ರೌಡಿಶೀಟರ್‌ ಮೇಲೆ ಗುಂಡಿನ ದಾಳಿ

Team Udayavani, Mar 13, 2018, 3:07 PM IST

ವಿಜಯಪುರ: ಜಿಲ್ಲೆಯಲ್ಲಿ ರೌಡಿಗಳ ಹೆಡೆಮುರಿ ಕಟ್ಟುವ ಕಾರ್ಯಾಚರಣೆ ಮತ್ತಷ್ಟು ಚುರುಕುಗೊಂಡಿದ್ದು, ಕಳೆದ 35
ಗಂಟೆಯಲ್ಲಿ ಜಿಲ್ಲೆಯಲ್ಲಿ ಮತ್ತೂಬ್ಬ ರೌಡಿ ಮೇಲೆ ಪೊಲೀಸರು ಆತ್ಮರಕ್ಷಣೆಗೆ ಗುಂಡು ಹಾರಿಸಿ ಗಾಯಗೊಳಿಸಿ ಬಂಧಿಸಿರುವ ಘಟನೆ ಸೋಮವಾರ ನಸುಕಿನಲ್ಲಿ ಜರುಗಿದೆ.

ವಿಜಯಪುರ ಜಿಲ್ಲೆಯಲ್ಲಿ ಅಕ್ರಮ ಚಟುವಟಿಕೆಗಳಿಗೆ ಕಡಿವಾಣ ಹಾಕುವ ಭಾಗವಾಗಿ ನಗರದ ಗಾಂಧಿ ಚೌಕ್‌ ಠಾಣೆ
ಪೊಲೀಸರು ಕೊಲೆ ಯತ್ನ ಸೇರಿದಂತೆ ಹಲವು ಪ್ರಕರಣಗಳಲ್ಲಿ ಬೇಕಾಗಿದ್ದ ನಗರದ ನವಬಾಗ ಸಂದಲಬಾವಡಿ ನಿವಾಸಿ ರೌಡಿ ಶೀಟರ್‌ ಯೂನಿಸ್‌ ಆಕ್ಲಾಸ್‌ ಪಟೇಲ್‌ (25) ಪೊಲೀಸರ ಗುಂಡೇಟಿನಿಂದ ಗಾಯಗೊಂಡ ಆರೋಪಿ. ಆರೋಪಿ ಬಂಧನಕ್ಕಾಗಿ ಸೋಮವಾರ ಬೆಳಗ್ಗೆ 4ರ ಸುಮಾರಿಗೆ ಖಚಿತ ಮಾಹಿತಿ ಮೇರೆಗೆ ಯೂನಿಸ್‌ ಅಡಗಿದ್ದ ಸ್ಥಳದ ಮೇಲೆ ಪೊಲೀಸರು ದಾಳಿ ನಡೆಸಿದ್ದಾರೆ. ಈ ವೇಳೆ ಪೊಲೀಸ ರಿಂದ ತಪ್ಪಿಸಿಕೊಳ್ಳಲು ಆರೋಪಿಯು ಪಿಎಸ್‌ಐ ಆರೀಫ್‌ ಮುಶಾಪುರಿ, ಪೇದೆ ಎಂ.ಎ. ಮಾದನಶಟ್ಟಿ ಮೇಲೆ ಚಾಕುವಿನಿಂದ ದಾಳಿ ನಡೆಸಿ ಗಾಯಗೊಳಿಸಿದ್ದಾನೆ.

ಚಾಕುವಿನಿಂದ ಇರಿದಿದ್ದು ಅಲ್ಲದೇ ಗಾಜಿನ ಬಾಟಲಿಗಳು ಹಾಗೂ ಕಲ್ಲುಗಳನ್ನು ತೂರಿ ಪರಾರಿಗೆ ಯತ್ನಿಸಿದ್ದು, ಈ ಹಂತದಲ್ಲಿ ಪೊಲೀಸರು ಎಚ್ಚರಿಕೆ ನೀಡಿದರೂ ನಿರ್ಲಕ್ಷಿಸಿ ತನ್ನ ದಾಳಿ ಮುಂದುವರಿಸಿದ್ದಾನೆ. ಈ ಹಂತದಲ್ಲಿ ಎಸೈ ಆರೀಫ್‌ ಅವರು ಆತ್ಮರಕ್ಷಣೆಗಾಗಿ ಒಂದು ಸುತ್ತು ಗಾಳಿಯಲ್ಲಿ ಗುಂಡು ಹಾರಿಸಿದ್ದರೆ, ಆರೋಪಿಗೆ ಹಾರಿಸಿದ ಇನ್ನೆರಡು ಗುಂಡುಗಳಲ್ಲಿ ಒಂದು ಆತನ ಕಾಲಿಗೆ ತಗುಲಿ ಗಾಯಗೊಂಡಿದ್ದಾನೆ. ಮತ್ತೂಂಡು ಗುಂಡು ಗುರಿ ತಪ್ಪಿದೆ.
 
ಗುಂಟೇನಿಂದ ಆರೋಪಿ ಕಾಲಿಗೆ ಗಾಯವಾಗಿದ್ದರೆ, ಆರೋಪಿ ಚಾಕು ಇರಿತದಿಂದ ಎಸೈ ಆರೀಫ್‌ ಹಾಗೂ ಪೇದೆ ಎಂ.ಎ. ಮಾದನಶಟ್ಟಿ ಅವರು ಗಾಯಗೊಂಡಿದ್ದು ಕೂಡಲೇ ಗಾಯಾಳುಗಳನ್ನೆಲ್ಲ ಬಿಎಲ್‌ಡಿಇ ಬಿ.ಎಂ. ಪಾಟೀಲ ವೈದ್ಯಕೀಯ ಕಾಲೇಜಿನ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಬಂಧಿ ತ ಆರೋಪಿ ಮನೆಯಿಂದ 600 ಗ್ರಾಂ ಗಾಂಜಾ ಹಾಗೂ ಒಂದು ಹರಿತವಾದ ತಲವಾರ ವಶಕ್ಕೆ ಪಡೆದಿರುವ ಗಾಂಧಿ ಚೌಕ್‌ ಠಾಣೆ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ. 

ಯಾರು ಈ ಯೂನಿಸ್‌?
ನಗರದ ನವಬಾಗ ನಿವಾಸಿಯಾಗಿರುವ ಯೂನಿಸ್‌ 2016, ಮೇ 29 ರಂದು ನಗರದ ಹೃದಯ ಭಾಗದಲ್ಲಿ ವ್ಯಕ್ತಿಯೊಬ್ಬನನ್ನು ಕಲ್ಲಿನಿಂದ ಜಜ್ಜಿ ಕೊಲೆ ಮಾಡಿದ್ದಾನೆ. ಮತ್ತೂಂದೆಡೆ ಗಾಂಜಾ ಮತ್ತಿನಲ್ಲಿ ಇಟ್ಟಂಗಿಹಾಳದ ಶ್ರೀಶೈಲ ಹಟ್ಟಿ ಎಂಬುವರನ್ನು ಕಲ್ಲು ಜಜ್ಜಿ ಕೊಲೆ ಮಾಡಿದ್ದಾನೆ ಎಂಬ ಆರೋಪ ಸೇರಿ ವಿವಿಧ ಕೊಲೆ ಯತ್ನ ಪ್ರಕರಣಗಳಲ್ಲಿ ಭಾಗಿಯಾಗಿರುವ ಆರೋಪ ಎದುರಿಸುತ್ತಿದ್ದಾನೆ. ಈ ಹಿನ್ನೆಲೆಯಲ್ಲಿ ಸೋಮವಾರ ಆರೋಪಿ ಬಂಧನಕ್ಕೆ ಮುಂದಾದಾಗ ಪೊಲೀಸರ ಮೇಲೆ ದಾಳಿಗೆ ಮುಂದಾಗಿ ಗುಂಡೇಟು ತಿಂದು ಪೊಲೀಸರಿಗೆ ಸೆರೆಯಾಗಿದ್ದಾನೆ. ಪ್ರಕರಣಕ್ಕೆ ಸಂಬಂಧಿಸಿದಂತೆ ಗಾಂಧಿಚೌಕ್‌ ಠಾಣೆಯಲ್ಲಿ ಪ್ರಕರಣ ದಾಖಲಿಸಲಾಗಿದೆ ಎಂದು ಎಸ್ಪಿ ಕುಲದೀಪ ಜೈನ್‌
ತಿಳಿಸಿದ್ದಾರೆ.

 ಬಂಧಿಸಲು ಹೋದ  ಪೊಲೀಸರ ಮೇಲೆ ಹಲ್ಲೆಗೆ  ಯತ್ನಿಸಿದ ಯೂನಿಸ್‌  ಆತ್ಮರಕ್ಷಣೆಗೆ ಹಾರಿಸಿದ ಎಸ್‌ಐ ಆರೀಫ್   ಗಾಯಗೊಂಡ ಎಸ್‌ಐ,  ಪೇದೆ, ರೌಡಿಶೀಟರ್‌  ಆಸ್ಪತ್ರೆಗೆ ದಾಖಲು