ಖಾದಿ ಉತ್ಪಾದನೆ ಶೇ.32 ಹೆಚ್ಚಳ

Team Udayavani, Mar 12, 2018, 9:20 AM IST

ಹೊಸದಿಲ್ಲಿ: ಕಳೆದ ಎರಡು ವಿತ್ತೀಯ ವರ್ಷಗಳಲ್ಲಿ ದೇಶದ ಖಾದಿ ಉತ್ಪಾದನೆ ಶೇ.31.6ರಷ್ಟು ಹೆಚ್ಚಳವಾಗಿದ್ದು, ಮಾರಾಟ ಪ್ರಮಾಣವೂ ಶೇ.33ರಷ್ಟು ಏರಿಕೆಯಾಗಿದೆ. ಹೀಗೆಂದು ಸೂಕ್ಷ್ಮ, ಸಣ್ಣ ಮತ್ತು ಮಧ್ಯಮ ಕೈಗಾರಿಕಾ ಸಚಿವಾಲಯ ಮಾಹಿತಿ ನೀಡಿದೆ.

2015-16 ಮತ್ತು 2016-17ರ ಅವಧಿಯಲ್ಲಿ ಖಾದಿ ಉತ್ಪಾದನೆ ಹೆಚ್ಚಾಗಿರುವ ಕುರಿತು ಇತ್ತೀಚೆಗಷ್ಟೇ ಲೋಕಸಭೆಗೆ ಸಚಿವಾಲಯ ತಿಳಿಸಿದೆ. ಆದರೆ, ಈ ಅವಧಿಯಲ್ಲಿ ಖಾದಿ ಕ್ಷೇತ್ರದಲ್ಲಿ ಬರೋಬ್ಬರಿ 7 ಲಕ್ಷ ಉದ್ಯೋಗ ನಷ್ಟ ಉಂಟಾಗಿರುವ ಕುರಿತೂ ಉಲ್ಲೇಖೀಸ ಲಾಗಿದೆ. 2015-16ರಲ್ಲಿ 11.6 ಲಕ್ಷವಿದ್ದ ಕಾರ್ಮಿಕರ ಸಂಖ್ಯೆ 2016-17ರ ಅವಧಿ ವೇಳೆಗೆ 4.6 ಲಕ್ಷಕ್ಕಿಳಿದಿದೆ. ಈ ಪ್ರಮಾಣದಲ್ಲಿ ಉದ್ಯೋಗ ನಷ್ಟಕ್ಕೆ ನಿಖರ ಕಾರಣವೇನು ಎಂದು ಖಾದಿ ಮತ್ತು ಗ್ರಾಮೋದ್ಯೋಗ ಆಯೋಗ (ಕೆವಿಐಸಿ) ತಿಳಿಸಿಲ್ಲ. ಆದರೆ, ಹೊಸ ಮಾದರಿಯ ಚರಕಗಳು ಸಾಂಪ್ರ ದಾಯಿಕ ಕದಿರಣಿಗೆಯ ಸ್ಥಾನವನ್ನು ಆಕ್ರಮಿಸಿಕೊಂಡಿರುವುದೂ ಇದಕ್ಕೆ ಕಾರಣ ವಿರಬಹುದು ಎಂದು ಅಂದಾಜಿಸಲಾಗಿದೆ.