ಉ.ಪ್ರ.ರಾಜ್ಯಸಭೆ ಚುನಾವಣೆ: ಎಸ್ಪಿ-ಬಿಎಸ್ಪಿಗೆ ಅಮಿತ್‌ “ಶಾ’ಕ್‌

Team Udayavani, Mar 22, 2018, 6:00 AM IST

ಲಕ್ನೋ: ಉತ್ತರ ಪ್ರದೇಶದಿಂದ ರಾಜ್ಯಸಭೆಗೆ 23ರಂದು ನಡೆಯಲಿರುವ ಚುನಾವಣೆಯಲ್ಲಿ ಎಂಟು ಅಭ್ಯರ್ಥಿಗಳನ್ನು ಗೆಲ್ಲಿಸುವ ಬಗ್ಗೆ ಪಕ್ಷದ ಬಿಜೆಪಿ ಅಧ್ಯಕ್ಷ ಅಮಿತ್‌ ಶಾ ಮಾಡಿರುವ ಪ್ರಯತ್ನ ಯಶಸ್ವಿಯಾಗಿದೆ. ನಾಲ್ವರು ಶಾಸಕರನ್ನು ಹೊಂದಿರುವ ಸುಹೆಲ್‌ದೇವ್‌ ಭಾರತೀಯ ಸಮಾಜ ಪಕ್ಷದ ಅಧ್ಯಕ್ಷ ಓಮ್‌ ಪ್ರಕಾಶ್‌ ರಾಜ್‌ಭಾರ್‌ ಶಾ ಜತೆಗೆ ಭೇಟಿಯಾದ ಬಳಿಕ ತನ್ನ ಅಭ್ಯರ್ಥಿಗಳನ್ನು ಯಶಸ್ವಿಯಾಗಿ ರಾಜ್ಯಸಭೆಗೆ ಕಳುಹಿಸುವ ಬಗ್ಗೆ ನಿಟ್ಟುಸಿರು ಬಿಟ್ಟಿದ್ದಾರೆ ಅಮಿತ್‌ ಶಾ. ಇದೀಗ ಒಂದು ಸ್ಥಾನಕ್ಕೆ ಚುನಾವಣೆ ನಡೆಯಲಿದೆ ಎಂದು ಬಿಜೆಪಿಯ ಹಿರಿಯ ನಾಯಕರೊಬ್ಬರು ಹೇಳಿದ್ದಾರೆ.

ಬಿಎಸ್‌ಪಿ ಮತ್ತು ಎಸ್‌ಪಿ ಜತೆಯಾಗಿ ಇತ್ತೀಚಿನ ಲೋಕಸಭೆ ಉಪಚುನಾವಣೆ ಎದುರಿಸಿ, ಗೆದ್ದಿದ್ದವು.  ಇದೇ ವೇಳೆ, ಬುಧವಾರ ನಡೆದ ಬೆಳವಣಿಗೆಯಲ್ಲಿ ಚುನಾವಣೆ ಬಗ್ಗೆ ಚರ್ಚಿಸಲು ಆಯೋಜಿಸಲಾಗಿದ್ದ ಎಸ್‌ಪಿ ಸಭೆಗೆ ಮಾಜಿ ಸಚಿವ ಶಿವಪಾಲ್‌ ಯಾದವ್‌ ಸೇರಿದಂತೆ ಏಳು ಮಂದಿ ಗೈರು ಹಾಜರಾಗಿದ್ದರು. ಉ.ಪ್ರ.ವಿಧಾನ ಸಭೆಯಲ್ಲಿ ಬಿಎಸ್‌ಪಿ 19 ಮತ್ತು ಎಸ್‌ಪಿ 47 ಶಾಸಕರನ್ನು ಹೊಂದಿದೆ. ಬಿಎಸ್‌ಪಿ ರಾಜ್ಯಸಭೆ ಅಭ್ಯರ್ಥಿ ಗೆಲ್ಲಬೇಕಾದರೆ ಎಸ್‌ಪಿಯ ಹೆಚ್ಚುವರಿ 10 ಮತಗಳು ಬೇಕು. ಇದರ ಜತೆಗೆ ಅಜಿತ್‌ ಸಿಂಗ್‌ರ ಆರ್‌ಎಲ್‌ಡಿಯ ಒಬ್ಬ ಶಾಸಕ ಎಸ್‌ಪಿ-ಬಿಎಸ್‌ಪಿ ಮೈತ್ರಿ ಕೂಟಕ್ಕೆ ಮತ ಚಲಾಯಿಸಲಿದ್ದಾರೆ ಎಂಬ ವಿಶ್ವಾಸ ಮಾಜಿ ಸಿಎಂ ಅಖೀಲೇಶ್‌ ಯಾದವ್‌ರದ್ದು. 

ಎಸ್‌ಪಿ ನಾಯಕರಾಗಿದ್ದ ನರೇಶ್‌ ಅರ್ಗವಾಲ್‌ ಮತ್ತು ಅವರ ಪುತ್ರ ಬಿಜೆಪಿ ಪರ ಮತ ಹಾಕುವುದು ಖಚಿತ. ಹೀಗಾಗಿ, ಬಿಎಸ್‌ಪಿ ಅಭ್ಯರ್ಥಿ  ಭೀಮರಾವ್‌ ಅಂಬೇಡ್ಕರ್‌ ಗೆಲ್ಲುವ ಬಗ್ಗೆ ಪ್ರಶ್ನೆಗಳೆದ್ದಿವೆ. ಉತ್ತರ ಪ್ರದೇಶದಲ್ಲಿ ರಾಜ್ಯಸಭೆ ಅಭ್ಯರ್ಥಿಗೆ ಗೆಲ್ಲಬೇಕಾದರೆ 37 ಮತಗಳು ಬೇಕು.