ಗೇಮ್ಸ್‌: ಮಲೇರಿಯಾ ಭೀತಿ!

Team Udayavani, Apr 7, 2018, 7:00 AM IST

ಗೋಲ್ಡ್‌ ಕೋಸ್ಟ್‌: ಈಗಷ್ಟೇ ಕಾಮನ್ವೆಲ್ತ್‌ ಕೂಟಕ್ಕೆ ಈ ಮಲೇರಿಯಾ ಭೀತಿ ಅಪ್ಪಳಿಸಿದೆ. ಕ್ರೀಡಾ ಗ್ರಾಮದಲ್ಲಿ ತಂಗಿರುವ ಕ್ರೀಡಾಪಟುಗಳಿಗೆ ನಡುಕ ಹುಟ್ಟಿಸಿದೆ. ಮೂಲಗಳ ಪ್ರಕಾರ ಕೆಲವು ಆ್ಯತ್ಲೀಟ್‌ಗಳು ಜ್ವರದಿಂದ ಬಳಲುತ್ತಿದ್ದಾರೆ ಎನ್ನಲಾಗಿದೆ. ಅವರಲ್ಲಿ ಮೂವರು ಒಂದೇ ತಂಡದವರು ಎನ್ನಲಾಗಿದೆ. ಆದರೆ ಯಾವ ದೇಶದವರು, ಅವರ ಹೆಸರು ಏನು ಎನ್ನುವು ದರ ಕುರಿತು ಇನ್ನೂ ಮಾಹಿತಿ ಲಭ್ಯವಾಗಿಲ್ಲ.

ಓರ್ವ ಆ್ಯತ್ಲೀಟ್‌ ಮಲೇರಿಯಾಕ್ಕೆ ಸಿಲು ಕಿರುವುದು ಖಚಿತಗೊಂಡಿದೆ. ಆ್ಯತ್ಲೀಟ್‌ ಪರಿಸ್ಥಿತಿ ಗಂಭೀರವಾಗಿದ್ದು, ಗೋಲ್ಡ್‌ ಕೋಸ್ಟ್‌ ಯುವರ್ಸಿಟಿ ಆಸ್ಪತ್ರೆ ಯಲ್ಲಿ ಆತನಿಗೆ ಚಿಕಿತ್ಸೆ ನೀಡಲಾಗುತ್ತಿದೆ. ತುರ್ತು ನಿಗಾ ಘಟಕದಲ್ಲಿ ಚಿಕಿತ್ಸೆ ನೀಡಲಾಗುತ್ತಿದೆ ಎಂದು ವೈದ್ಯರು ತಿಳಿಸಿದ್ದಾರೆ ಎಂಬುದಾಗಿ ಸಂಘಟಕರು ಹೇಳಿದ್ದಾರೆ. ಇದೇ ವೇಳೆ ಆ್ಯತ್ಲೀಟ್‌ ಹೆಸರು ಹೇಳಲು ಸಂಘಟಕರು ನಿರಾಕರಿಸಿದ್ದಾರೆ.

ಆಸ್ಟ್ರೇಲಿಯ ಮಲೇರಿಯಾದಿಂದ ಮುಕ್ತ ವಾಗಿದೆ. ಇಲ್ಲಿ ಯಾವುದೇ ಅಂತಹ ಘಟನೆ ನಡೆದಿಲ್ಲ. ನಾವು ಎಲ್ಲ ರೀತಿಯ ಕ್ರಮ ತೆಗೆದುಕೊಂಡಿದ್ದೇವೆ ಎಂದು ಸಂಘಟಕರು ತಿಳಿಸಿದ್ದಾರೆ.