ಥ್ರಿಲ್ಲರ್ ಕಥೆಗಳು

Team Udayavani, Mar 13, 2018, 11:05 AM IST

ಈ ಕಥೆಗಳನ್ನು ಓದುತ್ತಿದ್ದಂತೆಯೇ ನಿಮಗೆ ಭಯವಾದರೆ, ಮೈ ಜುಂ ಅಂದರೆ ನಾವದಕ್ಕೆ ಜವಾಬ್ದಾರರಲ್ಲ!

1. ಕೊಟ್ಟಿರುವ ಕೆಲಸ ಪೂರ್ಣ ಮಾಡಲಾಗದೇ ಒಂದು ವಾರದಿಂದ ಬಾಸ್‌ನಿಂದ ಬೈಸಿಕೊಂಡಿದ್ದ ಸಾಫ್ಟ್ವೇರ್‌ ಕಂಪನಿಯ ಉದ್ಯೋಗಿಯೊಬ್ಬ, “ಇವತ್ತು ರಾತ್ರಿ ಎಷ್ಟೊತ್ತಾದರೂ ಸರಿ ಇಲ್ಲೇ ಇದ್ದು ಕೆಲಸ ಮುಗಿಸುತ್ತೇನೆ’ ಎಂದು ಕಂಪನಿಯಲ್ಲೇ ಉಳಿದುಕೊಂಡ. ಎಷ್ಟು ಹೊತ್ತಾದರೂ ಕೆಲಸ ಮುಗಿಯಲೇ ಇಲ್ಲ. ಹಾಗೇ ನಿದ್ದೆಗೆ ಜಾರಿದ. ಸರಿ, ರಾತ್ರಿಯಲ್ಲಿ ಕಂಪ್ಯೂಟರ್‌ ಕೀಬೋರ್ಡ್‌ನಲ್ಲಿ ಟೈಪಿಸುತ್ತಿರುವ ಶಬ್ದ ಕೇಳುತ್ತಿತ್ತು. ಎದ್ದು ನೋಡಿದರೆ ಅಲ್ಲಿ ಯಾರೂ ಇರಲಿಲ್ಲ. ಏನಿದು ವಿಚಿತ್ರ ಅಂತ ಯೋಚಿಸುತ್ತಿದ್ದಾಗಲೇ, “ಈ ಬಾಸ್‌ನ ಕಿರುಕುಳ ತಾಳದೇ ವರ್ಷದ ಹಿಂದೆ ಆತ್ಮಹತ್ಯೆ ಮಾಡಿಕೊಂಡ ನತದೃಷ್ಟ ನಾನು’ ಎಂಬ ಅಶರೀರವಾಣಿಯು ಅವನ ಕಿವಿಗೆ ಬಿತ್ತು. ಅವನು ಕುಂತಲ್ಲೇ ಮೂಛೆì ಹೋದ.

2. ಹೆಂಡತಿಯ ಮೇಲೆ ಅನುಮಾನಪಡುತ್ತಿದ್ದ ಅವನು ತನ್ನ ಮನೆಯ ಪ್ರತಿ ಕೋಣೆಗೂ ಸಿಸಿ ಕ್ಯಾಮೆರಾ ಹಾಕಿಸಿದ್ದ. ಅದನ್ನು ಆಫೀಸ್‌ನಿಂದಲೇ ನೋಡುತ್ತಿದ್ದ. ಒಮ್ಮೆ ಹೆಂಡತಿ ಯಾರೊಂದಿಗೋ ಮಾತಾಡುತ್ತಿದ್ದುದನ್ನು ಗಮನಿಸಿದ. ಆದರೆ, ಅವಳ ಮುಂದೆ ಯಾರೂ ಕಾಣುತ್ತಿರಲಿಲ್ಲ. ಮನೆಗೆ ಬಂದು ಈ ಬಗ್ಗೆ ಕೇಳಿದಾಗ, ಹೆಂಡತಿ “ರೀ, ನಾನು ಪಕ್ಕದ ಮನೆಯಲ್ಲಿ ಇದಾಳಲ್ಲ ಚಿಕ್ಕಹುಡುಗಿ ಪೂಜಾ; ಅವಳ ಜೊತೆ ದಿನಾ ಮಾತಾಡ್ತೀನಿ’ ಎಂದಳು. ಗಂಡ ಒಂದು ಕ್ಷಣ ಬೆಚ್ಚಿಬಿದ್ದು ಹೇಳಿದ, “ನೀನು ಕಳೆದವಾರ ತವರುಮನೆಗೆ ಹೋದಾಗ ಆ ಹುಡುಗಿ ಆ್ಯಕ್ಸಿಡೆಂಟ್‌ ಆಗಿ ಸತ್ತು ಹೋದಳು ಕಣೇ!’ ಈಗ ಬೆಚ್ಚಿಬೀಳುವ ಸರದಿ ಹೆಂಡತಿಯದ್ದಾಗಿತ್ತು.

– ಪುರುಷೋತ್ತಮ್‌ ವೆಂಕಿ