ಸದ್ಯದಲ್ಲೇ ಹೈಪರ್‌ ತೆರೆಗೆ

Team Udayavani, Mar 3, 2018, 11:06 AM IST

ಎಂ.ಬಿಗ್‌ ಪಿಕ್ಚರ್ಸ್‌ ಬ್ಯಾನರ್‌ನಲ್ಲಿ ಎಂ.ಕಾರ್ತಿಕ್‌ ನಿರ್ಮಿಸಿರುವ “ಹೈಪರ್‌” ಚಿತ್ರದ ಪ್ರಥಮ ಪ್ರತಿ ಸಿದ್ದವಾಗಿದೆ. ಮಾರ್ಚ್‌ನಲ್ಲಿ ಚಿತ್ರ ತೆರೆಗೆ ಬರಲಿದೆ. ಚಿತ್ರದ ಟ್ರೇಲರ್‌ ಹಾಗೂ ಹಾಡುಗಳನ್ನು ನಿರ್ದೇಶಕ, ನಟ ಪ್ರೇಮ್‌ (ಜೋಗಿ) ಬಿಡುಗಡೆ ಮಾಡಿದ್ದಾರೆ.

ಯೂಟ್ಯೂಬ್‌ನಲ್ಲಿ ಬಿಡುಗಡೆಯಾದ ಮೂರು ದಿನಗಳಲ್ಲಿ ಚಿತ್ರದ ಟ್ರೇಲರ್‌ ಹಾಗೂ ಹಾಡುಗಳನ್ನು ಮೂರು ಲಕ್ಷಕ್ಕೂ ಅಧಿಕ ಜನ ವೀಕ್ಷಿಸಿದ್ದಾರೆ ಹಾಗೂ ರವಿಶಂಕರ್‌, ಚಿಕ್ಕಣ್ಣ  ಸೇರಿದಂತೆ ಅನೇಕ ಕಲಾವಿದರು ಚಿತ್ರದ ಟ್ರೇಲರ್‌ ಹಾಗೂ ಹಾಡುಗಳನ್ನು ವೀಕ್ಷಿಸಿ ಶುಭ ಕೋರಿದ್ದಾರೆ.  

ಅರ್ಜುನ್‌ ಆರ್ಯ ಕಥೆ ಬರೆದಿರುವ ಈ ಚಿತ್ರವನ್ನು ಗಣೇಶ್‌ ವಿನಾಯಕ್‌ ನಿರ್ದೇಶಿಸಿದ್ದಾರೆ. ತಮಿಳಿನಲ್ಲಿ ಮೂರು ಚಿತ್ರಗಳನ್ನು ನಿರ್ದೇಶಿಸಿರುವ ಗಣೇಶ್‌ ಅವರಿಗೆ ಕನ್ನಡದಲ್ಲಿ ಇದು ಮೊದಲ ಚಿತ್ರ. “ಕಾಲೇಜ್‌ ಲವ್‌ಸ್ಟೋರಿ’ ಹಾಗೂ ಅಪ್ಪ-ಮಗಳ ಭಾಂಧವ್ಯದ ಕಥಾ ಹಂದರ ಹೊಂದಿರುವ ಈ ಚಿತ್ರದಲ್ಲಿ ಐದು ಹಾಡುಗಳಿದ್ದು, ಇಮ್ಮಾನ್‌.ಡಿ ಹಾಗೂ ಎಲ್ವಿನ್‌ ಸಂಗೀತ ನೀಡಿದ್ದಾರೆ.

ಶಕ್ತಿವೇಲ್‌ ಅವರ ಛಾಯಾಗ್ರಹಣ, ರುಬಾನ್‌ ಸಂಕಲನ, ಥ್ರಿಲ್ಲರ್‌ ಮಂಜು, ಮಾಸ್‌ ಮಾದ, ವಿಕ್ರಂ, ಹೈಪರ್‌ ಸೂರಿ ಸಾಹಸ ನಿರ್ದೇಶನ, ಕ‌ಲೈ ನೃತ್ಯ ನಿರ್ದೇಶನ ಹಾಗೂ ಕನಕ ಅವರ ಕಲಾ ನಿರ್ದೇಶನವಿರುವ ಈ ಚಿತ್ರದ ಹಾಡುಗಳನ್ನು ಎ.ಪಿ.ಅರ್ಜುನ್‌, ಬಹದ್ದೂರ್‌ ಚೇತನ್‌, ದಿಲ್‌ವಾಲ ಅನಿಲ್‌ ಹಾಗೂ ಗೌಸ್‌ಫಿ‚ರ್‌ ಬರೆದಿದ್ದಾರೆ.  

ಅರ್ಜುನ್‌ ಆರ್ಯ, ಶೀಲ, ರಂಗಾಯಣ ರಘು, ಶೋಭ್‌ರಾಜ್‌, ಬುಲೆಟ್‌ ಪ್ರಕಾಶ್‌, ಅಚ್ಯುತಕುಮಾರ್‌, ಶ್ರೀನಿವಾಸಪ್ರಭು, ಬ್ಯಾಂಕ್‌ ಜನಾರ್ದನ್‌, ವೀಣಾಸುಂದರ್‌, ಲಕ್ಷಿಸಿದ್ದಯ್ಯ, ಉಮೇಶ್‌ ಪುಂಗ ಮುಂತಾದವರು ಈ ಚಿತ್ರದ ತಾರಾಬಳಗದಲ್ಲಿದ್ದಾರೆ.