ಕೆರೆಕಾಡು ಮಕ್ಕಳ ಮೇಳಕ್ಕೆ ದಶಮಾನೋತ್ಸವ ಸಂಭ್ರಮ

Team Udayavani, Apr 27, 2018, 6:00 AM IST

ಮೂಲ್ಕಿಯ ಕೆರೆಕಾಡು ಎಂಬಲ್ಲಿ ಹುಟ್ಟಿದ ಶ್ರೀ ವಿನಾಯಕ ಯಕ್ಷಕಲಾ ಸಂಘ ಈಗ ದಶಮಾನೋತ್ಸವದ ಹೊಸ್ತಿಲಲ್ಲಿದೆ . 2008, ಎ.21ರಲ್ಲಿ ಜಯಂತ ಅಮೀನರ ನೇತೃತ್ವದಲ್ಲಿ ಸ್ಥಾಪನೆಯಾದ ಸಂಘ ಮಕ್ಕಳನ್ನು ಯಕ್ಷಗಾನದತ್ತ ಸೆಳೆಯುವ ಉದ್ದೇಶ ಹೊಂದಿತ್ತು .ಕೆರೆಕಾಡಿನ ಸಾರ್ವಜನಿಕ ಗಣೇಶೋತ್ಸವ ಸಂದರ್ಭದಲ್ಲಿ ಯಕ್ಷಗುರು ಹಾಗೂ ಛಾಂದಸರಾದ ಗಣೇಶ್‌ ಕೊಲೆಕಾಡಿ ರಚಿಸಿದ ವಿಘ್ನೇಶ್ವರ ಮಹಾತ್ಮೆ ಎಂಬ ಪೌರಾಣಿಕ ಪ್ರಸಂಗವನ್ನು ಮಕ್ಕಳು ಪ್ರದರ್ಶಿಸಿದರು.ಪ್ರಥಮ ಪ್ರದರ್ಶನದಲ್ಲೇ ಮೆಚ್ಚುಗೆಗೆ ಪಾತ್ರವಾಗಿ ಮಕ್ಕಳ ಒತ್ತಾಸೆಯಂತೆ ಪೂಪಾಡಿಕಟ್ಟೆಯಲ್ಲಿ ಅಧಿಕೃತವಾಗಿ ಹರಿಕೃಷ್ಣ ಪುನರೂರು ಹಾಗೂ ಭುವನಾಭಿರಾಮ ಉಡುಪರಿಂದ ಉದ್ಘಾಟಿಸಲ್ಪಟ್ಟಿತು. ಗುರು ದಿ| ಸತೀಶ್‌ ಆಚಾರ್ಯರು ಮಕ್ಕಳಿಗೆ ಹೆಜ್ಜೆಗಾರಿಕೆ ಕಲಿಸಿದರು . ಪ್ರಸ್ತುತ ಅಜಿತ್‌ ಅಮೀನರು ನೃತ್ಯಗುರುಗಳಾಗಿಯೂ ,ಮಾಂಬಾಡಿ ಸುಬ್ರಹ್ಮಣ್ಯ ಭಟ್‌ ಹಿಮ್ಮೇಳದ ಗುರುಗಳಾಗಿ ಸೇವೆಗೈಯುತ್ತಿದ್ದಾರೆ.ಪ್ರಸಾದ್‌ ಚೆರ್ಕಾಡಿಯವರು ಪ್ರತಿವರ್ಷ ನಾಟ್ಯ ಶಿಬಿರ ಏರ್ಪಡಿಸಿ ವಿದ್ಯಾರ್ಥಿಗಳ ಗುಣಮಟ್ಟವನ್ನು ವರ್ಧಿಸಲು ನೆರವಾಗುತ್ತಿದ್ದಾರೆ .

ಹತ್ತು ವರ್ಷದಲ್ಲಿ ಸುಮಾರು 50 ಪೌರಾಣಿಕ ಪ್ರಸಂಗಗಳನ್ನು 900 ಸಲ ಪ್ರದರ್ಶಿಸಿದ ದಾಖಲೆ ಈ ಸಂಘದ್ದು .ಕ್ಲಿಷ್ಟ ಪ್ರಸಂಗಗಳಾದ ಶ್ರೀ ದೇವಿ ಮಹಾತ್ಮೆ , ಶಬರಿಮಲೆ ಅಯ್ಯಪ್ಪ , ಶ್ರೀಕೃಷ್ಣ ಲೀಲೆ , ಬಪ್ಪನಾಡು ಕ್ಷೇತ್ರ ಮಹಾತ್ಮೆ , ಕಟೀಲು ಕ್ಷೇತ್ರ ಮಹಾತ್ಮೆ , ಶ್ರೀದೇವಿ ಬನಶಂಕರಿ ,ಶ್ರೀದೇವಿ ಲಲಿತೋಪಖ್ಯಾನ ಮುಂತಾದ ಪ್ರಸಂಗಗಳನ್ನು ಪ್ರದರ್ಶಿಸಿದೆ. 2015,ನ.28ರಂದು ತಂಡದ 100ನೇ ಪ್ರಯೋಗವಾಗಿ ಶ್ರೀದೇವಿ ಮಹಾತ್ಮೆ ಪ್ರದರ್ಶನವನ್ನು ಕಂಬಳಬೆಟ್ಟುವಿನಲ್ಲಿ ಪ್ರಸ್ತುತ ಪಡಿಸಿದ್ದರು . ಅಂದಿನ ಪ್ರದರ್ಶನದಲ್ಲಿ 12 ಮಂದಿ ಭಾಗವತರು ಹಾಗೂ 13 ಮಂದಿ ಹಿಮ್ಮೇಳ ಕಲಾವಿದರು ಭಾಗವಹಿಸಿ ದಾಖಲೆ ನಿರ್ಮಿಸಿದ್ದರು .ಇದೀಗ ಕು| ಕಾವ್ಯಾಶ್ರೀ ನಾಯಕ್‌ ಅಜೇರು ಭಾಗವತಿಕೆಯಲ್ಲೂ , ಶ್ರೀಪತಿ ನಾಯಕ್‌ ಅಜೇರು ಮದ್ದಳೆಯಲ್ಲೂ ,ರಾಮ್‌ ಪ್ರಕಾಶ್‌ ಕಲ್ಲೂರಾಯ ಮಧೂರು ಚೆಂಡೆವಾದನದಲ್ಲೂ ಸಹಕರಿಸುತ್ತಿದ್ದಾರೆ .

ಈ ತಂಡ ಕೇವಲ ಯಕ್ಷಗಾನ ಪ್ರದರ್ಶನಕ್ಕೆ ಮಾತ್ರ ಸೀಮಿತಗೊಂಡಿಲ್ಲ .ಕಲಾವಿದರೆಲ್ಲ ತಮ್ಮ ಮುಖವರ್ಣಿಕೆಯನ್ನು ಸ್ವತಃ ಮಾಡುವ ಕೌಶಲ್ಯ ಹೊಂದಿದ್ದಾರೆ . ವೇಷಭೂಷಣಗಳ ಹೊಲಿಗೆ ಹಾಗೂ ಕುಸುರಿ ಕೆಲಸ ಹಾಗೂ ಪ್ರಸಾಧನ ಪರಿಕರಗಳನ್ನು ಕಲಾವಿದಯರೇ ಸ್ವತಃ ತಯಾರಿಸುವ ಪರಿಣತಿ ಹೊಂದಿದ್ದಾರೆ. ಬೌದ್ಧಿಕ ಮಟ್ಟ ವರ್ಧನೆಗಾಗಿ ಪ್ರತಿ ತಿಂಗಳು ತಾಳಮದ್ದಳೆ ಕೂಟವನ್ನು ನಡೆಸಿ ವಿದ್ಯಾರ್ಥಿಗಳು ಅರ್ಥಧಾರಿಗಳಾಗಿ ಬೆಳೆಯುವ ವಾತಾವರಣ ನಿರ್ಮಿಸಲಾಗಿದೆ . ಹತ್ತು ವರ್ಷದಲ್ಲಿ 225 ಮಂದಿ ವಿದ್ಯಾರ್ಥಿಗಳು ಸಂಘದ ಮೂಲಕ ಯಕ್ಷಗಾನ ಕಲಾವಿದರಾಗಿ ತಯಾರಾಗಿದ್ದಾರೆ . 1 ನೇ ತರಗತಿಯ ವಿದ್ಯಾರ್ಥಿಯಿಂದ ಹಿಡಿದು ಪದವಿ ತನಕದ ವಿದ್ಯಾರ್ಥಿಗಳು ಸಂಘದಲ್ಲಿದ್ದಾರೆ.ಪ್ರಸ್ತುತ ಸಂಘದಲ್ಲಿ 45 ವಿದ್ಯಾರ್ಥಿಗಳಿದ್ದು , ಅದರಲ್ಲಿ 25 ಮಂದಿ ಬಾಲಕಿಯರು. ಕರ್ನಾಟಕ ಸಂಘ ರತ್ನ ಪ್ರಶಸ್ತಿ ,ಡಾ|ಶಿವರಾಮ ಕಾರಂತ ಪ್ರಶಸ್ತಿ ಸಹಿತ ಹಲವಾರು ಪ್ರಶಸ್ತಿಗೆ ಪಾತ್ರವಾಗಿದೆ.  ದಶಮಾನೋತ್ಸವದಂಗವಾಗಿ ಎ.28ರಂದು ನಿರಂತರ 16 ತಾಸು 60 ಕಲಾವಿದರ ಕೂಡುವಿಕೆಯಲ್ಲಿ ಮೂಲ್ಕಿ ಸಮೀಪದ ಎಸ್‌ ಕೋಡಿಯ ಷಣ್ಮುಖ ನಗರದಲ್ಲಿ “ಯಕ್ಷಕೌಮುದಿ – 2018′ ಕಾರ್ಯಕ್ರಮ ಹಮ್ಮಿಕೊಳ್ಳಲಾಗಿದೆ .ಈ ಸಂದರ್ಭದಲ್ಲಿ ಗುರುವಂದನೆ ಹಾಗೂ ಸಾಧಕರಿಗೆ ಯಕ್ಷ ಕೌಮುದಿ ಪ್ರಶಸ್ತಿ , ವಿನಾಯಕ ಯಕ್ಷಕಲಾ ಪ್ರಶಸ್ತಿ ಪ್ರದಾನಿಸಲಾಗುವುದು. 

 ಎಂ. ಶಾಂತರಾಮ ಕುಡ್ವ