ಮತಯಂತ್ರ: ಕಾಂಗ್ರೆಸ್‌ ಅಪಸ್ವರ

Team Udayavani, Mar 18, 2018, 6:00 AM IST

ಹೊಸದಿಲ್ಲಿ: ವಿದ್ಯುನ್ಮಾನ ಮತ ಯಂತ್ರಗಳ ಬಗ್ಗೆ ಕಾಂಗ್ರೆಸ್‌ ಅಧಿವೇಶನದಲ್ಲೂ ಅಪಸ್ವರ ಕೇಳಿಬಂತು.”ಮುಂದಿನ ದಿನಗಳಲ್ಲಿ ವಿದ್ಯುನ್ಮಾನ ಮತಯಂತ್ರಗಳು ಬೇಡವೇ ಬೇಡ. ಅದರ ಬದಲಾಗಿ ಮತ ಪತ್ರದ ವಿಧಾನವನ್ನು ಪುನಃ 
ಜಾರಿಗೊಳಿಸಬೇಕು’ ಎಂದು ಕಾಂಗ್ರೆಸ್‌ ಅಧ್ಯಕ್ಷ ರಾಹುಲ್‌ ಗಾಂಧಿ ಪ್ರತಿಪಾದಿಸಿದ್ದಾರೆ. ಈ ಮೂಲಕ ಮತ್ತೆ ಇವಿಎಂ “ರಾಗ’ಕ್ಕೆ ಕಾಂಗ್ರೆಸ್‌ ಅಂಟಿ ಕೊಳ್ಳುತ್ತಿರುವುದು ಸ್ಪಷ್ಟ. ಜತೆಗೆ ಲೋಕಸಭೆ ಮತ್ತು ವಿಧಾನಸಭೆಗೆ ಒಂದೇ ಬಾರಿ ಚುನಾವಣೆ ನಡೆಸುವ ಬಿಜೆಪಿ ಪ್ರಸ್ತಾವ ವನ್ನೂ ವಿರೋಧಿಸುವುದಾಗಿ ಹೇಳಿದ್ದಾರೆ.

“ಇವೆಲ್ಲದರ ಸಾಧಕ-ಬಾಧಕಗಳನ್ನು ಅರಿತು ತೀರ್ಮಾನ ಕೈಗೊಳ್ಳಬೇಕು. ಇದರಿಂದ ಹಲವು ರೀತಿಯ ಪರಿಣಾಮ ಉಂಟಾಗುವ ಸಾಧ್ಯತೆ ಇರುತ್ತದೆ. ಈ ಎರಡೂ ವಿಚಾರಗಳಿಗೆ ಗೊತ್ತುವಳಿ ಅಂಗೀಕರಿಸಲಾಗಿದೆ. ಧರ್ಮ ಮತ್ತು ರಾಜಕೀಯವನ್ನು ಮಿಶ್ರಗೊಳಿಸಬಾರದು. ಆರೆಸ್ಸೆಸ್‌ ಮತ್ತು ಬಿಜೆಪಿ ಜನರ ಭಾವನೆ ಗಳನ್ನು ಕೆರಳಿಸಲು ಧರ್ಮವನ್ನು ಬಳಸಿ ಕೊಳ್ಳುತ್ತಿವೆ’ ಎಂದಿದ್ದಾರೆ. ಧರ್ಮವನ್ನು ರಾಜಕೀಯಕ್ಕಾಗಿ ಬಳಸುತ್ತಿದೆ ಎಂದು ಗೊತ್ತುವಳಿಯಲ್ಲಿ ಆರೋಪಿಸಲಾಗಿದೆ ಎನ್ನುವ ಬಗ್ಗೆಯೂ ಈ ವೇಳೆ ಮಾಹಿತಿ ನೀಡಿದರು.

“ಮೋದಿ ನೇತೃತ್ವದ ಸರಕಾರದಿಂದ ದೇಶ ಬಳಲಿದೆ. ಭಾರತವನ್ನು ರಕ್ಷಿಸಲು ಕಾಂಗ್ರೆಸ್‌ನಿಂದ ಮಾತ್ರ ಸಾಧ್ಯ. ಕಾಂಗ್ರೆಸ್‌ನ ಕೈ ಚಿಹ್ನೆ ಜನರನ್ನು ಅಭಿವೃದ್ಧಿಯತ್ತ ಕೊಂಡೊಯ್ಯ ಬಹುದು’ ಎಂದು ರಾಹುಲ್‌  ಹೇಳಿದ್ದಾರೆ. ದಿಲ್ಲಿಯಲ್ಲಿ ಶುಕ್ರವಾರ ಪಕ್ಷದ ಅಧಿ ವೇಶನದಲ್ಲಿ ಅವರು ಮಾತನಾಡಿದರು.