ಪ್ರತಿ ವಾಹನದಲ್ಲೂ ಇರಲಿ ಡಸ್ಟ್ ಬಿನ್‌

Team Udayavani, Mar 25, 2018, 3:54 PM IST

ಸಾಮಾನ್ಯವಾಗಿ ವಾಹನಗಳಲ್ಲಿ ಸಂಚರಿಸುವವರು ವಾಹನದೊಳಗೆ ಬಳಕೆ ಮಾಡುವ ವಸ್ತುವಿನ ತ್ಯಾಜ್ಯವನ್ನು ರಸ್ತೆಯಲ್ಲಿ ಎಸೆಯುವ ಅಭ್ಯಾಸವನ್ನು ಬೆಳೆಸಿಕೊಂಡಿರುತ್ತಾರೆ. ಇಂಥವರು ತಮ್ಮ ವಾಹನದೊಳಗೆ ಡಸ್ಟ್‌ ಬಿನ್‌ ಇರಿಸಿಕೊಂಡರೆ ಸುಂದರ, ಸ್ವಚ್ಛ ನಗರಕ್ಕೊಂದು ತಮ್ಮ ಕೊಡುಗೆಯನ್ನೂ ನೀಡಿದಂತಾಗುವುದು.

ಒಬ್ಬರು ಮಾಡುವ ತಪ್ಪಿನಿಂದಾಗಿ ಇಡೀ ನಗರದ ಸೌಂದರ್ಯಕ್ಕೆ ಧಕ್ಕೆಯಾಗುತ್ತದೆ ಎಂಬ ಕಲ್ಪನೆ ಪ್ರತಿಯೊಬ್ಬರಲ್ಲೂ ಬೆಳೆದಾಗಲೇ ಸ್ವಚ್ಛ ನಗರ ಕಲ್ಪನೆ ಸಾಕಾರವಾಗುವುದು. ಕೆಲವೊಂದು ವಾಹನಗಳ ಸವಾರರು ನೀರು ಕುಡಿದ ಬಾಟಲ್‌ಗ‌ಳನ್ನೂ ಎಸೆಯುತ್ತಾರೆ. ಇಂತಹ ಕಸಗಳನ್ನು ಎಲ್ಲೆಂದರಲ್ಲಿ ಎಸೆಯದೆ ವಾಹನದಲ್ಲೇ ಇಟ್ಟುಕೊಂಡು ಮನೆಗೆ ಹೋದ ಬಳಿಕವೋ ಅಥವಾ ಡಸ್ಟ್‌ ಬಿನ್‌ ಇರುವಲ್ಲಿಯೋ ಎಸೆಯಬಹುದಲ್ಲವೇ? ಇಡೀ ನಗರವನ್ನೇ ತಮ್ಮ ಮನೆ ಎಂದು ಭಾವಿಸಿದರೆ ಹೊರಗೆ ಕಸ ಚೆಲ್ಲುವ ಅಭ್ಯಾಸ ಕಡಿಮೆಯಾಗುತ್ತದೆ.

ಬೆಳಗ್ಗೆ ಕೆಲಸಕ್ಕೆ ಹೊರಡುವವರೂ ತಮ್ಮ ಮನೆಯ ಕಸವನ್ನೂ ಹಿಡಿದು ಹೊರಡುತ್ತಾರೆ. ಬಳಿಕ ಎಲ್ಲೋ ಒಂದು ವಾಹನವನ್ನು ನಿಧಾನಿಸಿ ಕಸವನ್ನು ಎಸೆಯುತ್ತಾರೆ. ನದಿಗೂ ಇಂತಹ ಕಸ ಬಿಸಾಡುವ ಪ್ರಸಂಗಗಳೂ ಇದೆ. ಈ ರೀತಿ ಮನೆಯಿಂದ ಕಸ ತರುವ ತಮ್ಮ ವಾಹನದೊಳಗೊಂದು ಡಸ್ಟ್‌ಬಿನ್‌ಗಳನ್ನು ಇಡಬಹುದಲ್ಲವೇ ? ತಮ್ಮ ವಾಹನ, ಮನೆ ಪರಿಸರ ಉತ್ತಮವಾಗಿರಬೇಕು ಎಂಬುದು ಕೂಡ ನಗರದ ಸೌಂದರ್ಯಕ್ಕೆ ನೀಡುವ ಕೊಡುಗೆಯಾಗುತ್ತದೆ. ಬಸ್‌ ಸಹಿತ ಎಲ್ಲ ವಾಹನಗಳಲ್ಲಿ ಡಸ್ಟ್‌ ಬಿನ್‌ ಇರಿಸಿದರೆ ಎಲ್ಲರಲ್ಲೂ ಪರಿಸರ ಸ್ವಚ್ಛತೆಯ ಬಗ್ಗೆ ಜಾಗೃತಿ ಮೂಡಲು ಸಾಧ್ಯವಿದೆ.

 ಕಿರಣ್‌ ಸರಪಾಡಿ