ಚುನಾವಣಾ ವೀಕ್ಷಕರಿಂದ ಹಂಪಿ ಸ್ಮಾರಕ ವೀಕ್ಷಣೆ  

Team Udayavani, May 2, 2018, 5:08 PM IST

ಹೊಸಪೇಟೆ: ಮುಂದಿನ ವಿಧಾನಸಭಾ ಚುನಾವಣೆ ಅಂಗವಾಗಿ ಜಿಲ್ಲೆಯ ವಿವಿಧ ಕ್ಷೇತ್ರಗಳ ಅಭ್ಯರ್ಥಿಗಳ ಮೇಲೆ ನಿಗಾ ವಹಿಸಲು ಜಿಲ್ಲೆಗೆ ಆಗಮಿಸಿರುವ ಚುನಾವಣೆ ವೀಕ್ಷಕರು, ಐತಿಹಾಸಿಕ ಹಂಪಿಗೆ ಸೋಮವಾರ ಭೇಟಿ ಪ್ರಸಿದ್ಧ ಸ್ಮಾರಕಗಳನ್ನು ವೀಕ್ಷಣೆ ಮಾಡಿದರು. ವಿವಿಧ ರಾಜ್ಯಗಳಿಂದ ಚುನಾವಣೆ ವೀಕ್ಷಕರು ಹಾಗೂ ಚುನಾವಣೆ ಲೆಕ್ಕ ನಿರೀಕ್ಷಕರಾಗಿ ನಿಯೋಜನೆಯಾಗಿರುವ 10ಕ್ಕೂ ಆಧಿಕ ಐಎಎಸ್‌ ಅಧಿಕಾರಿಗಳ ತಂಡ, ಚುನಾವಣೆ ಕೆಲಸದ ನಡುವೆಯೂ ಹಂಪಿಗೆ ಭೇಟಿ ನೀಡಿದರು.

ಮೊದಲಿಗೆ ಶ್ರೀವಿರೂಪಾಕ್ಷೇಶ್ವರ ಸ್ವಾಮಿ ದರ್ಶನ ಮಾಡಿದ ಅಧಿಕಾರಿಗಳ ತಂಡ, ಹಜಾರ ರಾಮ ದೇವಸ್ಥಾನ, ರಾಣಿಸ್ನಾನ ಗೃಹ, ಉಗ್ರನರಸಿಂಹ, ಕೃಷ್ಣ ದೇವಸ್ಥಾನ, ಸಾಸವಿಕಾಳು ಗಣಪತಿ, ಕಡಲೆಕಾಳು ಗಣಪತಿ, ಬಡವಿಲಿಂಗ, ರಾಣಿಸ್ನಾನ ಗೃಹ, ಮಹಾನವಮಿ ದಿಬ್ಬ, ಕಮಲ ಮಹಲ್‌ ಹಾಗೂ ಗಜಶಾಲೆ ವೀಕ್ಷಣೆ ಬಳಿಕ, ಎದುರು ಬಸವಣ್ಣ ಮಂಟಪದ ಬಳಿ ಹಂಪಿ ಬೈಲೈಟ್‌ ವೀಕ್ಷಣೆ ಮಾಡಿ ಪ್ರಶಂಸೆ ವ್ಯಕ್ತಪಡಿಸಿದರು.

ಸಂಜೆ ಹಂಪಿ ಹೇಮಕೂಟ, ಮಾಲ್ಯವಂತ ರಘುನಾಥಸ್ವಾಮಿ ದೇಗುಲ ಹಾಗೂ ಎದುರು ಬಸವಣ್ಣ ಬಳಿ ಸೂರ್ಯಹಸ್ತವನ್ನು ವೀಕ್ಷಣೆ ಮಾಡಿ ಹಂಪಿಯ ಸೊಬಗು ಕಣ್ತುಂಬಿಕೊಂಡರು. ಐಎಎಸ್‌ ಅಧಿಕಾರಿಗಳಾದ ಎಲ್‌. ಎಸ್‌.ಕೇನ್‌, ಡಾ| ಅಶೋಕ್‌ ಚಂದ್ರ, ಸಂಜಯಗಾಂಧಿ, ನೇಮಿಸಿಂಗ್‌, ಪೋಶೆಟ್ಟಿ, ಜಿತೇಂದ್ರಕುಮಾರ್‌ ಸೇರಿದಂತೆ ಇತರೆ ಅಧಿಕಾರಿಗಳು ಇದ್ದರು.