ಅವಧಿ ಮುನ್ನವೇ ಜೈಲಿಗೆ ಮರಳಿದ ಶಶಿಕಲಾ

Team Udayavani, Apr 1, 2018, 12:55 PM IST

ಬೆಂಗಳೂರು: ಅಕ್ರಮ ಆಸ್ತಿ ಗಳಿಕೆ ಪ್ರಕರಣದಲ್ಲಿ ಸಜಾಕೈದಿಯಾಗಿರುವ ತಮಿಳುನಾಡಿನ ಶಶಿಕಲಾ ಹದಿನೈದು ದಿನಗಳ ಪೆರೋಲ್‌ ಅವಧಿ ಪೂರ್ಣಗೊಳ್ಳುವ ಮುನ್ನವೇ ಜೈಲಿಗೆ ವಾಪಾಸಾಗಿದ್ದಾರೆ.

ಮಾ. 19ರಂದು ರಾತ್ರಿ ಅನಾರೋಗ್ಯದಿಂದ ಮೃತಪಟ್ಟ ಪತಿ ನಟರಾಜನ್‌ ಅಂತಿಮ ವಿಧಿ ವಿಧಾನ ಹಾಗೂ ಇನ್ನಿತರೆ ಕಾರ್ಯಗಳಲ್ಲಿ ಪಾಲ್ಗೊಳ್ಳುವ ಸಲುವಾಗಿ 15 ದಿನಗಳ ಕಾಲ ಪೆರೋಲ್‌ ಪಡೆದುಕೊಂಡು ಮಾ. 20ರಂದು ಚೆನೈಗೆ ತೆರಳಿದ್ದರು.

ಏಪ್ರಿಲ್‌ 3ರ ತನಕ ಶಶಿಕಲಾ ಪೆರೋಲ್‌ ಅವಧಿಯಿತ್ತು. ಶನಿವಾರ ಸಂಜೆ 4-15ರ ಸುಮಾರಿಗೆ ಶಶಿಕಲಾ ಅವರು ಜೈಲಿಗೆ ವಾಪಾಸ್‌ ಆಗಿದ್ದು, ಜೈಲು ನಿಯಮಾವಳಿಗಳ ಅನ್ವಯ ಅವರನ್ನು ತಪಾಸಣೆ ಹಾಗೂ ಇನ್ನಿತರೆ ಪ್ರಕ್ರಿಯೆಗಳನ್ನು ಪೂರ್ಣಗೊಳಿಸಿ ಜೈಲು ಕೊಠಡಿಗೆ ಕಳುಹಿಸಲಾಯಿತು.

ಈ ಹಿಂದೆ ಪೆರೋಲ್‌ ಅವಧಿಯಲ್ಲಿಯೂ ನಿಗದಿತ ದಿನ ವಾಪಾಸ್‌ ಬಂದಿದ್ದರು ಎಂದು ಜೈಲು ಅಧಿಕಾರಿಯೊಬ್ಬರು ತಿಳಿಸಿದರು. ಪತಿ ನಟರಾಜನ್‌ ನಿಧನದ ಬಳಿಕ ಸಂಬಂಧಿಕರ ನಡುವೆ ಕೆಲ ವಿಚಾರಗಳಿಗೆ ಸಂಬಂಧಪಟ್ಟಂತೆ ವೈಮನಸ್ಯ ಉಂಟಾಗಿತ್ತು. ಹೀಗಾಗಿ, ಪೆರೋಲ್‌ ಅವಧಿಗೆ ಮುನ್ನವೇ ಶಶಿಕಲಾ ವಾಪಸ್‌ ಬಂದಿದ್ದಾರೆ ಎಂದೂ ಹೇಳಲಾಗಿದೆ.