ಮತದಾನ ಜಾಗೃತಿ: ಜಿಲ್ಲಾಡಳಿತದ ಪ್ರಯತ್ನಕ್ಕೆ ವಿದ್ಯಾರ್ಥಿಗಳ ಸಾಥ್‌

Team Udayavani, Apr 6, 2018, 7:05 AM IST

ಉಡುಪಿ: ವಿಧಾನಸಭಾ ಚುನಾವಣೆಯಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಮತದಾನ ಮಾಡಬೇಕೆಂಬ ಉದ್ದೇಶದಿಂದ ಜಿಲ್ಲಾಡಳಿತ ಮತ್ತು ಜಿಲ್ಲಾ ಸ್ವೀಪ್‌ ಸಮಿತಿ ಗುರುವಾರ ಆಯೋಜಿಸಿದ ಜಾಥಾದಲ್ಲಿ ದೊಡ್ಡ ಸಂಖ್ಯೆಯಲ್ಲಿ ಕಾಲೇಜು ವಿದ್ಯಾರ್ಥಿಗಳು ಪಾಲ್ಗೊಂಡರು.
 
ಬಸ್‌ ನಿಲ್ದಾಣ ಸಮೀಪದ ಕ್ಲಾಕ್‌ ಟವರ್‌ ಬಳಿ ವಿದ್ಯಾರ್ಥಿಗಳು ಬೃಹತ್‌ ಬ್ಯಾನರ್‌ನಲ್ಲಿ ಸಹಿ ಮಾಡಿದರು. ಬಳಿಕ “ಐ ವೋಟ್‌ ಆನ್‌ ಮೇ 12′ ಎಂದು ವಿದ್ಯಾರ್ಥಿಗಳಿಂದ ವ್ಯೂಹ ರಚಿಸಲಾಯಿತು. ಕ್ಲಾಕ್‌ ಟವರ್‌ನಿಂದ ಆರಂಭಗೊಂಡ ರ್ಯಾಲಿ ಪುರಭವನದವರೆಗೆ ನಡೆಯಿತು. 

ಜಿಲ್ಲಾ ಸ್ವೀಪ್‌ ಸಮಿತಿ ಅಧ್ಯಕ್ಷರಾದ ಜಿ.ಪಂ. ಸಿಇಒ ಶಿವಾನಂದ ಕಾಪಶಿ ಅವರು ಮೇ. 12ರಂದು ಜರಗುವ ಮತದಾನದಲ್ಲಿ ಕಡ್ಡಾಯವಾಗಿ ಭಾಗವಹಿಸುತ್ತೇವೆ ಎಂದು ಪ್ರತಿಜ್ಞಾವಿಧಿ ಬೋಧಿಸಿದರು.

ಡಿಡಿಪಿಐ ಶೇಷಶಯನ ಕಾರಿಂಜ, ಕುಂದಾಪುರ ಬಿಇಒ ಅಶೋಕ್‌ ಕಾಮತ್‌, ವಿದ್ಯಾರ್ಥಿಗಳಾದ ಎಂಜಿಎಂ ಕಾಲೇಜಿನ ಶ್ರೇಯಸ್‌ ಕೋಟ್ಯಾನ್‌, ತೆಂಕನಿಡಿ ಯೂರು ಕಾಲೇಜಿನ ವಿಜೇತಾ ಶೆಟ್ಟಿ ಅವರು ಮಾತನಾಡಿ ಮತದಾನ ಮಾಡಬೇಕಾದ ಅಗತ್ಯವನ್ನು ಪ್ರತಿಪಾದಿಸಿದರು. 

ಕ್ರೀಡಾ ಇಲಾಖೆ ಸಹಾಯಕ ನಿರ್ದೇಶಕ ರೋಶನ್‌ಕುಮಾರ್‌ ಶೆಟ್ಟಿ, ಪೌರಾಯುಕ್ತ ಮಂಜುನಾಥಯ್ಯ, ಹಾವಂಜೆ ಪ್ರಶಾಂತ್‌ ಶೆಟ್ಟಿ, ಕಾಲೇಜಿನ ಪ್ರಾಂಶುಪಾಲರು, ಉಪನ್ಯಾಸಕರು ಉಪಸ್ಥಿತರಿದ್ದರು. 

ಸಹಸ್ರಮಾನದ ಮತದಾರರಿಗೆ ವಿಶಿಷ್ಟ ಗೌರವ 

ಸಹಸ್ರಮಾನದ ಮತದಾರ ವಿದ್ಯಾರ್ಥಿಗಳನ್ನು ಒಂಟೆ, ಕುದುರೆಗಳ ಮೇಲೆ ಸವಾರಿ ಮಾಡಿ ಗೌರವ ಕೊಡಲಾಯಿತು.