ಸಂದೀಪಾ ಧಾರ್‌

Team Udayavani, Mar 23, 2018, 7:30 AM IST

ನಟಿಸಿದ ಮೊದಲ ಚಿತ್ರಕ್ಕೆ ಮೂರು ಪ್ರತಿಷ್ಠಿತ ಪ್ರಶಸ್ತಿಗಳಿಗೆ ನಾಮನಿರ್ದೇಶನಗೊಂಡ ಪ್ರತಿಭಾವಂತೆ ಸಂದೀಪಾ ಧಾರ್‌. ತೀರಾ ಹೊಸ ಹೆಸರು ಎಂದೆನಿಸಿದರೂ ಸಂದೀಪಾ ಬಾಲಿವುಡ್‌ಗೆ ಬಂದು ಕನಿಷ್ಠ ಎಂಟು ವರ್ಷವಾದರೂ ಆಗಿರಬಹುದು. ಇಸಿ ಲೈಫ್ ಮೇ ಅವಳು ನಟಿಸಿದ ಮೊದಲ ಚಿತ್ರ. ಈ ಚಿತ್ರದ ಅಭಿನಯಕ್ಕಾಗಿ ಫಿಲ್ಮ್ಫೇರ್‌, ಸ್ಟಾರ್‌ಡಸ್ಟ್‌ ಮತ್ತು ಸ್ಟಾರ್‌ ಸ್ಕ್ರೀನ್‌ ಪ್ರಶಸ್ತಿಗಳಿಗೆ ಅವಳ ಹೆಸರನ್ನು ಶಿಫಾರಸು ಮಾಡಲಾಗಿತ್ತು. ಸ್ವಲ್ಪದರಲ್ಲಿಯೇ ಪ್ರಶಸ್ತಿ ಕೈತಪ್ಪಿತು ಎನ್ನುವುದು ಬೇರೆ ವಿಚಾರ. ಕಾಶ್ಮೀರದಲ್ಲಿ ಹುಟ್ಟಿದ ಸಂದೀಪಾ ಕಾಶ್ಮೀರಿ ಸೇಬಿನಷ್ಟೇ ಚೆಲುವಾದ ಬೆಡಗಿ. ಕೆಲ ವರ್ಷ ಬೆಂಗಳೂರಿನಲ್ಲಿ ಕಲಿತ ಕಾರಣ ಕರ್ನಾಟಕದ ನಂಟೂ ಉಂಟು. 

2010ರಲ್ಲಿ ಬಂದ ಇಸಿ ಲೈಫ್ ಮೇ  ಅವಳ ಮೊದಲ ಚಿತ್ರ. ಸಾಧಾರಣ ಯಶಸ್ಸು ಕಂಡ ಈ ಚಿತ್ರದಲ್ಲಿ ಸಂದೀಪಾಳ ಅಭಿನಯ ಮಾತ್ರ ಸರ್ವತ್ರ ಮೆಚ್ಚುಗೆ ಗಳಿಸಿತ್ತು. ಆದರೆ ಏಕೋ ಅನಂತರ ಸಂದೀಪಾಳಿಗೆ ಬಾಲಿವುಡ್‌ನ‌ಲ್ಲಿ ನಿರೀಕ್ಷಿಸಿದಷ್ಟು ಅವಕಾಶಗಳು ಸಿಗಲಿಲ್ಲ. ಸಿಕ್ಕಿದರೂ ಚಿಕ್ಕಪುಟ್ಟ ಪಾತ್ರಗಳು. ಆದರೂ ಈ ಪಾತ್ರಗಳಲ್ಲೇ ಸಂದೀಪಾ ಮಿಂಚಿದಳು. ದಬಂಗ್‌ 2 ಮತ್ತು ಹೀರೊಪಂತಿಯಲ್ಲಿ ಕೂಡಾ ಸಂದೀಪಾ ಗಮನ ಸೆಳೆದಿದ್ದಾಳೆ. ಗೋಲು ಔರ್‌ ಪಪ್ಪು, ಗ್ಲೋಬಲ್‌ ಬಾಬಾ, 7 ಅವರ್ ಟು ಗೋ, ಬಾರಾತ್‌ ಕಂಪೆನಿ ಅವಳು ನಟಿಸಿರುವ ಚಿತ್ರಗಳು. ಇದೀಗ ಫಿಕ್ರಿ ಎಂಬ ದೊಡ್ಡ ಬಜೆಟಿನ ಚಿತ್ರದಲ್ಲಿ ಸಂದೀಪಾಳಿಗೆ ಪ್ರಮುಖ ಪಾತ್ರ ಸಿಕ್ಕಿದೆ. ನೀಲ್‌ ನಿತಿನ್‌ ಮುಕೇಶ್‌, ಕರಣ್‌ ಸಿಂಗ್‌ ಗ್ರೋವರ್‌, ಕೆ ಕೆ ಮೆನೋನ್‌, ಜಾಕಿಶ್ರಾಫ್ ಮುಂತಾದ ಘಟಾನುಘಟಿಗಳಿರುವ ಚಿತ್ರವಿದು. ಸಂದೀಪಾಳದ್ದು ಪೋರ್ಚುಗೀಸ್‌ ಮೋಡೆಲ್‌ ಪಾತ್ರ. ಇದಕ್ಕಾಗಿ ಸಂದೀಪಾ ಪೋರ್ಚುಗೀಸ್‌ ಭಾಷೆಯನ್ನು ಕಲಿಯುತ್ತಿರುವುದು ಮಾತ್ರವಲ್ಲದೆ ಮೋಡೆಲ್‌ ರೀತಿ ಕಾಣಿಸಿಕೊಳ್ಳಲು ಕಠಿನ ಡಯಟಿಂಗ್‌ ಕೂಡಾ ಮಾಡುತ್ತಿದ್ದಾಳಂತೆ. ಬಿಡುವು ಸಿಕ್ಕಿದಾಗ ಪೋರ್ಚುಗೀಸ್‌ ಸಿನೆಮಾ, ಟಿವಿ ಶೋ ಇತ್ಯಾದಿ ಕಾರ್ಯಕ್ರಮಗಳನ್ನು ನೋಡಿ ತಯಾರಿ ಮಾಡಿಕೊಳ್ಳುತ್ತಿದ್ದಾಳೆ.