ಮರಕ್ಕೆ ಬೈಕ್‌ ಢಿಕ್ಕಿ, ಬಾಲಕಿ ಸಾವು

Team Udayavani, Mar 20, 2018, 10:20 AM IST

ಸಿದ್ದಾಪುರ: ಕುಂದಾಪುರ ತಾಲೂಕಿನ ಶಂಕರನಾರಾಯಣದಲ್ಲಿ ರವಿವಾರ ರಾತ್ರಿ ನಿಯಂತ್ರಣ ತಪ್ಪಿದ ಬೈಕ್‌ ಮರಕ್ಕೆ ಢಿಕ್ಕಿ ಹೊಡೆದು ನಾಲ್ಕೂವರೆ ವರ್ಷ ಪ್ರಾಯದ ಬಾಲಕಿ ಸ್ಥಳದಲ್ಲೇ ಸಾವನ್ನಪ್ಪಿ, ಸವಾರ ಗಂಭೀರವಾಗಿ ಗಾಯಗೊಂಡಿದ್ದಾರೆ. ಶಂಕರನಾರಾಯಣ ಗ್ರಾಮ ಬೈಲೂರು ನಿವಾಸಿ ವಾಸು ಅವರ ಪುತ್ರಿ ನಾಲ್ಕೂವರೆ ವರ್ಷದ ಸಿಂಚನಾ ಮೃತಪಟ್ಟಿರುವ ಬಾಲಕಿಯಾಗಿದ್ದು, ಹಳ್ನಾಡು ನಿವಾಸಿ ಕೃಷ್ಣ ಗಾಯಾಳು. ಅವರನ್ನು ಕುಂದಾಪುರದ ಸರಕಾರಿ ಆಸ್ಪತ್ರೆಯಲ್ಲಿ ಚಿಕಿತ್ಸೆಗೆ ಸೇರಿಸಲಾಗಿದೆ.

ಘಟನೆ ವಿವರ:
ಕೂಲಿ ಕಾರ್ಮಿಕರಾದ ವಾಸು ಮತ್ತು ಕೃಷ್ಣ ಸ್ನೇಹಿತರು. ಕೃಷ್ಣ ಆಗಾಗ ವಾಸು ಮನೆಗೆ ಬಂದು ಹೋಗುತ್ತಿದ್ದರು. ಕೃಷ್ಣ ರವಿವಾರ ವಾಸುವಿನ ಮನೆಗೆ ಬಂದಾಗ, ಆತನ ಪತ್ನಿ ಅನಾರೋಗ್ಯದಿಂದಿರುವುದು ತಿಳಿಯಿತು. ಆಕೆ ಕೃಷ್ಣ ಅವರಲ್ಲಿ ಶಂಕರನಾರಾಯಣಕ್ಕೆ ಹೋಗಿ ಔಷಧ ತಂದುಕೊಡುವಂತೆ ಕೇಳಿಕೊಂಡಿದ್ದರು. ಆಗ ವಾಸು ಮಗಳು ಸಿಂಚನಾ ತಾನೂ ಬರುತ್ತೇನೆಂದು ಹಟ ಹಿಡಿದ ಕಾರಣ ಆಕೆಯನ್ನು ಜತೆಯಲ್ಲಿ ಕರೆದುಕೊಂಡು ಹೋದರು. ಶಂಕರನಾರಾಯಣದಿಂದ ವಾಪಸ್‌ ಮನೆಗೆ ಹೊರಡುವಾಗ ಮಳೆ ಆರಂಭವಾಯಿತು. ಆದರೂ ಮಳೆಯಲ್ಲೇ ಬೈಕ್‌ ಚಲಾಯಿಸಿಕೊಂಡು ಹೋಗುವಾಗ, ಕಲ್ಲನಕೆರೆ ಅಮ್ಮ ಸಭಾಭವನದ ಹತ್ತಿರ ಅಪಘಾತ ಸಂಭವಿಸಿತು.  

ಏಕೈಕ ಪುತ್ರಿ
ವಾಸು ದಂಪತಿಗೆ ಸಿಂಚನಾ ಏಕೈಕ ಪುತ್ರಿಯಾಗಿದ್ದು ಮನೆ ಹಾಗೂ ಅಂಗನವಾಡಿಯಲ್ಲಿ ಅತಿ ಚುರುಕಿನ ಹುಡುಗಿಯಾಗಿದ್ದಳು. ಪುತ್ರಿಯನ್ನು ಕಳೆದುಕೊಂಡ ದಂಪತಿ ಬೈಲೂರು ಮನೆ ಬಿಟ್ಟು ಕುಂದಾಪುರದ ಮೂಲ ಮನೆಯಲ್ಲಿ ವಾಸವಾಗಿದ್ದಾರೆ. ಶಂಕರನಾರಾಯಣ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.