ಸಜೀಪಮುನ್ನೂರು: ತುಂಬೆ ಡ್ಯಾಂ ಸಂತ್ರಸ್ತ ರೈತರ ಹೋರಾಟ ಸಮಿತಿ ಸಭೆ

Team Udayavani, Apr 19, 2018, 11:42 AM IST

ಬಂಟ್ವಾಳ : ದ.ಕ. ಜಿಲ್ಲಾ ರೈತ ಸಂಘ, ಹಸಿರು ಸೇನೆ, ಬಂಟ್ವಾಳ ತಾಲೂಕು ಘಟಕ ಹಾಗೂ ತುಂಬೆ ಡ್ಯಾಂ ಸಂತ್ರಸ್ತ ರೈತರ ಹೋರಾಟ ಸಮಿತಿ ಸಭೆಯು ಸಜೀಪಮುನ್ನೂರುನಲ್ಲಿ ಮನೋಹರ್‌ ಶೆಟ್ಟಿ ನಡಿಕಂಬಳಗುತ್ತು ಅಧ್ಯಕ್ಷತೆಯಲ್ಲಿ ಜರಗಿತು.

ನೂತನ ತುಂಬೆ ಡ್ಯಾಂನಲ್ಲಿ 3 ತಿಂಗಳಿಂದ 6 ಮೀ. ನೀರು ಸಂಗ್ರಹಿಸಿ ರೈತರಿಗೆ ಯಾವುದೇ ರೀತಿಯಲ್ಲಿ ನೆಲಬಾಡಿಗೆ/ ಶಾಶ್ವತ ಪರಿಹಾರ ನೀಡದ ಜಿಲ್ಲಾಡಳಿತದ ರೈತ ವಿರೋಧಿ ನೀತಿಯ ಬಗ್ಗೆ ಸಂಬಂಧಿಸಿದ ಎಲ್ಲ ಜನ ಪ್ರತಿನಿಧಿಗಳಿಗೆ ಹಾಗೂ ಅಧಿಕಾರಿಗಳಿಗೆ ಲಿಖೀತ ಮನವಿ ನೀಡಿದ್ದು, ಈ ತನಕ ಯಾವುದೇ ಕ್ರಮಕೈಗೊಳ್ಳದಿರುವುದರಿಂದ ಸೂಕ್ತ ಪರಿಹಾರ ಕೂಡಲೇ ವ್ಯವಸ್ಥೆ ಮಾಡದಿದ್ದಲ್ಲಿ ಕಾನೂನು ಹೋರಾಟ ನಡೆಸಲು ಸಭೆ ಸರ್ವಾನುಮತದಿಂದ ತೀರ್ಮಾನಿಸಿತು.

ಇದೇ ಸಂದರ್ಭದಲ್ಲಿ ಆರ್‌ಟಿಐ ಕಾರ್ಯಕರ್ತ ಮತ್ತು ತಾಲೂಕು ರೈತ ಸಂಘ ಅಧ್ಯಕ್ಷ ದಿ| ಶರತ್‌ ಕುಮಾರ್‌ ನಿಧನಕ್ಕೆ ಶ್ರದ್ಧಾಂಜಲಿ ಅರ್ಪಿಸಲಾಯಿತು. ರೈತರ ಹೋರಾಟ ಸಮಿತಿ ಅಧ್ಯಕ್ಷ ಎಂ. ಸುಬ್ರಹ್ಮಣ್ಯ ಭಟ್‌, ಪದಾಧಿಕಾರಿಗಳಾದ ಎನ್‌.ಕೆ. ಇದಿನಬ್ಬ, ಪಿ. ಸುದೇಶ್‌ ಮಯ್ಯ, ಶೇಕಬ್ಬ, ಅಬ್ದುಲ್‌ ರಹಿಮಾನ್‌, ರಾಬರ್ಟ್‌ ಡಿ’ಸೋಜಾ, ದೇವರಾಜ ರೈ, ಶರತ್‌ ಕುಮಾರ್‌ ಶೆಟ್ಟಿ, ರಂಜನಿ ಉಪಸ್ಥಿತರಿದ್ದರು.