ಕರಾವಳಿ ಸ್ಪರ್ಧಾ ಕಣದಲ್ಲಿ ಕೋಟಿವೀರರು!

Team Udayavani, Apr 25, 2018, 1:09 PM IST

ಮಂಗಳೂರು: ದಕ್ಷಿಣ ಕನ್ನಡ ಹಾಗೂ ಉಡುಪಿ ಜಿಲ್ಲೆಯಲ್ಲಿ ವಿವಿಧ ಪಕ್ಷಗಳು ಹಾಗೂ ಪಕ್ಷೇತರ ಅಭ್ಯರ್ಥಿಗಳಾಗಿ ನಾಮಪತ್ರ ಸಲ್ಲಿಸಿದವರ ಪೈಕಿ ಬಹುತೇಕ ಮಂದಿ ಕೋಟ್ಯಧೀಶರು. ಒಟ್ಟು ಅಭ್ಯರ್ಥಿಗಳಲ್ಲಿ 26 ಮಂದಿಯ ಸಂಪತ್ತು ಕೋಟಿ ರೂ. ಮಿಕ್ಕಿದೆ!

ಮೊದಲ 4 ಸ್ಥಾನಿಗಳು
ಅಭ್ಯರ್ಥಿಗಳ ಪೈಕಿ 78.46 ಕೋ. ರೂ. ಸಂಪತ್ತು ಹೊಂದಿರುವ ಉಡುಪಿ ಕಾಂಗ್ರೆಸ್‌ ಅಭ್ಯರ್ಥಿ ಪ್ರಮೋದ್‌ ಮಧ್ವರಾಜ್‌ ಪ್ರಥಮ ಸ್ಥಾನದಲ್ಲಿದ್ದಾರೆ. ಅನಂತರದ ಸಾœನದಲ್ಲಿ ಬೈಂದೂರಿನ ಬಿಜೆಪಿ ಅಭ್ಯರ್ಥಿ ಸುಕುಮಾರ್‌ ಶೆಟ್ಟಿ ಅವರಿದ್ದು, 24 ಕೋ. ರೂ. ಸಂಪತ್ತು ಹೊಂದಿದ್ದಾರೆ. ತೃತೀಯ ಸ್ಥಾನದಲ್ಲಿ ಬಂಟ್ವಾಳ ಬಿಜೆಪಿ ಅಭ್ಯರ್ಥಿ ರಾಜೇಶ್‌ ನಾೖಕ್‌ ಅವರಿದ್ದು, ಒಟ್ಟು 21.52 ಕೋ. ರೂ. ಸಂಪತ್ತು ಹೊಂದಿದ್ದಾರೆ. 19.6 ಕೋಟಿ ರೂ. ಸಂಪತ್ತು ಹೊಂದಿರುವ ಮಂಗಳೂರು ಉತ್ತರ ಕಾಂಗ್ರೆಸ್‌ ಅಭ್ಯರ್ಥಿ- ಶಾಸಕ ಮೊದಿನ್‌ ಬಾವಾ ಅವರು ನಾಲ್ಕನೇ ಸ್ಥಾನದಲ್ಲಿದ್ದಾರೆ.

ಉಡುಪಿ ಬಿಜೆಪಿ ಅಭ್ಯರ್ಥಿ ರಘುಪತಿ ಭಟ್‌ 16.02 ಕೋ. ರೂ., ಮಂಗಳೂರು ದಕ್ಷಿಣ ಬಿಜೆಪಿ ಅಭ್ಯರ್ಥಿ ಡಿ. ವೇದವ್ಯಾಸ ಕಾಮತ್‌ 11.07 ಕೋ. ರೂ., ಬೆಳ್ತಂಗಡಿ ಕಾಂಗ್ರೆಸ್‌ ಅಭ್ಯರ್ಥಿ ಕೆ. ವಸಂತ ಬಂಗೇರ 6.70 ಕೋ. ರೂ., ಬೈಂದೂರು ಕಾಂಗ್ರೆಸ್‌ ಅಭ್ಯರ್ಥಿ ಗೋಪಾಲ ಪೂಜಾರಿ 5.15 ಕೋ. ರೂ., ಕುಂದಾಪುರ ಕಾಂಗ್ರೆಸ್‌ ಅಭ್ಯರ್ಥಿ ರಾಕೇಶ್‌ ಮಲ್ಲಿ 5 ಕೋ. ರೂ., ಮಂಗಳೂರು ಬಿಜೆಪಿ ಅಭ್ಯರ್ಥಿ ಸಂತೋಷ್‌ ಕುಮಾರ್‌ ರೈ ಬೋಳಿಯಾರು 3.92 ಕೋ. ರೂ. ಸಂಪತ್ತಿನ ಒಡೆಯರು. 

ಬಂಟ್ವಾಳ ಕಾಂಗ್ರೆಸ್‌ ಅಭ್ಯರ್ಥಿ, ಸಚಿವ ರಮಾನಾಥ ರೈ 3.8 ಕೋ.ರೂ., ಮೂಡಬಿದಿರೆ ಕಾಂಗ್ರೆಸ್‌ ಅಭ್ಯರ್ಥಿ ಅಭಯಚಂದ್ರ ಜೈನ್‌ 3.74 ಕೋ.ರೂ., ಮಂಗಳೂರು ದಕ್ಷಿಣ ಕಾಂಗ್ರೆಸ್‌ ಅಭ್ಯರ್ಥಿ ಜೆ.ಆರ್‌. ಲೋಬೋ 3.45 ಕೋ.ರೂ., ಕಾರ್ಕಳ ಬಿಜೆಪಿ ಅಭ್ಯರ್ಥಿ ಸುನಿಲ್‌ ಕುಮಾರ್‌ 2.91 ಕೋ.ರೂ., ಪುತ್ತೂರು ಕಾಂಗ್ರೆಸ್‌ ಅಭ್ಯರ್ಥಿ ಟಿ. ಶಕುಂತಳಾ ಶೆಟ್ಟಿ 2.65 ಕೋ. ರೂ., ಕಾಪು ಬಿಜೆಪಿ ಅಭ್ಯರ್ಥಿ ಲಾಲಾಜಿ ಮೆಂಡನ್‌ 2.39 ಕೋ.ರೂ. ಸಂಪತ್ತು ಹೊಂದಿದ್ದಾರೆ.

ಮೂಡಬಿದಿರೆ ಕ್ಷೇತ್ರದ ಜೆಡಿಎಸ್‌ ಅಭ್ಯರ್ಥಿ ಅಶ್ವಿ‌ನಿ ಪಿರೇರ 2.41 ಕೋ.ರೂ., ಬೆಳ್ತಂಗಡಿ ಬಿಜೆಪಿ ಅಭ್ಯರ್ಥಿ ಹರೀಶ್‌ ಪೂಂಜ 1.70 ಕೋ.ರೂ., ಬೆಳ್ತಂಗಡಿ ಜೆಡಿಎಸ್‌ ಅಭ್ಯರ್ಥಿ ಸುಮತಿ ಎಸ್‌. ಹೆಗ್ಡೆ 2.11 ಕೋ.ರೂ., ಕಾಪು ಶಾಸಕ ಹಾಗೂ ಕಾಂಗ್ರೆಸ್‌ ಅಭ್ಯರ್ಥಿ ವಿನಯ ಕುಮಾರ್‌ ಸೊರಕೆ 1.44 ಕೋ. ರೂ., ಮಂಗಳೂರು ಉತ್ತರ ಬಿಜೆಪಿ ಅಭ್ಯರ್ಥಿ ಡಾ| ವೈ. ಭರತ್‌ ಶೆಟ್ಟಿ 1.91 ಕೋ.ರೂ., ಮಂಗಳೂರು ಕಾಂಗ್ರೆಸ್‌ ಅಭ್ಯರ್ಥಿ, ಸಚಿವ ಯು.ಟಿ. ಖಾದರ್‌ 1.41 ಕೋ. ರೂ., ಮೂಡಬಿದಿರೆಯ ಇನ್ನೋರ್ವ ಜೆಡಿಎಸ್‌ ಅಭ್ಯರ್ಥಿ ಜೀವನ್‌ ಶೆಟ್ಟಿ 1.30 ಕೋ.ರೂ., ಸುಳ್ಯ ಬಿಜೆಪಿ ಅಭ್ಯರ್ಥಿ, ಶಾಸಕ ಎಸ್‌. ಅಂಗಾರ 1.12 ಕೋ. ರೂ. ಸಂಪತ್ತು ಹೊಂದಿದ್ದಾರೆ.

ಪುತ್ತೂರು ಬಿಜೆಪಿ ಅಭ್ಯರ್ಥಿ ಸಂಜೀವ ಮಠಂದೂರು 79.73 ಲಕ್ಷ ರೂ., ಕಾರ್ಕಳ ಕಾಂಗ್ರೆಸ್‌ ಅಭ್ಯರ್ಥಿ ಗೋಪಾಲ ಭಂಡಾರಿ  73.73 ಲಕ್ಷ ರೂ., ಮೂಡಬಿದಿರೆ ಬಿಜೆಪಿ ಅಭ್ಯರ್ಥಿ ಉಮಾನಾಥ ಕೋಟ್ಯಾನ್‌ 91 ಲಕ್ಷ ರೂ. ಸಂಪತ್ತು ಹೊಂದಿದ್ದಾರೆ.

ಕೋಟ್ಯಧಿಪತಿ ಪಕ್ಷೇತರರು
ಮಂಗಳೂರು ದಕ್ಷಿಣ ಪಕ್ಷೇತರ ಅಭ್ಯರ್ಥಿ ಶ್ರೀಕರ ಪ್ರಭು 4.42 ಕೋ.ರೂ. ಸಂಪತ್ತು ಹೊಂದಿದ್ದಾರೆ. ಇದೇ ಕ್ಷೇತ್ರದ ಪಕ್ಷೇತರ ಅಭ್ಯರ್ಥಿ ಮ್ಯಾಕ್ಸಿ ಪಿಂಟೋ 3.05 ಕೋ.ರೂ. ಒಡೆಯರು. 

ಅತೀ ಕಡಿಮೆ ಸಂಪತ್ತು
ಮಂಗಳೂರು ಕ್ಷೇತ್ರದ ಸಿಪಿಎಂ ಅಭ್ಯರ್ಥಿ ನಿತಿನ್‌ ಕುಮಾರ್‌ ಕುತ್ತಾರು ಅತೀ ಕಡಿಮೆ ಸಂಪತ್ತು ಹೊಂದಿರುವ ಅಭ್ಯರ್ಥಿ. ಅವರು 2.56 ಲಕ್ಷ ರೂ. ಸಂಪತ್ತು ಹೊಂದಿದ್ದಾರೆ. 

ಮಂಗಳೂರು ಉತ್ತರ ಸಿಪಿಎಂ ಅಭ್ಯರ್ಥಿ ಸುನೀಲ್‌ ಕುಮಾರ್‌ ಬಜಾಲ್‌ 16 ಲಕ್ಷ ರೂ. ಸಂಪತ್ತು ಹೊಂದಿದ್ದಾರೆ.