ಕಿರುಚಿತ್ರರಂಗದಲ್ಲಿ ಗಡಿನಾಡಿನ ‘ಕಪ್ಪು-ಬಿಳುಪು’ ಹುಡುಗ

Team Udayavani, Apr 4, 2018, 9:30 AM IST

ಬದಿಯಡ್ಕ: ಸಿನಿಮಾ ರಂಗ ಪ್ರೇಕ್ಷಕರನ್ನು ಎಂದೂ ತನ್ನತ್ತ ಸೆಳೆಯುವುದರಲ್ಲಿ ಹಿಂದುಳಿದಿಲ್ಲ. ಹೊಸ ಸಿನೆಮಾಗಳು ಕೈಯಲ್ಲೇ ನೋಡಬಹುದಾದ ತಂತ್ರಜ್ಞಾನ ಬೆಳೆದರೂ ಜನರು ಥಿಯೇಟರ್‌ ಕಡೆಗೆ ಹೋಗುವುದೂ ನಿಲ್ಲಲಿಲ್ಲ. ಒಂದೆಡೆ ನಟರಾಗುವ ಕನಸು ಕಾಣುವ ಯುವಜನತೆ ಅವಕಾಶಕ್ಕಾಗಿ ಜಾಲಾಡುವಾಗ ಇನ್ನೊಂದೆಡೆ ನಿರ್ಮಾಣ, ನಿರ್ದೇಶನದತ್ತ ಮುಖಮಾಡಿರುವ ಗುಂಪು ಇನ್ನೊಂದೆಡೆ.  ಈ ಯುವ ನಿರ್ದೇಶಕರು, ನವ ನಿರ್ಮಾಪಕರು ಆಧುನಿಕ ತಂತ್ರಜ್ಞಾನವನ್ನು ಬಳಸಿ ತಮ್ಮ ಕನಸುಗಳನ್ನು ಸಾಕಾರಗೊಳಿಸುತ್ತಿರುವುದು  ಕಂಡುಬರುತ್ತದೆ. ಪ್ರೇಕ್ಷಕರಿಗೆ  ಹೊಸ ಅನುಭವವನ್ನು ಉಣಬಡಿಸುವಲ್ಲಿ ಇವರು ಸಫಲರಾಗಿದ್ದಾರೆ ಎನ್ನುವುದೇ ಇವರ ಗೆಲುವು.

ಕೆಲವೇ ನಿಮಿಷಗಳಲ್ಲಿ ಮುಗಿದು ಹೋಗುವ, ಉತ್ತಮ ಸಂದೆೇಶಗಳನ್ನು ನೀಡುವ, ನಮ್ಮ ನಡುವೆ ಇರುವ ಸಮಸ್ಯೆಗಳನ್ನೇ ವಿಷಯವಾಗಿಸಿ ಪ್ರಸ್ತುತ ಕಾಲಘಟ್ಟಕ್ಕೆ ಅನುಗುಣವಾಗಿ ಚಿತ್ರೀಕರಿಸಿ ಯೂಟ್ಯೂಬ್‌, ಫೇಸ್‌ಬುಕ್‌ಗಳಲ್ಲಿ ಹಂಚಿ ಲಕ್ಷಗಟ್ಟಲೆ ಪ್ರೇಕ್ಷಕರಿಂದ ವೀಕ್ಷಿಸಲ್ಪಟ್ಟು ಚಿತ್ರ ಹಿಟ್‌ ಆದಾಗ ಚಿತ್ರರಂಗದ ಬಾಗಿಲು ತೆರೆದು ಬಹುದೊಡ್ಡ ಕಲಾವಿದರಾಗಿ ಬೆಳೆದುಬಂದ ಉದಾಹರಣೆಗಳು ಬಹಳಷ್ಟಿವೆೆ. 

ಕೆಲವರಿಗೆ ಈ ಕಿರುಚಿತ್ರಗಳು, ಆಲ್ಬಂಗಳು ಒಂದು ಫ್ಯಾಷನ್‌ ಮಾತ್ರವಾದರೆ ಇನ್ನು ಕೆಲವರಿಗೆ ಅದುವೇ ಚಿತ್ರರಂಗಕ್ಕಿರುವ ಏಣಿ. ಪ್ರೀತಿ, ಪ್ರೇಮ, ಕಾಳಜಿ, ಸಾವು, ನೋವು ಎಲ್ಲವೂ ಇರುವ ಚಿತ್ರಗಳನ್ನು ಜನರು ಬಹಳ ಬೇಗನೆ ಇಷ್ಟಪಡುತ್ತಾರೆ. ಕೆಲವೊಮ್ಮೆ ಜೀವನದ ದಿಕ್ಕನ್ನು ಬದಲಾಯಿಸಿ ಹೊಸ ಮುನ್ನುಡಿ ಬರೆಯಲು ಈ ಚಿತ್ರಗಳು ಕಾರಣ ವಾಗುತ್ತವೆ. ಇದಕ್ಕೆ ಉದಾಹರಣೆ ಎಂಬಂತೆ ಕಾಸರಗೋಡಿನ ಶ್ರೀಕೃಷ್ಣ ಶರ್ಮ ಉಪ್ಪಂಗಳ ಬೆಳೆದುಬರುತ್ತಿದ್ದಾರೆ.

ಶ್ರೀ ಭಾರತಿ ವಿದ್ಯಾಪೀಠ, ಶ್ರೀ ಅನ್ನಪೂರ್ಣೇಶ್ವರಿ ಪ್ರೌಢ ಶಾಲೆ ಅಗಲ್ಪಾಡಿಯಲ್ಲಿ ಪ್ರೌಢ ಶಿಕ್ಷಣ ಮುಗಿಸಿ ಮಹಾಲಸ ಚಿತ್ರಕಲಾ ಶಾಲೆ ಮಂಗಳೂರಿನಲ್ಲಿ ಬಿ.ವಿ.ಎ. ಪದವಿ ಓದುತ್ತಿರುವ ಕೃಷ್ಣ ಶರ್ಮ ಮಹಾಲಿಂಗೇಶ್ವರ ಹಾಗೂ ಸಂಧ್ಯಾ ಸರಸ್ವತಿ ದಂಪತಿಯ ಮಗ. ಬಾಲ್ಯದಲ್ಲಿಯೇ ನಟನೆ ಹಾಗೂ ನಿರ್ದೇಶನದೆಡೆಗೆ ಆಸಕ್ತಿ ತೋರುತಿದ್ದ ಕೃಷ್ಣ ಶರ್ಮ ಮುಂದೆ ಆ ಕ್ಷೇತ್ರದತ್ತ ಹೆಜ್ಜೆಯನ್ನಿಟ್ಟರು. ಕಪ್ಪು ಹಣದ ಕರಾಳ ಜಗತ್ತಿನಲ್ಲಿ ನಡೆಯುವ ವಿದ್ಯಮಾನಗಳನ್ನು ವಿಷಯವಾಗಿಟ್ಟು ತಯಾರಿಸಿದ ಮೊದಲ ಕಿರುಚಿತ್ರ ಬ್ಲ್ಯಾಕ್‌ ಆಂಡ್‌ ವೈಟ್‌” 1026ರಲ್ಲಿ ಬೆಳಕು ಕಂಡಿತು. ಇದೊಂದು ಮೂಕಚಿತ್ರವಾಗಿದ್ದು ಜನಮನಗೆಲ್ಲುವಲ್ಲಿ ಯಶಸ್ಸು ಕಂಡಿತು. ಇದು ಇವರ ಎರಡನೇ ಕಿರುಚಿತ್ರ ‘ಕಂಬಳ”ಕ್ಕೆ ಪ್ರೇರಣೆಯಾಯಿತು. ಕಂಬಳದ ಉಳಿವಿಗಾಗಿ ನಿರ್ಮಿಸಿದ ತುಳುಭಾಷಾ ಚಿತ್ರ. ಗೆಳೆಯ ಅಮೋಘನ ನಿರ್ದೇಶನ ಈ ಚಿತ್ರದ ಗೆಲುವಿಗೆ ಕಾರಣವಾಯಿತು. ಲಕ್ಷಾಂತರ ಪ್ರೇಕ್ಷಕರನ್ನು ಸೆಳೆಯುವಲ್ಲಿ ಯಶಸ್ವಿಯಾಯಿತು.

ಕೃಷ್ಣ ಶರ್ಮರ ಮೂರನೇ ಕಿರುಚಿತ್ರ ‘ಕುರುಡು ಜೀವನ’ ಕುರುಡನ ಬದುಕಿನ ಬವಣೆಗಳನ್ನು, ಸವಾಲುಗಳನ್ನು ಎಳೆಎಳೆಯಾಗಿ ತೆರೆದಿಟ್ಟ ಚಿತ್ರ. ಅಮೋಘ ಹಾಗೂ ವಿನಾಯಕ ಹೆಗಡೆ ಪ್ರಧಾನ ಪಾತ್ರಗಳಲ್ಲಿ ಅಭಿನಯಿಸಿರುವ ಈ ಚಿತ್ರದ ಚಿತ್ರೀಕರಣ ಒಂದು ಸವಾಲಾಗಿತ್ತು. ಎದುರಾದ ಎಲ್ಲಾ ಅವಮಾನಗಳನ್ನೂ ಸಹಿಸಿ ಚಿತ್ರವನ್ನು ಪೂರ್ಣತೆಗೆ ತಂದ ಈ ಗೆಳೆಯರೆ ಕುರುಡು ಜೀವನವನ್ನು ಮುನ್ನಡೆಸಿದವರು ಎನ್ನುತ್ತಾರೆ ಕೃಷ್ಣ ಶರ್ಮ. ‘ಅಕ್ಕನ ಕರೆ’ ಯೋಧನ ಬದುಕಿನ ನೋವನ್ನು ಹಾಗೂ ಅಪ್ಪ-ಮಗಳ ಸಂಬಂಧದ ಆಳವನ್ನು ತೆರೆದಿಡುವ ಕಿರುಚಿತ್ರ. ಮನೀಶ್‌ ಕೋಟ್ಯಾನ್‌ ಹಾಗೂ ಮಯೂರಿ ಅಭಿನಯದ ಐದನೇ ಕಿರುಚಿತ್ರ ‘ಪ್ರೀತಿಯ ಆತ್ಮ’ ನವುರಾದ ಪ್ರೇಮಕಥೆಯನ್ನು ಒಳಗೊಂಡು ಯುವಜನರನ್ನು ಆಕರ್ಷಿಸುವಲ್ಲಿ ಪ್ರಧಾನ ಪಾತ್ರವಹಿಸಿದೆ. ವಿನಾಯಕ ಅವರ ಸುಂದರವಾದ ಕಥಾಹಂದರ ಈ ಚಿತ್ರಕ್ಕಿದೆ. 

ಈ ಕಿರುಚಿತ್ರಗಳ ಯಶಸ್ಸು ‘ಡಂಗುರ’ ಎಂಬ ಫೇಸ್‌ ಬುಕ್‌ ಪೇಜ್‌ ಪ್ರಾರಂಭಿಸುವಂತೆ ಕೃಷ್ಣ ಶರ್ಮ ಅವರನ್ನು ಪ್ರೇರೇಪಿಸಿತು. ಕನ್ನಡ ಹಾಗೂ ತುಳು ಚಿತ್ರರಂಗದ ಎಲ್ಲಾ ಮಾಹಿತಿಗಳನ್ನು ಈ ಪುಟದಲ್ಲಿ ಹಂಚಲಾಗುತ್ತಿತ್ತು. ಕನ್ನಡದ ಖ್ಯಾತ ನಟ ರಮೇಶ್‌ ಭಟ್‌ ಹಾಗೂ ಒಂದು ಮೊಟ್ಟೆಯ ಕಥೆ ಖ್ಯಾತಿಯ ಚಿತ್ರ ನಟ ಹಾಗೂ ನಿರ್ದೇಶಕ ರಾಜೇಶ್‌ ಬಿ. ಶೆಟ್ಟಿ ಕೃಷ್ಣ ಶರ್ಮರ ಚಟುವಟಿಕೆಗಳಿಗೆ ಬೆನ್ನೆಲುಬಾಗಿರುವ ಈ ತಂಡಕ್ಕೆ ನಿಶ್ಯಬ್ದ ಚಿತ್ರದ ನಾಯಕ ನಟ ರೂಪೇಶ್‌ ಶೆಟ್ಟಿ, ಕಟಪ್ಪಾಡಿ ಕಟ್ಟಪ್ಪ ಚಿತ್ರದ ನಿರ್ಮಾಪಕ ಹಾಗೂ ಕರ್ನಾಟಕ ಚಲನಚಿತ್ರ ಕಾರ್ಮಿಕರ ಒಕ್ಕೂಟದ ಅಧ್ಯಕ್ಷ ರಾಜೇಶ್‌ ಬ್ರಹ್ಮಾವರ, ಒಂದು ಮೊಟ್ಟೆಯ ಕಥೆ ಹಾಗೂ ಬಲೆ ತೆಲಿಪಾಲೆ ಖ್ಯಾತಿಯ ಪ್ರಕಾಶ್‌.ಕೆ ತೂಮಿನಾಡು, ಸೌಜನ್ಯ ಹೆಗಡೆ, ಅಸ್ಥಿಕ್‌, ಅವಿನಾಶ್‌, ಹಾಗೂ ಚಿತ್ರರಂಗದ ಪ್ರಮುಖರ ಬೆಂಬಲವಿದೆ.

ತಾನು ತಯಾರಿಸಿದ ಐದು ಚಿತ್ರಗಳಿಗೂ ಛಾಯಾಗ್ರಹಣ, ನಿರ್ದೇಶನ ಮುಂತಾದ ಜವಾಬ್ದಾರಿಗಳನ್ನು ನಿರ್ವಹಿಸುತ್ತಿರುವ ಕೃಷ್ಣ ಶರ್ಮ ‘ಹನುಮಾನ್‌ ಕ್ರಿಯೇಶನ್ಸ್‌’ ಎಂಬ ಯೂ ಟ್ಯೂಬ್‌ ಚಾನೆಲ್‌ನಲ್ಲಿ ತನ್ನ ಕಿರುಚಿತ್ರಗಳನ್ನು ಹರಿಯಬಿಡುತ್ತಿದ್ದಾರೆ. ಮಾತ್ರವಲ್ಲದೆ ಕನ್ನಡದ ಖ್ಯಾತ ನಿರ್ದೇಶಕ ಸತ್ಯಪ್ರಕಾಶ್‌ ಅವರ ”ಒಂದಲ್ಲಾ ಎರಡಲ್ಲಾ” ಚಿತ್ರಕ್ಕೆ ಸಹನಿರ್ದೇಶಕನಾಗಿಯೂ ಕೆಲಸಮಾಡಿರುವ ಕೃಷ್ಣ ಶರ್ಮ ತಾನೇ ಒಂದು ಚಿತ್ರವನ್ನು ನಿರ್ಮಿಸುವ ತಯಾರಿಯಲ್ಲಿದ್ದಾರೆ. ಆ ಚಿತ್ರದ ಚಿತ್ರಕಥೆ ಈಗಾಗಲೇ ಸಿದ್ಧಗೊಂಡಿದೆ. ಚಿಕ್ಕ ಪ್ರಾಯದ ಈ ಉತ್ಸಾಹಿ ಯುವಕನ ಕನಸು ನನಸಾಗಿ ಗಡಿನಾಡಿನ ಸಿನಿಮಾ ಪ್ರಿಯರ ನಿರೀಕ್ಷೆಗಳು ಸಾರ್ಥಕವಾಗಲಿ.

— ಅಖಿಲೇಶ್ ನಗುಮೊಗಮ್