ಕ್ರೀಡಾ ಸಾಧಕ ವಿದ್ಯಾರ್ಥಿಗಳಿಗೆ ಗ್ರೇಸ್‌ ಅಂಕ: ಮಧ್ವರಾಜ್‌

Team Udayavani, Mar 23, 2018, 6:00 AM IST

ಮಂಗಳೂರು: ನಗರದ ಉರ್ವ-ಬೋಳೂರಿನಲ್ಲಿ ಸುಮಾರು 6.5 ಕೋ.ರೂ.ವೆಚ್ಚದಲ್ಲಿ ನಿರ್ಮಾಣವಾಗಲಿರುವ ಅಂತಾ ರಾಷ್ಟ್ರೀಯ ಮಾದರಿಯ ಶಟಲ್‌ ಬ್ಯಾಡ್ಮಿಂಟನ್‌ ಮತ್ತು ಕಬಡ್ಡಿ ಅಂಕಣಕ್ಕೆ ರಾಜ್ಯ ಕ್ರೀಡಾ ಸಚಿವ ಪ್ರಮೋದ್‌ ಮಧ್ವರಾಜ್‌ ಗುರುವಾರ ಶಿಲಾನ್ಯಾಸ ನೆರವೇರಿಸಿದರು. 

ಕ್ರೀಡಾಪಟುಗಳಿಗೆ ಪ್ರೋತ್ಸಾಹ ನೀಡುವ ಉದ್ದೇಶದಿಂದಲೇ ಜಾರಿಗೆ ಬಂದಿರುವ ಕ್ರೀಡಾ ನೀತಿಯಡಿ ಕ್ರೀಡಾ ಕ್ಷೇತ್ರದಲ್ಲಿ ಉತ್ತಮ ಸಾಧನೆ ತೋರುವ ವಿದ್ಯಾರ್ಥಿಗಳಿಗೆ ಗ್ರೇಸ್‌ ಅಂಕಗಳನ್ನು ನೀಡಲಾಗುವುದು. ಕ್ರೀಡೆಗಳಲ್ಲಿ ಭಾಗವಹಿಸುವ ವಿದ್ಯಾ ರ್ಥಿಗಳಿಗೆ ಹಾಜರಾತಿ ಕೊರತೆ ಆಗದಂತೆ ನೋಡಲಾಗುವುದು, ಕ್ರೀಡಾ ಸ್ಪರ್ಧೆಗಳ ವೇಳೆ ಪರೀಕ್ಷೆ ಇದ್ದಾಗ, ವಿದ್ಯಾರ್ಥಿಗಳಿಗೂ ಸ್ಪರ್ಧೆಗಳಲ್ಲಿ ಭಾಗವಹಿಸಲು ಅನುವು ಮಾಡಿಕೊಟ್ಟು, ವಿಶೇಷ ಪರೀಕ್ಷೆಗೆ ಅವಕಾಶ ಒದಗಿಸುವುದು. ವಿವಿಧ ಇಲಾಖೆಗಳಲ್ಲಿ ಕ್ರೀಡಾಪಟುಗಳಿಗೆ ಶೇ. 2ರಷ್ಟು ಮೀಸಲಾತಿ ನೀಡುವ ಬಗ್ಗೆ ಕ್ರೀಡಾನೀತಿ ರೂಪಿಸಲಾಗಿದೆ ಎಂದರು. 

ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರಿಗೆ ತಾನು ಮಾಡಿದ ಮನವಿಯ ಮೇರೆಗೆ ಕ್ರೀಡಾ ಇಲಾಖೆಗೆ ನೀಡಲಾಗುತ್ತಿದ್ದ 145 ಕೋಟಿ ರೂ.ಗಳ ಬಜೆಟನ್ನು 285 ಕೋಟಿ ರೂ.ಗಳಿಗೆ ಏರಿಕೆ  ಮಾಡಿರುವುದರಿಂದ ದ.ಕ. ಜಿಲ್ಲೆಯ ಕ್ರೀಡಾ ಕ್ಷೇತ್ರಕ್ಕೆ 30 ಕೋಟಿ ರೂ. ನೀಡಲು ಸಾಧ್ಯವಾಯಿತು. ನಾವು ಒಲಿಪಿಂಕ್ಸ್‌ನಲ್ಲಿ ಪದಕ ಗೆಲ್ಲಬೇಕೆಂದು ಘೋಷಣೆ ಮಾಡಿದರೆ ಸಾಲದು. ಶಾಲಾ ಹಂತದಲ್ಲಿಯೇ ಮಕ್ಕಳನ್ನು ಕ್ರೀಡಾಪಟುಗಳನ್ನಾಗಿ ಬೆಳೆಸಲು ಪ್ರೇರೇಪಿಸಬೇಕು. ಸರಕಾರಗಳೂ ಕ್ರೀಡಾ ಇಲಾಖೆಗೆ ಸಾಕಷ್ಟು ಅನುದಾನ ಒದಗಿಸುವ ಮೂಲಕ ಮೂಲಭೂತ ಸೌಕರ್ಯಗಳ ಜತೆ ಕ್ರೀಡಾಪಟುಗಳನ್ನು ಬೆಳೆಸಲು ಪ್ರೇರೇಪಿಸಬೇಕು ಎಂದರು. 

ಶಾಸಕ ಜೆ.ಆರ್‌.ಲೋಬೋ ಅಧ್ಯಕ್ಷತೆ ವಹಿಸಿದ್ದರು. ಶ್ರೀ ದೇವಿ ಶಿಕ್ಷಣ ಸಂಸ್ಥೆಯ ಅಧ್ಯಕ್ಷ ಎ. ಸದಾನಂದ ಶೆಟ್ಟಿ, ಮೇಯರ್‌ ಭಾಸ್ಕರ ಕೆ, ಮುಖ್ಯ ಸಚೇತಕ ಶಶಿಧರ ಹೆಗ್ಡೆ, ಪ್ರಮುಖರಾದ ಪ್ರವೀಣ್‌ ಚಂದ್ರ ಆಳ್ವ, ರಾಧಾಕೃಷ್ಣ, ನಾಗವೇಣಿ, ಶೈಲಜಾ, ಸಬಿತಾ ಮಿಸ್ಕಿತ್‌, ರತಿಕಲಾ, ಅಮರನಾಥ್‌ ರೈ, ಪುರುಷೋತ್ತಮ ಪೂಜಾರಿ, ಐವನ್‌ ಪತ್ರಾವೋ, ವೆಂಕಟೇಶ್‌, ದೀಪಕ್‌, ಗಿರಿಧರ್‌ ಶೆಟ್ಟಿ, ಸುಪ್ರಿತ್‌ ಆಳ್ವ, ಅಶೋಕ್‌ ಪೂವಯ್ಯ, ಸಂತೋಷ್‌ ಶೆಟ್ಟಿ, ರತನ್‌ ಶೆಟ್ಟಿ, ಡಾ| ಬಿ.ಜಿ. ಸುವರ್ಣ, ರೇಮಂಡ್‌ ಡಿ’ಸೋಜ, ಪ್ರೇಮನಾಥ ಉಳ್ಳಾಲ್‌, ಉದಯ್‌ ಚೌಟ ಉಪಸ್ಥಿತರಿದ್ದರು. ಪ್ರದೀಪ್‌ ಡಿ’ಸೋಜ ಸ್ವಾಗತಿಸಿದರು. ಪುರುಷೋತ್ತಮ ಭಂಡಾರಿ ನಿರೂಪಿಸಿದರು. 

ಕೇಂದ್ರದ ಬಜೆಟ್‌ ಕೇವಲ 900 ಕೋ.ರೂ.
ದೇಶದ 30 ರಾಜ್ಯಗಳಿಗೆ ಕೇಂದ್ರ ಸರಕಾರದ ಕ್ರೀಡಾ ಬಜೆಟ್‌ ಕೇವಲ 900 ಕೋಟಿ ರೂ. ಮಾತ್ರ. ಅದೇ ಕರ್ನಾಟಕಕ್ಕಿಂತಲೂ ಕಡಿಮೆ ಜನಸಂಖ್ಯೆಯನ್ನು ಹೊಂದಿರುವ ಇಂಗ್ಲೆಂಡ್‌ನ‌ಲ್ಲಿ ಕ್ರೀಡಾ ಕ್ಷೇತ್ರಕ್ಕೆ 2,200 ಕೋಟಿ ರೂ. ನೀಡಲಾಗುತ್ತದೆ. ಇಂತಹ ಪರಿಸ್ಥಿತಿಯಲ್ಲಿ ಅಲ್ಲಿನ ಕ್ರೀಡಾಪಟುಗಳ ಜತೆ ನಮ್ಮ ಕ್ರೀಡಾಪಟುಗಳು ಸ್ಪರ್ಧೆ ನೀಡುವುದಾದರೂ ಹೇಗೆ ಎಂದು  ಮಧ್ವರಾಜ್‌ ಅವರು ಪ್ರಶ್ನಿಸಿದರು.