ಚುನಾವಣೆಗೆ ಅಗತ್ಯ ಪೂರ್ವ ಸಿದ್ಧತೆ: ಡಾ| ರಾಕೇಶ್‌ಕುಮಾರ್‌

Team Udayavani, Apr 26, 2018, 5:14 PM IST

ಶಿವಮೊಗ್ಗ: ವಿಧಾನಸಭಾ ಚುನಾವಣೆಗೆ ಸಂಬಂಧಿಸಿದಂತೆ ಜಿಲ್ಲಾಡಳಿತದ ವತಿಯಿಂದ ಈಗಾಗಲೇ ಚುನಾವಣಾ ಪೂರ್ವಸಿದ್ಧತೆಗಳನ್ನು ಕೈಗೊಳ್ಳಲಾಗುತ್ತಿದೆ ಎಂದು ಜಿಪಂ ಸಿಇಒ ಹಾಗೂ ಜಿಲ್ಲಾ ಸ್ವೀಪ್‌ ಸಮಿತಿ ಅಧ್ಯಕ್ಷ ಡಾ| ಕೆ. ರಾಕೇಶ್‌ ಕುಮಾರ್‌ ಹೇಳಿದರು.

ಜಿಲ್ಲಾ ವ್ಯವಸ್ಥಿತ ಮತದಾರರ ಶಿಕ್ಷಣ ಮತ್ತು ಮತದಾನದಲ್ಲಿ ಪಾಲ್ಗೊಳ್ಳುವಿಕೆ ಕಾರ್ಯಕ್ರಮದ ಅಂಗವಾಗಿ ಜಿಲ್ಲಾ ಚುನಾವಣಾ ಶಾಖೆ, ಮಹಾನಗರ ಪಾಲಿಕೆ ಹಾಗೂ ಸಾರ್ವಜನಿಕ ಶಿಕ್ಷಣ ಇಲಾಖೆ ಸಂಯುಕ್ತಾಶ್ರಯದಲ್ಲಿ ನಗರದ ಶಿವಪ್ಪನಾಯಕ ವೃತ್ತದ ಅಂಡರ್‌ಪಾಸ್‌ನ ಮುಖದ್ವಾರದಲ್ಲಿ ಗೋಡೆಬರಹಕ್ಕೆ ಚಾಲನೆ ನೀಡಿ ಅವರು ಮಾತನಾಡಿದರು.

ಈಗಾಗಲೇ ಚುನಾವಣೆಗಾಗಿ ನಿಗದಿಯಾಗಿರುವ ದಿನಾಂಕ ಜನಮಾನಸದಲ್ಲಿ ಅಚ್ಚಳಿಯದೇ ಉಳಿದು, ಮತದಾರರು ನಿಗದಿತ ದಿನಾಂಕದಂದು ಮತಗಟ್ಟೆಗೆ ತೆರಳಿ ಮತದಾನ ಪ್ರಕ್ರಿಯೆಯಲ್ಲಿ ಸಕ್ರಿಯವಾಗಿ ಪಾಲ್ಗೊಳ್ಳುವಂತಾಗಲು, ಮತದಾರರ ಮನಸ್ಸಿನಲ್ಲಿ ಸದಾ ನೆನಪಿನಲ್ಲುಳಿಯುವಂತೆ ಸ್ವೀಪ್‌ ಸಮಿತಿ ವತಿಯಿಂದ ಅನೇಕ ವಿನೂತನ ಕಾರ್ಯಕ್ರಮ ಆಯೋಜಿಸಲಾಗುತ್ತಿದೆ ಎಂದರು.

ಈ ರೀತಿಯ ಚಿತ್ರಬರಹ ಜನರಿಗೆ ನೇರವಾಗಿ ಚುನಾವಣೆಗೆ ಸಂಬಂಧಿಸಿದ ವಿಷಯಗಳನ್ನು ತಲುಪಿಸಬಲ್ಲವುಗಳಾಗಿವೆ. ಅಲ್ಲದೆ ಅದರ ಮಹತ್ವವನ್ನು ತಿಳಿಸಲಿವೆ. ಅಂತೆಯೇ ಗೋಡೆಬರಹಗಳು ದಿನನಿತ್ಯ ಕಣ್ಣಿಗೆ ಕಾಣುವುದರಿಂದ ಮತದಾರರಿಗೆ ಮತದಾನದ ದಿನಾಂಕವನ್ನು ಮತ್ತೆ ಮತ್ತೆ ನೆನಪಿಸಲಿವೆ. ಜತೆಗೆ ಇಂತಹ ಗೋಡೆ ಬರಹಗಳಿಂದ ನಗರದ ಸೌಂದರ್ಯ ವೃದ್ಧಿಯಾಗಲಿದೆ ಎಂದರು.

ಗೋಡೆಬರೆಹ ವಿಶೇಷವಾಗಿ ಹಸೆ ಹಾಗೂ ಜಾನಪದ ಮಾದರಿಯಾಗಿದ್ದು, ಹೆಚ್ಚು ಆಕರ್ಷಕವಾಗಿವೆ. ಆದ್ದರಿಂದಾಗಿ ಇವು ಜನರನ್ನು ಒಮ್ಮೆ ತನ್ನತ್ತ ಸೆಳೆಯುವುದರಲ್ಲಿ ಸಂದೇಹವಿಲ್ಲ. ಗೋಡೆ ಬರೆಹಗಳಲ್ಲಿ ಚುನಾವಣೆಯ ಘೋಷಣೆ, ವ್ಯಂಗ್ಯಚಿತ್ರ, ಮತದಾನ ಯಂತ್ರದ ಮಾದರಿ, ವಿವಿ ಪ್ಯಾಟ್‌ ಯಂತ್ರದ ಮಾದರಿ, ಮತಗಟ್ಟೆ ಕೇಂದ್ರ ಮುಂತಾದ ಚುನಾವಣಾ ಸಂದೇಶಗಳಿರುವ ಚಿತ್ರಗಳನ್ನು ನಗರದ ಆಯ್ದ ಹಾಗೂ ಜನನಿಬಿಡ ಸ್ಥಳಗಳಲ್ಲಿ ಚಿತ್ರಿಸಲು ಉದ್ದೇಶಿಸಲಾಗಿದೆ ಎಂದರು.

ಗೋಡೆ ಬರೆಹಗಳು ಮತದಾರರಿಗೆ ಆಮಿಷಗಳನ್ನು ನಿರಾಕರಿಸಿ, ತಮ್ಮಿಷ್ಟದಂತೆ ಹಕ್ಕು ಚಲಾಯಿಸುವ ಮೂಲಕ ಬಲಿಷ್ಟ ರಾಷ್ಟ್ರ ನಿರ್ಮಾಣ ಕಾರ್ಯದಲ್ಲಿ ತೊಡಗಿಸಿಕೊಳ್ಳುವಂತೆ ಪ್ರೇರೇಪಿಸುವಲ್ಲಿ ಹಾಗೂ ಮತದಾರನೊಬ್ಬ ಚಲಾಯಿಸುವ ಮತ ಅದು ಕೇವಲ ಒಂದು ಮತವಲ್ಲ ಬದಲಾಗಿ ಅದು ಪ್ರಜಾಪ್ರಭುತ್ವದ ಮೌಲ್ಯ ಎಂಬುದನ್ನು ತಿಳಿಸಲು ಸಹಕಾರಿಯಾಗಲಿವೆ ಎಂದು ಹೇಳಿದರು.

ಮಹಾನಗರಪಾಲಿಕೆ ಆಯುಕ್ತ (ಪ್ರಭಾರ) ಹಾಗೂ ಶಿವಮೊಗ್ಗ ನಗರ ಕ್ಷೇತ್ರದ ಚುನಾವಣಾಧಿಕಾರಿ ಮಹಾದೇವ ಎ. ಮುರಗಿ, ಸಾರ್ವಜನಿಕ ಶಿಕ್ಷಣ ಇಲಾಖೆ ಉಪನಿರ್ದೇಶಕ ಪಿ.ಎಸ್‌. ಮಚ್ಛಾಡೋ, ಪಾಲಿಕೆ ಸಾರ್ವಜನಿಕ ಸಂಪರ್ಕಾಧಿಕಾರಿ ಡಾ| ಶಿವಯೋಗಿ ಎಲಿ ಮತ್ತಿತರರು ಇದ್ದರು.