ಬೆಂಗಳೂರಿನಲ್ಲಿ ಅಂ.ರಾ.ಬಾಸ್ಕೆಟ್‌ಬಾಲ್‌ ಕ್ರೀಡಾಂಗಣ ಲೋಕಾರ್ಪಣೆ

Team Udayavani, Mar 4, 2018, 6:30 AM IST

ಬೆಂಗಳೂರು: ಉದ್ಯಾನನಗರಿ ಮಲ್ಲೇಶ್ವರಂನಲ್ಲಿ ಬಿಬಿಎಂಪಿ ವತಿಯಿಂದ ನಿರ್ಮಿಸಿರುವ ಅಂತಾರಾಷ್ಟ್ರೀಯ ಗುಣಮಟ್ಟದ ಸುಸಜ್ಜಿತ ಬಾಸ್ಕೆಟ್‌ಬಾಲ್‌ ಒಳಾಂಗಣ ಕ್ರೀಡಾಂಗಣವನ್ನು ಶನಿವಾರ ಲೋಕಾರ್ಪಣೆಗೊಳಿಸಲಾಯಿತು.

ಕ್ರೀಡಾಂಗಣದ ವಿಶೇಷತೆ ಏನು?: ಅರಮನೆ ವಾರ್ಡ್‌ ವ್ಯಾಪ್ತಿಯಲ್ಲಿ ಸುಮಾರು 9.21 ಕೋಟಿ ರೂ. ವೆಚ್ಚದಲ್ಲಿ ನಿರ್ಮಿಸಲಾಗಿದೆ. ಈ ಒಳಾಂಗಣ ಒಟ್ಟು  1874 ಚದರ ಮೀ. ವಿಸ್ತೀರ್ಣ ಹೊಂದಿದೆ. ಕ್ರೀಡಾಂಗಣದ ಬೇಸ್‌ಮೆಂಟ್‌ ಫ್ಲೋರ್‌ 920.80 ಚದರ ಮೀ. ಇದೆ. ನೆಲಮಹಡಿ 1320 ಚದರ ಮೀ. ಇದೆ.  

ಕ್ರೀಡಾಂಗಣದ ಮೇಲ್ಛಾವಣಿಗೆ ಕಾಲ್‌ಜಿಪ್‌ ರೂಫ್ ಅಳವಡಿಸಲಾಗಿದೆ, ಇದು ವಾಟರ್‌ ಪ್ರೂಫ್ ಆಗಿರುವುದು ವಿಶೇಷತೆ. ಬೇಸ್‌ಮೆಂಟ್‌ ಫ್ಲೋರ್‌ನಲ್ಲಿ ಆಟಗಾರರಿಗೆ ವಾರ್ಮ್ಅಪ್‌ ಆಗಲು ಜಾಗಿಂಗ್‌ ಟ್ರ್ಯಾಕ್‌, ಜಿಮ್‌ ಅಳವಡಿಕೆಗೆ ಸ್ಥಳಾವಕಾಶ, ಬಟ್ಟೆ ಬದಲಿಸುವ ಸ್ಥಳ ಮತ್ತು ಶೌಚಾಲಯವಿದೆ. ನೆಲಮಹಡಿಯಲ್ಲಿ ಬಾಸ್ಕೆಟ್‌ಬಾಲ್‌ ಕ್ರೀಡಾಂಗಣವಿದ್ದು, ಅಂತಾರಾಷ್ಟ್ರೀಯ ಮಟ್ಟದ ಪಂದ್ಯಗಳನ್ನು ನಡೆಸುವ ಗುಣಮಟ್ಟ ಹೊಂದಿದೆ. ಏಕಕಾಲದಲ್ಲಿ 800 ಪ್ರೇಕ್ಷಕರು ಕುಳಿತು ಪಂದ್ಯ ವೀಕ್ಷಿಸಬಹುದು.