ಅರಿಹಂತ್‌ ನೌಕೆ ಮಾಹಿತಿ ನೀಡಲು ಅಸಾಧ್ಯ: ಕೇಂದ್ರ

Team Udayavani, Mar 29, 2018, 7:00 AM IST

ಹೊಸದಿಲ್ಲಿ: ಸ್ವದೇಶಿ ನಿರ್ಮಿತ ಐಎನ್‌ಎಸ್‌ ಅರಿಹಂತ್‌ ಜಲಾಂತರ್ಗಾಮಿ ನೌಕೆಯು ಕಳೆದ ವರ್ಷ ಹಾನಿಗೀಡಾದಾಗ ನೌಕೆಗಾದ ಹಾನಿಯ ಪ್ರಮಾಣ ಹಾಗೂ ಅದರ ದುರಸ್ತಿಗಾಗಿ ತಗುಲಿದ ವೆಚ್ಚದ ಮಾಹಿತಿಯನ್ನು ನೀಡಲು ಕೇಂದ್ರ ಸರಕಾರ ನಿರಾಕರಿಸಿದೆ.

ಲೋಕಸಭೆಯಲ್ಲಿ, ಬಿಜೆಡಿ ಸಂಸದ ಪಿನಾಕಿ ಮಿಶ್ರಾ ಅವರು, ಲಿಖೀತ ರೂಪದಲ್ಲಿ ಸಲ್ಲಿಸಿದ್ದ ಪ್ರಶ್ನೆಗೆ ಬುಧವಾರ ಉತ್ತರಿಸಿದ ರಕ್ಷಣಾ ಇಲಾಖೆ ಸಹಾಯಕ ಸಚಿವ ಸುಭಾಷ್‌ ಭಾಮ್ರೆ, “ರಾಷ್ಟ್ರೀಯ ಭದ್ರತೆಯ ಹಿನ್ನೆಲೆಯಲ್ಲಿ, ಮಾಹಿತಿ ನೀಡಲು ಸಾಧ್ಯವಿಲ್ಲ’ ಎಂದು ತಿಳಿಸಿದರು. ಕಳೆದ ವರ್ಷ ಸಿಬ್ಬಂದಿಯ ಕಣ್ತಪ್ಪಿನಿಂದಾದ ಅವಗಢದಿಂದ “ಅರಿಹಂತ್‌’ ಹಾನಿಗೀಡಾಗಿರುವುದಾಗಿ ವದಂತಿಗಳು ಹರಡಿತ್ತು.

ಮತ್ತೂಂದು ಪ್ರಶ್ನೆಗೆ ಉತ್ತರಿಸಿದ ಅವರು, ಭಾರತ ಮತ್ತು ಫ್ರಾನ್ಸ್‌ ನಡುವೆ ರಕ್ಷಣಾ ವಲಯಕ್ಕೆ ಸಂಬಂಧಪಟ್ಟಂತೆ ಏರ್ಪಟ್ಟಿರುವ ಒಪ್ಪಂದಗಳನ್ನೂ ಬಹಿರಂಗಗೊಳಿಸಲಾಗುವುದಿಲ್ಲ ಎಂದರು. ಇದೇ ತಿಂಗಳ ಆರಂಭದಲ್ಲಿ, ಫ್ರಾನ್ಸ್‌ನ ಅಧ್ಯಕ್ಷ ಎಮಾನ್ಯುವಲ್‌ ಮ್ಯಾಕ್ರನ್‌ ಅವರು ಭಾರತಕ್ಕೆ ಆಗಮಿಸಿದ್ದಾಗ, ಮಾ. 10ರಂದು ರಕ್ಷಣಾ ಸಹಕಾರಕ್ಕೆ ಸಂಬಂಧಿಸಿದಂತೆ ಒಪ್ಪಂದವೊಂದಕ್ಕೆ ಸಹಿ ಹಾಕಲಾಗಿತ್ತು.