ಪಾಕ್‌ ಮೇಲ್ಮನೆಗೆ ಹಿಂದೂ ಮಹಿಳೆ

Team Udayavani, Mar 5, 2018, 10:55 AM IST

ಕರಾಚಿ: ಪಾಕಿಸ್ಥಾನದಲ್ಲಿ ಇದೇ ಮೊದಲ ಬಾರಿಗೆ ಅಲ್ಲಿನ ಸಂಸತ್‌ನ ಮೇಲ್ಮನೆ (ಸೆನೆಟ್‌)ಗೆ ೆ ಹಿಂದೂ ದಲಿತ ಮಹಿಳೆ ಕೃಷ್ಣಾ ಕುಮಾರಿ ಕೊಲ್ಹಿ ಆಯ್ಕೆಯಾಗಿದ್ದಾರೆ. ಸಿಂಧ್‌ ಪ್ರಾಂತ್ಯದಿಂದ ಕೃಷ್ಣಾಕುಮಾರಿ ಆಯ್ಕೆಯಾಗಿದ್ದು, ಇವರು ಭಿಲಾವಲ್‌ ಭುಟ್ಟೋ ನೇತೃತ್ವದ ಪಾಕಿಸ್ಥಾನ್‌ ಪೀಪಲ್ಸ್‌ ಪಾರ್ಟಿ(ಪಿಪಿಪಿ) ಸದಸ್ಯೆಯಾಗಿದ್ದಾರೆ.

ಪಾಕಿಸ್ಥಾನದಲ್ಲಿ ಮಹಿಳೆ ಮತ್ತು ಅಲ್ಪಸಂಖ್ಯಾಕರ ಹಕ್ಕುಗಳ ನಿಟ್ಟಿನಲ್ಲಿ ಇದೊಂದು ಮಹತ್ವದ ಮೈಲುಗಲ್ಲು ಎಂದು ಹೇಳಲಾಗಿದೆ. ಈ ಹಿಂದೆ ರತ್ನಾ ಭಗವಾನ್‌ದಾಸ್‌ ಚಾವ್ಲಾ ಮೊದಲ ಮಹಿಳಾ ಸಂಸದೆಯಾಗಿ ಪಿಪಿಪಿಯಿಂದ ಆಯ್ಕೆಯಾಗಿದ್ದರು.

ಸಿಂಧ್‌ ಭಾಗದ ಥಾರ್‌ನಲ್ಲಿನ ಕುಗ್ರಾಮ ನಾಗರ್‌ಪರ್ಕರ್‌ನವರು ಕೊಲ್ಹಿ. ಈಕೆ ಮೂರನೇ ತರಗತಿಯ ಲ್ಲಿದ್ದಾಗ ಇವರ ಕುಟುಂಬವನ್ನು ಗ್ರಾಮದ ಭೂಮಾಲಕರು ಅಪಹರಿ ಸಿದ್ದರು. ಸುಮಾರು ಮೂರು ವರ್ಷ ಗಳವರೆಗೆ ಇವರ ಕುಟುಂಬ ಕಗ್ಗತ್ತಲ ಕೋಣೆಯಲ್ಲಿ ಕಳೆದಿತ್ತು. 9ನೇ ತರಗತಿಯಲ್ಲಿ ಓದುತ್ತಿದ್ದಾಗ,16ನೇ ವಯಸ್ಸಿಗೇ ವಿವಾಹವಾದರೂ ಕೃಷ್ಣಾಕುಮಾರಿ ಅಧ್ಯಯನ ಮುಂದುವರಿಸಿದರು. 2013ರಲ್ಲಿ ಈಕೆ ಸಿಂಧ್‌ ವಿವಿಯಲ್ಲಿ ಸಮಾಜಶಾಸ್ತ್ರದಲ್ಲಿ ಸ್ನಾತಕೋತ್ತರ ಪದವಿಯನ್ನು ಪಡೆದಿದ್ದಾರೆ.