ಪರೀಕ್ಷೆಗಳಿಗೆ ಆಧಾರ್‌ ಕಡ್ಡಾಯ ಬೇಡ: ಸಿಬಿಎಸ್‌ಇಗೆ ಸುಪ್ರೀಂ ಸೂಚನೆ

Team Udayavani, Mar 8, 2018, 7:30 AM IST

ನವದೆಹಲಿ: ವೈದ್ಯಕೀಯ ಕೋರ್ಸ್‌ಗಾಗಿನ ರಾಷ್ಟ್ರೀಯ ಅರ್ಹತೆ ಮತ್ತು ಪ್ರವೇಶ ಪರೀಕ್ಷೆ (ನೀಟ್‌) ಸೇರಿದಂತೆ ಎಲ್ಲಾ ಅಖೀಲ ಭಾರತ ಮಟ್ಟದ ಪ್ರವೇಶ ಪರೀಕ್ಷೆಗಾಗಿ ಆಧಾರ್‌ ಕಡ್ಡಾಯ ಗುರುತು ಚೀಟಿಯಾಗಿ ಮಾಡಬಾರದು ಎಂದು ಕೇಂದ್ರೀಯ ಮಾಧ್ಯಮಿಕ ಶಿಕ್ಷಣ ಮಂಡಳಿ (ಸಿಬಿಎಸ್‌ಇ)ಗೆ ಸುಪ್ರೀಂಕೋರ್ಟ್‌ ಸೂಚಿಸಿದೆ. ಪಾಸ್‌ಪೋರ್ಟ್‌, ಡ್ರೈವಿಂಗ್‌ ಲೈಸನ್ಸ್‌, ಬ್ಯಾಂಕ್‌ ಪಾಸ್‌ಪುಸ್ತಕ, ಮತದಾರರ ಗುರುತಿನ ಚೀಟಿಗಳನ್ನು ಗುರುತಿನ ಚೀಟಿಯನ್ನಾಗಿ ಅಂಗೀಕರಿಸುವಂತೆ ಸೂಚನೆ ನೀಡಿದೆ. ಮುಖ್ಯ ನ್ಯಾಯಮೂರ್ತಿ ದೀಪಕ್‌ ಮಿಶ್ರಾ ನೇತೃತ್ವದ ಸಾಂವಿಧಾನಿಕ ಪೀಠ ಬುಧವಾರ ಈ ಆದೇಶ ನೀಡಿದೆ. ನೀಟ್‌ಗೆ ಆಧಾರ್‌ ಕಡ್ಡಾಯ ಎಂದು ಸಿಬಿಎಸ್‌ಇ ಹೇಳಿದ್ದನ್ನು ಪ್ರಶ್ನಿಸಿ ಗುಜರಾತ್‌ ಹೈಕೋರ್ಟಲ್ಲಿ ಮೇಲ್ಮನವಿ ಸಲ್ಲಿಸಲಾಗಿತ್ತು. 

ಶೀಘ್ರ ಸೂಕ್ತ ಆದೇಶ: ಇದೇ ವೇಳೆ, ಬ್ಯಾಂಕ್‌ ಖಾತೆ, ತೆರಿಗೆ, ವಿಮೆ ಮುಂತಾದ ಸೌಲಭ್ಯಗಳಿಗೆ ಆಧಾರ್‌ ಸಂಖ್ಯೆ ಜೋಡಣೆಗೆ ಇರುವ ಮಾ. 31ರ ಗಡುವನ್ನು ವಿಸ್ತರಿಸುವ ಕುರಿತಂತೆ ಸದ್ಯದಲ್ಲೇ ಸೂಕ್ತ ಆದೇಶ ನೀಡುವುದಾಗಿ ಮುಖ್ಯ ನ್ಯಾ. ದೀಪಕ್‌ ಮಿಶ್ರಾ ನೇತೃತ್ವದ ಪೀಠ‌ ಆಶ್ವಾಸನೆ ನೀಡಿದೆ. ಗಡುವು ಮುಕ್ತಾಯವಾಗಲು ಒಂದೆರಡು ದಿನಗಳಿದ್ದಾಗ ಆದೇಶ ನೀಡಿದರೆ ತೊಂದರೆ ಉಂಟಾಗುತ್ತದೆ . ಹೀಗಾಗಿ ಮುಂಚಿತವಾಗಿಯೇ ತೀರ್ಪು ನೀಡುವುದಾಗಿ ಅಭಿಪ್ರಾಯಪಟ್ಟಿರುವ ನ್ಯಾಯಪೀಠ, ಕೆಲವೇ ದಿನಗಳಲ್ಲಿ ಈ ಬಗ್ಗೆ ತೀರ್ಪು ನೀಡುವುದಾಗಿ ತಿಳಿಸಿದೆ.