ಮುಂಬಯಿ ಶೇರು 300 ಅಂಕಗಳ ಭರ್ಜರಿ ಮುನ್ನಡೆ

Team Udayavani, Mar 12, 2018, 10:53 AM IST

ಮುಂಬಯಿ : ಹಣದುಬ್ಬರ ಮತ್ತು ಕೈಗಾರಿಕಾ ಉತ್ಪಾದನೆಯ ಅಂಕಿ ಅಂಶಗಳನ್ನು ಸರಕಾರ ಇಂದು ಸಂಜೆ ಬಿಡುಗಡೆ ಮಾಡಲಿದ್ದು ಅದಕ್ಕೆ ಮುನ್ನವೇ ಆಶಾವಾದಿ ಭಾವನೆ ತಳೆದಿರುವ ಮುಂಬಯಿ ಶೇರು ಪೇಟೆ ಇಂದು ಸೋಮವಾರದ ಆರಂಭಿಕ ವಹಿವಾಟಿನಲ್ಲಿ 300 ಅಂಕಗಳ ಭರ್ಜರಿ ಜಿಗಿತವನ್ನು ದಾಖಲಿಸಿತು. 

ಅಮೆರಿಕದಲ್ಲಿನ ಉದೋಗ ಸೃಷ್ಟಿ ಅಂಕಿ ಅಂಶಗಳು ನಿರೀಕ್ಷೆಗಿಂತ ಉತ್ತಮ ವಿರುವ ಕಾರಣ ಅಲ್ಲಿನ ಶೇರುಪೇಟೆ ಉತ್ತಮ ಜಿಗಿತ ಸಾಧಿಸಿದ್ದು  ಅದನ್ನು ಅನುಸರಿಸಿ ಇಂದು ಬೆಳಗ್ಗೆ  ಏಶ್ಯನ್‌ ಶೇರುಪೇಟೆಗಳು ಕೂಡ ಮುನ್ನಡೆ ಸಾಧಿಸಿದವು. 

ಬೆಳಗ್ಗೆ 10.30ರ ಹೊತ್ತಿಗೆ ಸೆನ್ಸೆಕ್ಸ್‌ 334.31 ಅಂಕಗಳ ಮುನ್ನಡೆಯೊಂದಿಗೆ 33,364.45 ಅಂಕಗಳ ಮಟ್ಟದಲ್ಲೂ ರಾಷ್ಟ್ರೀಯ ಶೇರು ಮಾರುಕಟ್ಟೆಯ ನಿಫ್ಟಿ ಸೂಚ್ಯಂಕ 103 ಅಂಕಗಳ ಮುನ್ನಡೆಯೊಂದಿಗೆ 10,329.90 ಅಂಕಗಳ ಮಟ್ಟದಲ್ಲೂ ಕಾರ್ಯನಿರತವಾಗಿದ್ದವು. 

ಟಾಟಾ ಸ್ಟೀಲ್‌, ಐಟಿಸಿ, ಭಾರ್ತಿ ಇನ್‌ಫ್ರಾಟೆಲ್‌, ಎಚ್‌ ಡಿ ಎಫ್ ಸಿ, ಎಸ್‌ಬಿಐ ಶೇರುಗಳು ಇಂದು ಬೆಳಗ್ಗಿನ ವಹಿವಾಟಿನಲ್ಲಿ ಅತ್ಯಂತ ಚುರುಕಾಗಿದ್ದವು. 

ಇದಕ್ಕೆ ಪೂರಕವಾಗಿ ಇಂದಿನ ಆರಂಭಿಕ ವಹಿವಾಟಿನಲ್ಲಿ ಡಾಲರ್‌ ಎದುರು ರೂಪಾಯಿ 23 ಪೈಸೆ ಚೇತರಿಸಿ 64.94 ರೂ. ಮಟ್ಟದಲ್ಲಿ ದಾಖಲಾಗಿತ್ತು.