ಹಿಮದ ಮಡಿಲಲ್ಲಿ ಸ್ತ್ರೀ ಶಕ್ತಿ

Team Udayavani, Mar 20, 2018, 6:00 AM IST

ನವದೆಹಲಿ: ಹಿಮಚ್ಛಾದಿತ ಪ್ರದೇಶದಲ್ಲಿ ಒಂದು ದಿನವನ್ನೂ ಕಳೆಯದ ಭಾರತದ ಮಹಿಳಾ ವಿಜ್ಞಾನಿ ಮಂಗಳಾ ಮಣಿ, ನಿರ್ದಿಷ್ಟ ಪ್ರಯೋಗಕ್ಕಾಗಿ ಒಂದು ವರ್ಷಕ್ಕಿಂತಲೂ ಹೆಚ್ಚು ಕಾಲ ಅಂಟಾರ್ಟಿಕಾದಲ್ಲಿ ಉಳಿಯುವ ಮೂಲಕ  ಸ್ತ್ರೀ ಶಕ್ತಿಯ  ಹೊಸ ಸಾಧ್ಯತೆಯನ್ನೂ ಸಾಬೀತುಪಡಿಸಿದ್ದಾರೆ.  

ಭೂ ಮಂಡಲದಲ್ಲೇ ಅತ್ಯಂತ ಕಡಿಮೆ ಅಂದರೆ, ಉಷ್ಣಾಂಶ “- 90 ಡಿಗ್ರಿ ಸೆಲ್ಸಿಯಸ್‌’ ಇರುವ ಅಂಟಾರ್ಟಿಕಾದ ಚಳಿಗಾಲದಲ್ಲಿ ಆಗುವ ಬದಲಾವಣೆಗಳನ್ನು ಅಧ್ಯಯನ ಮಾಡಲೆಂದು ಭಾರತೀಯ ಬಾಹ್ಯಾಕಾಶ ಸಂಸ್ಥೆಯ (ಇಸ್ರೋ),  23 ಜನರ ವಿಜ್ಞಾನಿಗಳ ತಂಡವನ್ನು ಕಳುಹಿಸಿಕೊಟ್ಟಿತ್ತು. ಆ ತಂಡದಲ್ಲಿದ್ದ ಏಕೈಕ ಮಹಿಳೆ ಮಂಗಳಾ. 2016ರಿಂದ ಮಧ್ಯಭಾಗದಿಂದ 2017ರ ಅಂತ್ಯದವರೆಗೆ,  403 ದಿನಗಳ ಕಾಲ ಮಂಗಳಾ ತಮ್ಮ ತಂಡದ ಜತೆಯಲ್ಲಿದ್ದರು.

“ಅಂಟಾರ್ಟಿಕಾದ ಇಸ್ರೋದ ಕೇಂದ್ರವಾದ “ಭಾರತಿ’ಯಲ್ಲೇ ತಂಡವನ್ನು ಉಳಿಸಲಾಗಿತ್ತು. ಪ್ರತಿನಿತ್ಯ ಹೊರಗಡೆ ಹೋಗುವುದೇ ಕಷ್ಟವಾಗಿತ್ತು. ಪೋಲಾರ್‌ ಜ್ಯಾಕೆಟ್‌ಗಳನ್ನು ಧರಿಸಿ, ಅಧ್ಯಯನಕ್ಕಾಗಿ 2-3 ಗಂಟೆಗಳ ಕಾಲ ಹೋಗಿದ್ದರೂ, ಬೇಗನೇ ಕೇಂದ್ರಕ್ಕೆ ಹಿಂದಿರುಗಿ “ವಾರ್ಮ್-ಅಪ್‌’ ಮಾಡಿಕೊಳ್ಳಬೇಕಿತ್ತು’ ಎಂದಿದ್ದಾರೆ. ಅಲ್ಲಿಯೇ ಹುಟ್ಟುಹಬ್ಬ ಆಚರಿಸಿಕೊಳ್ಳಲಾಗಿತ್ತು ಎಂದಿದ್ದಾರೆ. ರಷ್ಯಾ, ಚೀನಾದ ತಂಡಗಳು ಅಲ್ಲಿಗೆ  ಬಂದಿದ್ದರೂ, ಮಹಿಳಾ ಸದಸ್ಯರೇ ಇರಲಿಲ್ಲ  ಎಂದಿದ್ದಾರೆ.