ಕದ್ರಿ: ಮೊದಲ ದಿನ ತಗ್ಗದ ವೀಕ್ಷಕರ ಸಂಖ್ಯೆ

Team Udayavani, Apr 21, 2018, 10:12 AM IST

ಮಹಾನಗರ: ಕದ್ರಿ ಉದ್ಯಾನವನದಲ್ಲಿ ಹೊಸದಾಗಿ ನಿರ್ಮಿಸಲಾಗಿರುವ ಸಂಗೀತ ಕಾರಂಜಿ, ಲೇಸರ್‌ ಶೋ ಹಾಗೂ ಉದ್ಯಾನವನ ವೀಕ್ಷಣೆಗೆ ಬರುವ ಸಾರ್ವಜನಿಕರಿಗೆ ಎ. 20ರಿಂದ ದರ ನಿಗದಿಪಡಿಸಲಾಗಿದ್ದು, ಮೊದಲ ದಿನ ಸಾಮಾನ್ಯ ದಿನದಂತೆಯೇ ವೀಕ್ಷಕರು ಆಗಮಿಸಿದ್ದರು.

ನೂತನ ದರದ ಬಗ್ಗೆ ಐದು ದಿನಗಳ ಹಿಂದೆಯೇ ಕದ್ರಿ ಉದ್ಯಾನವನದ ದ್ವಾರದಲ್ಲಿ ನಮೂದು ಮಾಡಲಾಗಿದ್ದು, ಇದರಿಂದಾಗಿ ಪ್ರವಾಸಿಗರು ಯಾವುದೇ ರೀತಿಯ ಗೊಂದಲಕ್ಕೊಳಗಾಗಲಿಲ್ಲ. ಸದ್ಯ ಶಾಲಾ ಮಕ್ಕಳಿಗೆ ಬೇಸಿಗೆ ರಜೆ ಇದ್ದುದರಿಂದ ಹೊರ ಜಿಲ್ಲೆಯ ಪ್ರವಾಸಿಗರು ಕೂಡ ಸಂಗೀತ ಕಾರಂಜಿ ಲೇಜರ್‌ ಶೋ ವೀಕ್ಷಣೆ ಮಾಡಲು ಆಗಮಿಸುತ್ತಿದ್ದಾರೆ.

ಕದ್ರಿ ಉದ್ಯಾನವನದಲ್ಲಿ ಸಂಗೀತ ಕಾರಂಜಿ ಲೇಸರ್‌ ಶೋ ಪ್ರತೀ ದಿನ ಸಂಜೆ 7.30 ರಿಂದ 8 ಗಂಟೆಯವರೆಗೆ ಇದ್ದು, ರಜಾ ದಿನಗಳಂದು (2ನೇ ಶನಿವಾರ, 4ನೇ ಶನಿವಾರ ಸೇರಿ) ಸಂಜೆ 7 ಗಂಟೆಯಿಂದ 7.30 ಮತ್ತು ರಾತ್ರಿ 8 ಗಂಟೆಯಿಂದ 8.30ರ ವರೆಗೆ ಪ್ರದರ್ಶನ ನಿಗದಿಪಡಿಸಲಾಗಿದೆ.

ಸಂಗೀತ ಕಾರಂಜಿ ಮತ್ತು ಲೇಸರ್‌ ಶೋ ವೀಕ್ಷಣೆಗೆ ವಯಸ್ಕರಿಗೆ 50 ರೂ., ಮಕ್ಕಳಿಗೆ 25 ರೂ. (6 ವರ್ಷದಿಂದ
12 ವರ್ಷದೊಳಗೆ), ಹಳೆ ಜಿಂಕೆ ಉದ್ಯಾನವನ ವೀಕ್ಷಣೆಗೆ ವಯಸ್ಕರಿಗೆ 10 ರೂ., ಮಕ್ಕಳಿಗೆ 5 ರೂ.(6 ವರ್ಷದಿಂದ 12 ವರ್ಷದೊಳಗೆ)ವನ್ನು ತೋಟಗಾರಿಕಾ ಇಲಾಖೆ ಈಗಾಗಲೇ ನಿಗದಿ ಮಾಡಿದೆ.