ಜೆಡಿಎಸ್‌ ತೊರೆಯಲು ಮುಂದಾಗಿರುವ ಬೆಂಬಲಿಗರು

Team Udayavani, Mar 27, 2018, 6:45 AM IST

ಬೆಂಗಳೂರು: ಜೆಡಿಎಸ್‌ನ ಏಳು ಮಾಜಿ ಶಾಸಕರು ಪಕ್ಷ ತೊರೆದು ಕಾಂಗ್ರೆಸ್‌ ಸೇರಿದ ಬೆನ್ನಲ್ಲೇ ಅವರ ಕ್ಷೇತ್ರಗಳಲ್ಲಿ ಜೆಡಿಎಸ್‌ನ ಪದಾಧಿಕಾರಿಗಳು, ಸ್ಥಳೀಯ ಸಂಸ್ಥೆಗಳ ಪ್ರತಿನಿಧಿಗಳನ್ನೂ ತಮ್ಮ ಜತೆ ಕರೆದೊಯ್ಯಲು ಮುಂದಾಗಿದ್ದಾರೆ.

ಎಐಸಿಸಿ ಅಧ್ಯಕ್ಷ ರಾಹುಲ್‌ಗಾಂಧಿ ಸಮ್ಮುಖ ಜೆಡಿಎಸ್‌ನ ಏಳು ಮಾಜಿ ಶಾಸಕರು ಸೇರ್ಪಡೆ ಸಂದರ್ಭದಲ್ಲಿ ಜೆಡಿಎಸ್‌ ಅಲ್ಪಸಂಖ್ಯಾತರ ಘಟಕದ ರಾಜ್ಯಾಧ್ಯಕ್ಷರಾಗಿದ್ದ ಎಚ್‌.ಎಂ.ಶಕೀಲ್‌ ನವಾಜ್‌ ಸೇರಿ ಹಲವರು ಕಾಂಗ್ರೆಸ್‌ಗೆ ಸೇರ್ಪಡೆಗೊಂಡಿದ್ದು, ಸದ್ಯದಲ್ಲೇ ಕೆಪಿಸಿಸಿ ಕಚೇರಿಯಲ್ಲಿ ಜಮೀರ್‌ ಅಹಮದ್‌, ಚೆಲುವರಾಯಸ್ವಾಮಿ ಸೇರಿ ಏಳು ಮಾಜಿ ಶಾಸಕರು,ಎಂ.ಸಿ.ನಾಣಯ್ಯ ಸೇರಿ ಮೂವರು ಮಾಜಿ ವಿಧಾನಪರಿಷತ್‌ ಸದಸ್ಯರ ಸಾಕಷ್ಟು ಬೆಂಬಲಿಗರು, ಸ್ಥಳೀಯ ಸಂಸ್ಥೆಗಳ ಪ್ರತಿನಿಧಿಗಳು ಕಾಂಗ್ರೆಸ್‌ ಸೇರಲಿದ್ದಾರೆಂದು ಮೂಲಗಳು ತಿಳಿಸಿವೆ.

ಈ ಮಧ್ಯೆ, ಮಾಜಿ ಶಾಸಕರ ಜತೆ ಹೋಗಲಿರುವ ಬೆಂಬಲಿಗರನ್ನು ತಡೆಯುವ ಕಾರ್ಯವೂ ಜೆಡಿಎಸ್‌ನಿಂದ ಆಗುತ್ತಿದ್ದು ನಾಗಮಂಗಲ, ಮಾಗಡಿ, ಚಾಮರಾಜಪೇಟೆ ಮುಖಂಡರ ಜತೆ ಖುದ್ದು ದೇವೇಗೌಡ, ಕುಮಾರಸ್ವಾಮಿ ಸಂಪರ್ಕದಲ್ಲಿದ್ದಾರೆಂದು ಹೇಳಲಾಗಿದೆ.

ಅಲ್ಪಸಂಖ್ಯಾತರ ಮುಖಂಡರನ್ನು ನೇರವಾಗಿ ತಮ್ಮ ನಿವಾಸಕ್ಕೆ ಕರೆಸಿ ಮಾತನಾಡುತ್ತಿರುವ ದೇವೇಗೌಡರು, ತಮ್ಮ
ಅಧಿಕಾರವಧಿಯಲ್ಲಿ ಅಲ್ಪಸಂಖ್ಯಾತರಿಗಾಗಿ ಕೈಗೊಂಡಿರುವ ಕ್ರಮಗಳನ್ನು ಮನವರಿಕೆ ಮಾಡಿಕೊಟ್ಟು, ಪಕ್ಷದಲ್ಲೇ ಉಳಿಯುವಂತೆ ಮನವೊಲಿಸುತ್ತಿದ್ದಾರೆಂದು ತಿಳಿದು ಬಂದಿದೆ.