ಕಾಶ್ಮೀರ: ಉಗ್ರರ ಗುಂಡಿಗೆ ಓರ್ವ ಪೊಲೀಸ್‌ ಬಲಿ

Team Udayavani, Apr 1, 2018, 7:00 AM IST

ಶ್ರೀನಗರ: ದಕ್ಷಿಣ ಕಾಶ್ಮೀರದ ಪುಲ್ವಾಮಾ ಮತ್ತು ಅನಂತ ನಾಗ್‌ ಜಿಲ್ಲೆಯಲ್ಲಿ ಶನಿವಾರ ನಡೆದ ಪ್ರತ್ಯೇಕ ಘಟನೆಗಳಲ್ಲಿ ಉಗ್ರರ ಗುಂಡಿನ ದಾಳಿಗೆ ಓರ್ವ ಪೊಲೀಸ್‌ ಹತ್ಯೆಯಾಗಿದ್ದು, ಇನ್ನೊಬ್ಬ ನಾಗರಿಕ ಗಾಯಗೊಂಡಿದ್ದಾರೆ. 

ಅಪರಿಚಿತ ಉಗ್ರನೊಬ್ಬ ಪುಲ್ವಾಮಾ ಜಿಲ್ಲೆ ಮುರ್ರನ್‌ ಚೌಕದಲ್ಲಿ ವಿಶೇಷ ಪೊಲೀಸ್‌ ಅಧಿಕಾರಿ ಮೊಹಮ್ಮದ್‌ ಅಶ್ರಫ್ ಮೀರ್‌ ಮೇಲೆ ಗುಂಡಿನ ದಾಳಿ ನಡೆಸಿದ್ದ. ತಕ್ಷಣವೇ ವ್ಯಕ್ತಿ ಯನ್ನು ಸಮೀಪದ ಆಸ್ಪತ್ರೆಗೆ ದಾಖಲಿಸಲಾಗಿ ತ್ತಾದರೂ, ಬದುಕುಳಿಯಲಿಲ್ಲ. ಆರಂಭದಲ್ಲಿ ಮೊಹಮ್ಮದ್‌ರನ್ನು ನಾಗರಿಕ ಎಂದು ಪರಿಗಣಿಸಲಾಗಿತ್ತು. ಆದರೆ ಕೊನೆಗೆ ಮೊಹಮ್ಮದ್‌ ವಿಶೇಷ ಅಧಿಕಾರಿ ಎಂಬುದು ತಿಳಿದುಬಂತು.

ಶನಿವಾರ ಬೆಳಗ್ಗೆ ನಡೆದ ಇನ್ನೊಂದು ಘಟನೆಯಲ್ಲಿ, ಉಗ್ರರ ದಾಳಿಯಿಂದಾಗಿ ಎಸ್‌ಪಿಒ ತುರಂಗ್‌ ಸಿಂಗ್‌ ಗಾಯಗೊಂಡಿದ್ದಾರೆ. ಅನಂತ ನಾಗ್‌ ಜಿಲ್ಲೆಯ ಖನಬಲ್‌ ಚೌಕದ ಬಳಿ ಉಗ್ರರು ಗುಂಡಿನ ದಾಳಿ ನಡೆಸಿದ್ದಾರೆ. ತತ್‌ಕ್ಷಣವೇ ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ಸ್ವಲ್ಪ ಮಟ್ಟಿಗೆ ಅವರು ಚೇತರಿಸಿಕೊಂಡಿದ್ದಾರೆ.