ಅಜ್ಲಾನ್‌ ಶಾ ಹಾಕಿ: ಮಲೇಷ್ಯಾವನ್ನು ಮಣಿಸಿದ ಭಾರತ

Team Udayavani, Mar 8, 2018, 6:05 AM IST

ಇಪೋ: ಸುಲ್ತಾನ್‌ ಅಜ್ಲಾನ್‌ ಷಾ ಹಾಕಿ ಪಂದ್ಯಾವಳಿಯಲ್ಲಿ ಸರ್ದಾರ್‌ ಸಿಂಗ್‌ ಸಾರಥ್ಯದ ಭಾರತ ಕೊನೆಗೂ ಗೆಲುವಿನ ಖಾತೆ ತೆರೆದಿದೆ. ಬುಧವಾರದ ಲೀಗ್‌ ಪಂದ್ಯದಲ್ಲಿ ಆತಿಥೇಯ ಮಲೇಷ್ಯಾವನ್ನು 5-1 ಗೋಲುಗಳ ಅಂತರದಿಂದ ಮಣಿಸಿದೆ.

ಭಾರತದ ಪರ ಶೈಲಾನಂದ ಲಾಕ್ರ 10ನೇ ನಿಮಿಷದಲ್ಲಿ ಗೋಲಿನ ಖಾತೆ ತೆರೆದರು. 33ನೇ ನಿಮಿಷದ ತನಕ ಭಾರತ ಈ ಮುನ್ನಡೆ ಕಾಯ್ದುಕೊಂಡಿತ್ತು. ಆಗ ಮಲೇಶ್ಯದ ಫೈಜಲ್‌ ಸಾರಿ ಗೋಲೊಂದನ್ನು ಸಿಡಿಸಿ ಪಂದ್ಯವನ್ನು ಸಮಬಲಕ್ಕೆ ತಂದರು. ಇಲ್ಲಿಂದ ಮುಂದೆ ಭಾರತವನ್ನು ತಡೆಯುವುದೇ ಮಲೇಷ್ಯಾಕ್ಕೆ ದೊಡ್ಡ ಸಮಸ್ಯೆಯಾಗಿ ಕಾಡಿತು. ಗುರ್ಜಂತ್‌ ಸಿಂಗ್‌ 2, ಸುಮಿತ್‌ ಕುಮಾರ್‌ ಮತ್ತು ರಮಣ್‌ದೀಪ್‌ ಸಿಂಗ್‌ ಒಂದೊಂದು ಗೋಲು ಬಾರಿಸಿ ಭಾರತದ ದೊಡ್ಡ ಗೆಲುವನ್ನು ಸಾರಿದರು. ಇದಕ್ಕೂ ಮುನ್ನ ಆರ್ಜೆಂಟೀನಾ ಮತ್ತು ಆಸ್ಟ್ರೇಲಿಯಾ ವಿರುದ್ಧ ಸೋಲನುಭವಿಸಿದ್ದ ಭಾರತ, ಇಂಗ್ಲೆಂಡ್‌ ವಿರುದ್ಧ ಡ್ರಾ ಸಾಧಿಸಿತ್ತು. ಭಾರತ ತನ್ನ ಕೊನೆಯ ಲೀಗ್‌ ಪಂದ್ಯವನ್ನು ಶುಕ್ರವಾರ ಐರೆಲಂಡ್‌ ವಿರುದ್ಧ ಆಡಲಿದೆ.