ಸಾಮಾಜಿಕ ಭದ್ರತೆಯತ್ತ ಹೆಜ್ಜೆ

Team Udayavani, Mar 3, 2018, 10:35 AM IST

ಹೊಸದಿಲ್ಲಿ: ದೇಶದ ಅಸಂಘಟಿತ ಕಾರ್ಮಿಕರ ಜೀವನವನ್ನು ಸುಭದ್ರಗೊಳಿಸುವ ಹಾಗೂ ಸಂಘಟಿತ ನೌಕರರಿಗೆ ಸಿಗುವ ಸವಲತ್ತುಗಳನ್ನು ಅವರಿಗೂ ಸಿಗುವಂತೆ ಮಾಡುವ ಮಹತ್ವದ ಯೋಜನೆಯೊಂದನ್ನು ಕೇಂದ್ರ ಸರಕಾರ ಸದ್ಯದಲ್ಲೇ ಜಾರಿಗೆ ತರಲಿದೆ.

ಬಜೆಟ್‌ನಲ್ಲಿ ಬಡವರಿಗಾಗಿ ರಾಷ್ಟ್ರೀಯ ಆರೋಗ್ಯ ಭದ್ರತಾ ಯೋಜನೆ (ಆಯುಷ್ಮಾನ್‌ ಭವ) ಘೋಷಿಸಿದ ಬೆನ್ನಿಗೇ ಇದೀಗ, ಅಸಂಘಟಿತ ಕಾರ್ಮಿಕರ ಕಲ್ಯಾಣಕ್ಕೂ ಕೇಂದ್ರ ಮುಂದಾಗಿದೆ. ಸುಮಾರು 50 ಕೋಟಿ ಅಸಂಘಟಿತ ನೌಕರರು ಇದರ ಲಾಭ ಪಡೆಯಲಿದ್ದಾರೆ. ಯೋಜನೆಯ ಮೇಲುಸ್ತುವಾರಿಗಾಗಿ ರಾಷ್ಟ್ರೀಯ ಸಾಮಾಜಿಕ ಭದ್ರತಾ ಮಂಡಳಿ ಸ್ಥಾಪಿಸಲಾಗುತ್ತದೆ. ಯೋಜನೆಯ ರೂಪುರೇಷೆಗಳಿಗಾಗಿ ತಜ್ಞರ ಅಭಿಮತ ಕೋರಲಾಗಿದ್ದು, ಅವರ ಸಲಹೆಗಳ ಆಧಾರದ ಮೇಲೆ ಯೋಜನೆಯ ಅಂತಿಮ ಕರಡು ಸಿದ್ಧಪಡಿಸಲಾಗುತ್ತದೆ. ಇದಕ್ಕೆ ಕೇಂದ್ರ ಸಚಿವ ಸಂಪುಟದ ಒಪ್ಪಿಗೆ ಸಿಕ್ಕಮೇಲೆ, ಸಂಸತ್ತಿನಲ್ಲಿ ಇದನ್ನು ಮಂಡಿಸಲಾಗುತ್ತದೆ.

3 ಹಂತಗಳಲ್ಲಿ ಜಾರಿ: ಮುಂದಿನ ಹತ್ತು ವರ್ಷಗಳಲ್ಲಿ ಈ ಯೋಜನೆ ಮೂರು ಹಂತಗಳಲ್ಲಿ ಜಾರಿಗೊಳ್ಳಲಿದೆ. ಸದ್ಯಕ್ಕೆ 18,500 ಕೋಟಿ ರೂ.ಗಳ ವೆಚ್ಚದಲ್ಲಿ ಜಾರಿಗೊಳ್ಳಲಿರುವ ಯೋಜನೆಯ ಮೊದಲ ಹಂತದಲ್ಲಿ, ಅಸಂಘಟಿತ ನೌಕರರಿಗೆ ಆರೋಗ್ಯ ಭದ್ರತೆ,ನಿವೃತ್ತಿ ಭತ್ಯೆಗಳು ಸಿಗಲಿವೆ. 2ನೇ ಹಂತದಲ್ಲಿ, ನಿರುದ್ಯೋಗಕ್ಕೆ ತುತ್ತಾದವರಿಗೆ ಸೌಲಭ್ಯಗಳು ಹೆಚ್ಚುವರಿಯಾಗಿ ಸೇರ್ಪಡೆಗೊಳ್ಳಲಿವೆ. 3ನೇ ಹಂತದಲ್ಲಿ, ಇತರ ಕಲ್ಯಾಣ ಯೋಜನೆಗಳು ಸೇರ್ಪಡೆಗೊಳ್ಳಲಿವೆ.