ಗುಂಡ್ಮಿ ಭಗವತಿ ರಸ್ತೆ ಅವ್ಯವಸ್ಥೆ : ನೋಟಾ ಪ್ರಯೋಗಕ್ಕೆ ಚಿಂತನೆ

Team Udayavani, Apr 27, 2018, 7:05 AM IST

ಕೋಟ: ಸಾಸ್ತಾನ ಡಿವೈನ್‌ ಪಾರ್ಕ್‌ ಎದುರಿನಿಂದ ಗುಂಡ್ಮಿ ಭಗವತಿ ದೇವಸ್ಥಾನದ ಮೂಲಕ ಹಾದು ಹೋಗುವ ರಸ್ತೆ ಅವ್ಯವಸ್ಥೆ ಬಗ್ಗೆ ಸಾರ್ವಜನಿಕರು ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. 

ಸುಮಾರು 100ಕ್ಕೂ ಹೆಚ್ಚು ಮನೆಗಳಿಗೆ ಸಂಪರ್ಕ ಕಲ್ಪಿಸುವ ಈ ರಸ್ತೆ ಅಭಿವೃದ್ಧಿಗಾಗಿ ಹಲವು ಬಾರಿ ಜನಪ್ರತಿನಿಧಿಗಳಿಗೆ ಮನವಿ ಸಲ್ಲಿಸಲಾಗಿದೆ. ಆದರೆ ಸ್ವಲ್ಪ, ಸ್ವಲ್ಪ ಕಾಮಗಾರಿ ಮಾಡಿದ್ದು ಹೊರತುಪಡಿಸಿದರೆ ಸಮಸ್ಯೆಗೆ ಶಾಶ್ವತ ಪರಿಹಾರ ಇದುವರೆಗೆ ಒದಗಿಸಿಲ್ಲ ಎನ್ನುವುದು ಸ್ಥಳೀಯರ ಆರೋಪವಾಗಿದೆ. ಹಲವು ಕಡೆಗಳಲ್ಲಿ ಮಣ್ಣಿನ ರಸ್ತೆ ಇದ್ದು, ವರ್ಷಂಪ್ರತಿ ಮಳೆಗಾಲದಲ್ಲಿ ತೀವ್ರ ಸಮಸ್ಯೆಯಾಗುತ್ತಿದೆ.  ಹೀಗಾಗಿ ಈ ಬಾರಿ  ಚುನಾವಣೆಗೆ ವೋಟು ಕೇಳಲು ಬರುವ ಜನಪ್ರತಿನಿಧಿಗಳಿಗೆ ನೋಟಾ ಪ್ರಯೋಗಿಸುತ್ತೇವೆಂದು ಬಿಸಿ ಮುಟ್ಟಿಸುತ್ತೇವೆ ಎಂದು ಇಲ್ಲಿನ ನಾಗರಿಕರು ತಿಳಿಸಿದ್ದಾರೆ.

ನೋಟಾ ಪ್ರಯೋಗ ಚಿಂತನೆ
ರಸ್ತೆ ಅಭಿವೃದ್ಧಿಪಡಿಸುವಂತೆ ಹಲವು ವರ್ಷದಿಂದ ಮನವಿ ಸಲ್ಲಿಸ್ತುತಿದ್ದೇವೆ. ಆದರೆ ಯಾರೂ ನಮ್ಮ ಮನವಿಗೆ ಸ್ಪಂದಿಸುತ್ತಿಲ್ಲ. ಹೀಗಾಗಿ ಈ ಬಾರಿ ಮತದಾನದಲ್ಲಿ ಎಲ್ಲರೂ ಒಗ್ಗಟ್ಟಾಗಿ ನೋಟಾ ಪ್ರಯೋಗಿಸುವ ಚಿಂತನೆಯಲ್ಲಿದ್ದೇವೆ.
 - ರಾಮಚಂದ್ರ ಐತಾಳ,ಸ್ಥಳೀಯ ನಿವಾಸಿ