ಸಿನೆಮಾ ಸಮಾಚಾರ: ಶುಭಾಶಯ

Team Udayavani, Apr 1, 2018, 7:30 AM IST

ಬಹುಶಃ ಕನ್ನಡ ಚಿತ್ರರಂಗದಲ್ಲಿ ಅತೀ ಹೆಚ್ಚು ಚಿತ್ರಗಳಲ್ಲಿ ನಟಿಸುವುದರ ಜೊತೆಗೆ ಅತೀ ಹೆಚ್ಚು ವರ್ಷಗಳ ಕಾಲ ಯಾರಾದರೂ ನಟಿ ಇದ್ದಾರೆಂದರೆ, ಅದು ಶುಭಾ ಪೂಂಜ. ಇತ್ತೀಚೆಗಷ್ಟೇ ಅವರ ಅಭಿನಯದ ಗೂಗಲ್‌ ಎಂಬ ಚಿತ್ರ ಬಿಡುಗಡೆಯಾಗಿ, ಅವರ ಅಭಿನಯದ ಬಗ್ಗೆ ಒಂದಿಷ್ಟು ಒಳ್ಳೆಯ ಮಾತು ಕೇಳಿ ಬಂದಿತ್ತು. ಅದಲ್ಲದೆ, ಶುಭಾ ಕೈಯಲ್ಲಿ ಜಯಮಹಲ್‌, ನರಗುಂದ ಭಂಡಾಯ  ಸೇರಿದಂತೆ ಒಂದಿಷ್ಟು ಚಿತ್ರಗಳಿವೆ ಮತ್ತು ಆ ಪೈಕಿ ಜಯಮಹಲ್‌ ಎಂಬ ಚಿತ್ರವು ಈ ವಾರ ರಾಜ್ಯಾದ್ಯಂತ ಬಿಡುಗಡೆಯಾಗುತ್ತಿದೆ.

ಒಂದು ಕಾಲದಲ್ಲಿ ಶುಭಾ ಪೂಂಜಾ ಎಂದರೆ ಮೊದಲು ನೆನಪಿಗೆ ಬರುತ್ತಿದ್ದುದು ಗ್ಲಾಮರ್‌ ಹುಡುಗಿ ಎಂದು. ಗ್ಲಾಮರ್‌ ವಿಷಯದಲ್ಲಿ ಹೆಚ್ಚು ಸುದ್ದಿಯಾದ ಕನ್ನಡದ ಕೆಲವೇ ಕೆಲವು ನಟಿಯರಲ್ಲಿ ಶುಭಾ ಕೂಡಾ ಒಬ್ಬರು. ಈ ಬಗ್ಗೆ ಶುಭಾಗೆ ಬೇಸರವೇನಿಲ್ಲ. ಅದರ ಬದಲು ಖುಷಿ ಇದೆ. “”ವೈಯಕ್ತಿಕವಾಗಿ ನನಗೆ ಗ್ಲಾಮರಸ್‌ ಆಗಿರಲು ಬಹಳ ಇಷ್ಟ. ಚಿಕ್ಕಂದಿನಿಂದಲೂ ನಾನು ಬಾಲಿವುಡ್‌ ನಟಿಯರನ್ನು ನೋಡಿ ಬೆಳೆದವಳು. ನಾನೂ ಈ ತರಹ ಕಾಸ್ಟೂéಮ್‌ ಹಾಕಬೇಕೆಂದು ಕನಸು ಕಂಡವಳು. ನಟಿಯಾಗಿ ಆ ಆಸೆಯನ್ನು ಈಡೇರಿಸಿಕೊಂಡಿದ್ದೇನೆ. ನಾನು ಚಿತ್ರರಂಗಕ್ಕೆ ಬಂದ ಕೆಲವು ವರ್ಷಗಳ ಕಾಲ ಗ್ಲಾಮರಸ್‌ ಆಗಿ ಕಾಣಿಸಿಕೊಂಡೆ. ಈಗಲೂ ಗ್ಲಾಮರಸ್‌ ಆಗಿ ಕಾಣಿಸಿಕೊಂಡರೆ ಅದರಲ್ಲಿ ಅರ್ಥವಿಲ್ಲ. ಯಾವ ಸಮಯದಲ್ಲಿ ಏನು ಮಾಡಬೇಕೋ ಅದನ್ನು ಮಾಡಬೇಕು. ಹಾಗಾಗಿ ಗ್ಲಾಮರಸ್‌ ಆಗಿ ಕಾಣಿಸಿಕೊಂಡೆ ಮತ್ತು ಜನ ಕೂಡ ಇಷ್ಟಪಟ್ಟರು. ಒಂದು ವಯಸ್ಸು ದಾಟಿದ ನಂತರ ಹೇಗಿರಬೇಕೋ ಹಾಗಿರಬೇಕು. ಅದೇ ಕಾರಣಕ್ಕೆ ನಾನು ಅಭಿನಯಕ್ಕೆ ಹೆಚ್ಚು ಒತ್ತಿರುವ ಪಾತ್ರಗಳಲ್ಲಿ ಕಾಣಿಸಿಕೊಳ್ಳುತ್ತಿದ್ದೀನಿ” ಎನ್ನುತ್ತಾರೆ ಶುಭಾ ಪೂಂಜಾ.

ಶುಭಾ ಹೇಳುವಂತೆ ಈಗ ಅವರ ಪಾತ್ರಗಳ ಆದ್ಯತೆ ಬದಲಾಗಿದೆ. ಬಹುಶಃ ಕೋಟಿಗೊಂದ್‌ ಲವ್‌ಸ್ಟೋರಿ ಎಂಬ ಚಿತ್ರದಲ್ಲಿ ಗ್ಲಾಮರಸ್‌ ಆಗಿ ಕಾಣಿಸಿಕೊಂಡಿದ್ದು ಬಿಟ್ಟರೆ, ಮಿಕ್ಕಂತೆ ಇತ್ತೀಚಿನ ಚಿತ್ರಗಳಲ್ಲಿ ಬೇರೆ ರೀತಿಯ ಪಾತ್ರಗಳ ಹುಡುಕಾಟದಲ್ಲಿದ್ದಾರೆ ಎಂದರೆ ತಪ್ಪೇನಿಲ್ಲ.  ಗೂಗಲ್‌ನಲ್ಲಿ ಗ್ಲಾಮರ್‌ ಇಲ್ಲದ ಸೀರಿಯಸ್‌ ಪಾತ್ರ ಮಾಡಿರುವ ಶುಭಾ, ಈಗ ನರಗುಂದ ಬಂಡಾಯದಲ್ಲೂ ಗಂಭೀರ ಪಾತ್ರ ಮಾಡಿದ್ದಾರೆ. ಮುಂದೆ ಮಹಿಳಾ ಪ್ರಧಾನ ಚಿತ್ರಗಳನ್ನು ಮಾಡುವ ಆಲೋಚನೆಯೂ ಅವರಿಗಿದೆಯಂತೆ.

ಇನ್ನು ಶುಭಾ ತಮ್ಮ ಮುಂಬರುವ ಚಿತ್ರಗಳ ಬಗ್ಗೆ ಸಾಕಷ್ಟು ನಿರೀಕ್ಷೆ ಇಟ್ಟುಕೊಳ್ಳುವುದರ ಜೊತೆಗೆ, ಇನ್ನೊಂದಿಷ್ಟು ಒಳ್ಳೆಯ ಪಾತ್ರಗಳಲ್ಲಿ ಕಾಣಿಸಿಕೊಳ್ಳಬೇಕು ಎಂದು ಎದರುನೋಡುತ್ತಿದ್ದಾರೆ. “”ನಾನು ಚಿತ್ರರಂಗಕ್ಕೆ ಬಂದ ಹೊಸತರಲ್ಲಿ ನಾಯಕಿಯರಿಗೆ ಭವಿಷ್ಯ ಕಡಿಮೆ ಎಂದು ಹೇಳುತ್ತಿದ್ದರು. ಆದರೆ, ನನಗೆ ನನ್ನ ಮೇಲೆ ವಿಶ್ವಾಸವಿತ್ತು. ಕಲಾವಿದರಿಗೆ ಎಲ್ಲಕ್ಕಿಂತ ಹೆಚ್ಚಾಗಿ ತಮ್ಮ ಮೇಲೆ ವಿಶ್ವಾಸವಿರಬೇಕು. ಒಂದೆರಡು ಸಿನಿಮಾ ಸೋತ ಕೂಡಲೇ ಕೆರಿಯರ್‌ ಮುಗಿದೇ ಹೋಯಿತು ಎಂದು ಸುಮ್ಮನಿರಬಾರದು. ಆ ವಿಷಯದಲ್ಲಿ ನಾನು ಬಂದಿದ್ದನ್ನು ಬಂದಂತೆ ಸ್ವೀಕರಿಸುತ್ತ ಸಾಗಿದೆ. ಅದರ ಪರಿಣಾಮವೇ ಇಷ್ಟೆಲ್ಲಾ ಚಿತ್ರಗಳಲ್ಲಿ ನಟಿಸುವುದಕ್ಕೆ ಸಾಧ್ಯವಾಗುತ್ತಿದೆ’ ಎನ್ನುತ್ತಾರೆ ಶುಭಾ ಪೂಂಜ.