಿ ರೇಖೆಗಳನ್ನು ಎಚ್ಚರಿಸಲು ಸಾಧ್ಯವಾಗಿದೆ. ಟೆಲಿ ಮೆಡಿಸಿನ್‌, ರೈತರಿಗೆ, ರೈಲ್ವೇಸ್‌ಗೆ ಬೇಕಾದ ಮಾಹಿತಿ ನಿರಂತರವಾಗಿ ನೀಡಲು ಇಸ್ರೊ ಪ್ರಯತ್ನಿಸುತ್ತಿದೆ. 2400 ಗ್ರಾಂಗಳಲ್ಲಿ ಮಾಹಿತಿ ಸಂವಹನ ನೀಡುವ ಯೋಜನೆ ಜಗತ್ತಿನಲ್ಲಿಯೇ ಪ್ರಥಮ ಪ್ರಯತ್ನವಾಗಿದೆ.

ಕಳೆದ ಶತಮಾನದ ಮಹತ್ವದ ಸಂಶೋಧನೆಗಳಲ್ಲಿ ಸಿ.ವಿ.ರಾಮನ್‌ ಅವರ ರಾಮನ್‌ ಪರಿಣಾಮ ಹಾಗೂ ಜಗದೀಶ ಚಂದ್ರ ಬೋಸ್‌ ಅವರ ಸಸ್ಯಶಾಸ್ತ್ರದ ಆವಿಷ್ಕಾರಗಳು ಜಗತ್ತಿನ ಗಮನ ಸೆಳೆದಿವೆ. ಈ ದಿಸೆಯಲ್ಲಿ ಜ್ಞಾನ ಮತ್ತು ಕೌಶಲ್ಯಾಧಾರಿತ ಯುವಶಕ್ತಿಯಿಂದ ಯಾವ ಸವಾಲನ್ನಾದರೂ ಎದುರಿಸಬಹುದು ಎಂದು ಹೇಳಿದರು.

ವಿಜ್ಞಾನ ಪ್ರಗತಿ ವಿರೋಧ ಅಲ್ಲ: ಲೇಖಕಿ ಡಾ.ಕೆ.ಎಸ್‌.ಚೈತ್ರಾ ಮಾತನಾಡಿ, ವಿಜ್ಞಾನ ಎಂದೂ ಪ್ರಗತಿ ವಿರೋಧ ಅಲ್ಲ. ಡೋಡೋ ಪಕ್ಷಿಗಳ ಉಳಿವು ಸೇರಿದಂತೆ ಹಲವಾರು ಜೀವ ಸಂಕುಲವನ್ನು ವೈಜ್ಞಾನಿಕ ನೆಲಗಟ್ಟಿನಲ್ಲಿ ಉಳಿಸಿರುವುದು ವಿಜ್ಞಾನ. ಆದರೆ ವಿಜ್ಞಾನದ ಬಗ್ಗೆ ಇರುವ ಅಂಧಶ್ರದ್ಧೆಯನ್ನು ದೂರಗೊಳಿ ಸಬೇಕಿದೆ. ಎಚ್‌. ನರಸಿಂಹಯ್ಯ ಅವರ ಹೇಳಿದಂತೆ ನಮ್ಮ ಹಣೆ ಮೇಲೆ ಪ್ರಶ್ನಾರ್ಥಕ ಚಿಹ್ನೆ ಹಾಕಿಕೊಂಡು ನಮಗೆ ಎದುರಾಗುವ ಆಗುಹೋಗುಗಳಿಗೆ ಉತ್ತರ ಕಂಡುಕೊಳ್ಳುವ ಪ್ರಯತ್ನ ಮಾಡದಿದ್ದರೆ ವಿಜ್ಞಾನಕ್ಕೆ ಅರ್ಥವಿಲ್ಲ. 

ಆದರೆ ಇಂದಿನ ಬಹಳಷ್ಟು ಶಿಕ್ಷಕರು ಮತ್ತು ಪೋಷಕರು ಮಕ್ಕಳಿಗೆ ಏಳುವ ಪ್ರಶ್ನೆಗಳಿಗೆ ಉತ್ತರಿಸುವ ಗಂಭೀರ ಪ್ರಯತ್ನ ಮಾಡದಿರು ವುದು ವಿಷಾದಕರ. ಮಾನವೀಯ ಸಂಬಂಧಗಳನ್ನು ಗಾಢಗೊಳಿಸುವಲ್ಲಿಯೂ ವಿಜ್ಞಾನದ ಪಾತ್ರವಿದ್ದು, ಜಗತ್ತಿನ ಏಳಿಗೆಗಾಗಿ ವಿಜ್ಞಾನ ಎನ್ನುವ ವಿವೇಚನೆ ಎಲ್ಲರಿಗೂ ಇರಬೇಕು ಎಂದರು.

ಸಮಾರಂಭದಲ್ಲಿ ವಿವಿಧ ಸ್ಪರ್ಧೆಗಳಲ್ಲಿ ವಿಜೇತರಾದ ಪ್ರೌಢಶಾಲೆ ಮತ್ತು ಕಾಲೇಜಿನ ವಿದ್ಯಾರ್ಥಿಗಳಿಗೆ ಬಹುಮಾನ
ವಿತರಿಸಲಾಯಿತು. ಸರ್ಕಾರಿ ಪ್ರಥಮ ದರ್ಜೆ ಕಾಲೇಜಿನ ಪ್ರಾಧ್ಯಾಪಕ ಸದಾಶಿವ ರಾಮಚಂದ್ರಗೌಡ ಅಧ್ಯಕ್ಷತೆ ವಹಿಸಿದ್ದರು. ಅಂತಾರಾಷ್ಟ್ರೀಯ ಅಥ್ಲೆಟ್‌ ಅರ್ಜುನ್‌ ದೇವಯ್ಯ ತೀತಮಾಡ, ಶಿಕ್ಷಣ ಸಂಯೋಜಕರಾದ ಪ್ರಹ್ಲಾದ್‌, ಜ್ಞಾನ ಶಿಕ್ಷಣ ಟ್ರಸ್ಟ್‌ನ ಕಾರ್ಯದರ್ಶಿ ಕೆ.ಬಿ.ಮಲ್ಲಿಕಾರ್ಜುನ ಭಾಗವಹಿಸಿದ್ದರು.