ಮಂಗಳೂರಿಗೂ ಬೇಕಿದೆ ಸೈಕ್ಲಿಂಗ್‌ ಟ್ರೆಂಡ್‌ 

Team Udayavani, Mar 18, 2018, 4:22 PM IST

ಈಗ ಮಂಗಳೂರಲ್ಲೂ ಸೈಕಲ್‌ನತ್ತ ಆಕರ್ಷಿತರಾಗುವ ಯುವಜನರಿಗೇನೂ ಕಡಿಮೆಯಿಲ್ಲ. ಆದರೆ, ನಗರವನ್ನು ದೃಷ್ಟಿಯಲ್ಲಿರಿಸಿಕೊಂಡರೆ, ಇಲ್ಲಿ ಸೈಕಲನ್ನೇ ಪ್ರಮುಖ ಸಾರಿಗೆಯನ್ನಾಗಿ ಬಳಸುವುದಕ್ಕೆ ಪ್ರೇರಣೆ ನೀಡಬೇಕಾಗಿದೆ. ನಗರದೊಳಗೆ ಮಾಲಿನ್ಯದ ಪ್ರಮಾಣ ಕಡಿಮೆಗೊಳಿಸಲು, ಸುಲಭ ಮತ್ತು ಹೆಚ್ಚು ವೆಚ್ಚವಿಲ್ಲದ ಸಾರಿಗೆಯನ್ನಾಗಿ ಸೈಕಲ್‌ ಬಳಕೆ ಉತ್ತೇಜಿಸಬೇಕಿದೆ. ಇದಕ್ಕಾಗಿ ಮೂರು ವಿಧದ ಕಾರ್ಯಕ್ರಮಗಳನ್ನು ನಗರಾಡಳಿತ ಹಮ್ಮಿಕೊಳ್ಳಬಹುದು.

ಬಾಡಿಗೆ ಸೈಕಲ್‌ ಕೇಂದ್ರಗಳು
ಈಗಾಗಲೇ ಮೈಸೂರು ಮತ್ತು ಬೆಂಗಳೂರಿನಂತಹ ನಗರಗಳಲ್ಲಿ ಅತ್ಯಾಧುನಿಕ ಬಾಡಿಗೆ ಸೈಕಲ್‌ ಕೇಂದ್ರಗಳು ಸೂಪರ್‌ ಹಿಟ್‌ ಆಗಿವೆ. ಮೊಬೈಲ್‌ನಲ್ಲೇ ಸೈಕಲ್‌ ಬುಕ್‌ ಮಾಡಿ, ಮೊಬೈಲ್‌ನಲ್ಲೇ ಪಾವತಿ ಮಾಡುವ ವ್ಯವಸ್ಥೆ ಇದೆ. ಸೈಕಲನ್ನು ಪಡೆದು, ಬೇಕಾದ ಸ್ಥಳಕ್ಕೆ ತೆರಳಿ, ಅಲ್ಲೇ ಪಕ್ಕದಲ್ಲಿರುವ ಸೈಕಲ್‌ ಕೇಂದ್ರದಲ್ಲಿ ಸೈಕಲನ್ನು ಕೊಡುವ ವ್ಯವಸ್ಥೆ ಇದು. ಇದರಿಂದ ಖಾಸಗಿ ವಾಹನಗಳ ಭರಾಟೆ ತಪ್ಪುತ್ತದೆ. ಶಾಪಿಂಗ್‌, ನಿತ್ಯದ ಕೆಲಸದವರಿಗೆ ಸುಲಭವಾಗುತ್ತದೆ. ಪ್ರವಾಸಿಗರೂ ಇದರಿಂದ ನಗರ ಸೌಂದರ್ಯ ಸವಿಯಬಹುದು.

ಸೈಕಲ್‌ ರಸ್ತೆ
ಸೈಕಲ್‌ಗ‌ಳಿಗೆ ಸಾಮಾನ್ಯ ರಸ್ತೆಗಳ ಪಕ್ಕದಲ್ಲೇ ಅನುಕೂಲ ಮಾಡಿಕೊಡುವುದು. ಇದಕ್ಕೆ ಸಾಮಾನ್ಯ ರಸ್ತೆಗಳಲ್ಲೇ ಸೈಕಲ್‌ ಬಳಸಲು ಮಾರ್ಕ್‌ ಮಾಡುವುದು, ಅವಕಾಶವಿದ್ದೆಡೆ ಪ್ರತ್ಯೇಕ ಸೈಕಲ್‌ ಪಥಗಳನ್ನೂ ನಿರ್ಮಿಸಬಹುದು. ಇದರಿಂದ ಸೈಕಲ್‌ ಬಳಸುವವರು ಟ್ರಾಫಿಕ್‌ ಮಧ್ಯೆಯೂ ನಿರಾತಂಕವಾಗಿ ಸೈಕಲ್‌ ಬಳಸಲು ಸಾಧ್ಯವಾಗುತ್ತದೆ.

ಮೋಟಾರ್‌ ಫ್ರೀ ಜೋನ್‌
ವಾರದಲ್ಲೊಂದು ದಿನ ಸೈಕಲ್‌ ಡೇ, ಮೋಟಾರ್‌ ಫ್ರೀ ಜೋನ್‌ ಎಂದು ನಿರ್ದಿಷ್ಟ ರಸ್ತೆಗಳಲ್ಲಿ ವಾಹನಗಳ ಬಳಕೆಯನ್ನು ನಿಷೇಧಿಸುವುದು, ಪ್ರವಾಸಿ ಸ್ಥಳಗಳಲ್ಲಿ ಸೈಕಲ್‌, ಬ್ಯಾಟರಿ ಸ್ಕೂಟರ್‌, ಕಾರುಗಳಿಗೆ ಮಾತ್ರ ಅವಕಾಶ ಮಾಡಿಕೊಡ ಬೇಕು. ಜತೆಗೆ ವಾರಕ್ಕೊಮ್ಮೆ ಸೈಕಲ್‌ ಬಳಸುವಂತೆ (ಸೈಕಲ್‌ ಡೇ)ಗೆ ಆಡಳಿತ ಮನಸ್ಸು ಮಾಡಬೇಕಿದೆ. ಇದರಿಂದ ಟ್ರಾಫಿಕ್‌ ಕಿರಿಕಿರಿ ತಪ್ಪುತ್ತದೆ.

ಬೆಂಗಳೂರಿನಲ್ಲಿ ಈಗಾಗಲೇ ಪ್ರಮುಖ ಸಾರ್ವಜನಿಕ ರಜಾದಿನಗಳಂದು ಮತ್ತು ರವಿವಾರಗಳಂದು ಕಬ್ಬನ್‌ ಪಾರ್ಕ್ ನಲ್ಲಿ ಮೋಟಾರ್‌ ಫ್ರೀ ಜೋನ್‌ ಮಾಡಲಾಗುತ್ತದೆ. ಆ ದಿನ ವಾಹನಗಳು ಪಾರ್ಕ್‌ ಒಳಗೆ ಸಂಚರಿಸುವುದಕ್ಕೆ ಅವಕಾಶವಿಲ್ಲ. ಕಾಲ್ನಡಿಗೆ ಅಥವಾ ಸೈಕಲ್‌, ಯುನಿಸೈಕಲ್‌ಗ‌ಳಿಗೆ ಮಾತ್ರ ಅವಕಾಶ ನೀಡಲಾಗಿದೆ. ಇದರಿಂದ ಸಾರ್ವಜನಿಕರಿಗೆ ಪ್ರಶಾಂತ, ನೆಮ್ಮದಿಯ ವಾತಾವರಣ ನಿರ್ಮಿಸಿಕೊಟ್ಟಂತಾಗುತ್ತದೆ.

 ಈಶ