ಒಳನಾಡಿನಲ್ಲಿ ಸಂಯುಕ್ತಾ

Team Udayavani, May 6, 2018, 6:00 AM IST

ಸಂಯುಕ್ತಾ ಹೊರನಾಡು ಇತ್ತೀಚಿನ ದಿನಗಳಲ್ಲಿ ಸಖತ್‌ ಸುದ್ದಿಯಲ್ಲಿದ್ದಾರೆ ಎಂದರೆ ತಪ್ಪಿಲ್ಲ. ಪ್ರಮುಖವಾಗಿ ಅವರು ಕಳೆದ ಕೆಲವು ತಿಂಗಳಲ್ಲಿ ಒಂದರ ಹಿಂದೊಂದು ಚಿತ್ರಗಳಲ್ಲಿ ಸತತವಾಗಿ ನಟಿಸುತ್ತಲೇ ಇದೆ. ಅದೆಲ್ಲದರ ಪರಿಣಾಮ, ಸಂಯುಕ್ತಾ ಅಭಿನಯದ ನಾಲ್ಕು ಚಿತ್ರಗಳು ಈ ವರ್ಷ ತೆರೆಗೆ ಬರಲಿವೆ. ಆ ಪೈಕಿ ಕನ್ನಡದ ಅರಿಷಡ್ವರ್ಗ, ಎಂಎಂಸಿಎಚ್‌ ಮತ್ತು ತೆಲುಗಿನ ರಾಣಾ ಸಿನಿಮಾಸ್‌ನಲ್ಲಿ ತಯಾರಾಗಿರುವ ಚಿತ್ರದ ಜೊತೆಗೆ ತಮಿಳಿನ ಚಿತ್ರವೊಂದು ಇದೇ ವರ್ಷ ಬಿಡುಗಡೆಯಾ ಗಲಿದೆ.

ಇದಲ್ಲದೆ ಸಂಯುಕ್ತಾ ಎರಡು ಹೊಸ ಚಿತ್ರಗಳನ್ನು ಒಪ್ಪಿಕೊಂಡಿದ್ದಾರೆ. ಇನ್ನೂ ಹೆಸರಿಡದ ಚಿತ್ರದಲ್ಲಿ ಮೊದಲ ಬಾರಿಗೆ ನೆಗೆಟಿವ್‌ ಶೇಡ್‌ ಇರುವ ಪಾತ್ರದಲ್ಲಿ ನಟಿಸುತ್ತಿದ್ದಾರೆ. ಅದಕ್ಕೆ ಕಳೆದ ತಿಂಗಳಷ್ಟೇ ಮುಹೂರ್ತವಾಗಿದೆ. ಇದಲ್ಲದೆ, ನಮ್ಮ ಯುಎಫ್ಓ ಎಂಬ ಹೊಸ ಚಿತ್ರದಲ್ಲೂ ಅವರು ನಟಿಸುತ್ತಿದ್ದಾರೆ. ಈ ಚಿತ್ರದಲ್ಲಿ ಸಂಯುಕ್ತಾ, ಮೊದಲ ಬಾರಿಗೆ ಪೊಲೀಸ್‌ ಆಗಿ ಕಾಣಿಸಿಕೊಳ್ಳುತ್ತಿದ್ದಾರೆ. ಅಲ್ಲಿಗೆ ಎರಡು ಚಿತ್ರಗಳಲ್ಲಿ ಎರಡು ವಿಭಿನ್ನ ಪಾತ್ರಗಳನ್ನು ನಿರ್ವಹಿಸುವ ಜವಾಬ್ದಾರಿ ಸಂಯುಕ್ತಾ ಹೆಗಲ ಮೇಲೆ ಬಿದ್ದಿದೆ ಮತ್ತು ಇದಕ್ಕಾಗಿ ಸಂಯುಕ್ತಾ ತಮ್ಮದೇ ರೀತಿಯಲ್ಲಿ ತಯಾರಿ ನಡೆಸುತ್ತಿದ್ದಾರೆ.

ಇದೆಲ್ಲದರ ಜೊತೆಗೆ ಸಂಯುಕ್ತಾ ಇತ್ತೀಚೆಗೆ ಸುದ್ದಿಯಾಗಿದ್ದು, ತಮ್ಮ ಹೊಸ ಫೋಟೋ ಶೂಟ್‌ನಿಂದಾಗಿ. ಸಾಮಾನ್ಯವಾಗಿ ಸಿನೆಮಾ ನಟಿಯರು ತಾವು ನಟಿಸುವ ಚಿತ್ರಗಳಿಗೆ ಫೋಟೋಶೂಟ್‌ ಮಾಡಿಸುವುದು ವಾಡಿಕೆ ಅಥವಾ ತೂಕ ಹೆಚ್ಚಿಸಿಕೊಂಡಾಗ, ಇಲ್ಲ ಇಳಿಸಿಕೊಂಡಾಗ ಫೋಟೋಶೂಟ್‌ ಮಾಡಿಸಿ ತಮ್ಮ ಸೌಂದರ್ಯವನ್ನು ತೋರಿಸುವುದು ವಾಡಿಕೆ. ಆದರೆ, ನಟಿ ಸಂಯುಕ್ತಾ ಹೊರನಾಡು ಕೊಂಚ ಭಿನ್ನ ಎನ್ನಬಹುದು. ಸಂಯುಕ್ತಾ ಫೋಟೋ ಶೂಟ್‌ ಮಾಡಿಸಿರುವುದು ಯಾವುದೇ ಸಿನಿಮಾಗಲ್ಲ. ಅದು ಪರಿಸರ ಜಾಗೃತಿಗಾಗಿ ಎಂದರೆ ಆಶ್ಚರ್ಯವಾಗಬಹುದು. ಸಂಯುಕ್ತಾ ಪ್ರತಿ ವರ್ಷ ಕೂಡ “ವಿಶ್ವ ಭೂಮಿ’ ತಿಂಗಳನ್ನು ತಮ್ಮದೇ ಶೈಲಿಯಲ್ಲಿ ಆಚರಿಸುತ್ತ ಬಂದಿದ್ದಾರೆ. ಹಾಗೆಯೇ ಈ ವರ್ಷವೂ ಜಾಗೃತಿ ಮೂಡಿಸುವ ಸಲುವಾಗಿ ಫೋಟೋ ಶೂಟ್‌ ಮಾಡಿಸಿ, ವಿಶೇಷ ಬಗೆಯಲ್ಲಿ ಆಚರಿಸಿದ್ದಾರೆ. ಈ ಪರಿಕಲ್ಪನೆಯಂತೆ ಅಂದವಾದ ಫೋಟೋಗಳನ್ನು ತೆಗೆದಿದ್ದು ಛಾಯಾಗ್ರಾಹಕ ಬಿಂದ್ಯಾ ಕಣ್ಣಪ್ಪ. ಆ ಪರಿಕಲ್ಪನೆಗೆ ತಕ್ಕಂತೆ ವಸ್ತ್ರವಿನ್ಯಾಸ ಮಾಡಿದ್ದು ಸುಚೇತಾ. ಈ ಫೋಟೋ ಶೂಟ್‌ನಲ್ಲಿ ಹೆಣ್ಣನ್ನು ಭೂಮಿಗೆ ಹೋಲಿಕೆ ಮಾಡಲಾಗಿದೆ. ಈ ಫೋಟೋ ಶೂಟ್‌ಗಾಗಿ ಅವರು ವಿಭಿನ್ನ ಬಣ್ಣದ ಕಾಸ್ಟೂéಮ್‌ಗಳನ್ನು ತೊಟ್ಟಿದ್ದು, ಒಂದೊಂದು ಬಣ್ಣವೂ ಒಂದೊಂದು ವಿಷಯವನ್ನು ಪ್ರತಿನಿಧಿಸುತ್ತದೆ. ಉದಾಹರಣೆಗೆ, ಕೆಂಪು ಬಣ್ಣದ ಬಟ್ಟೆಯು, ಹೆಣ್ಣು ಬೆಂಕಿ ಇದ್ದಂತೆ ಎಂದು ಹೇಳುತ್ತದೆ. ತಿಳಿನೀಲಿ ಬಣ್ಣದ ಬಟ್ಟೆ ಧರಿಸಿ ತೆಗೆಸಿಕೊಂಡ ಫೋಟೋ, ನೀರಿನ ಪ್ರಾಮುಖ್ಯತೆ ಬಿಂಬಿಸುತ್ತದೆ. ಹೆಣ್ಣುಮಕ್ಕಳನ್ನು ಭೂಮಿಗೆ ಹೋಲಿಕೆ ಮಾಡಿ, ಅದೇ ರೀತಿಯ ಪರಿಕಲ್ಪನೆಯಲ್ಲಿ ಸುತ್ತಲೂ ಹಸಿರು ಇರುವ ವಾತಾವರಣದಲ್ಲೊಂದು ಫೋಟೋ ತೆಗೆಸಿದ್ದಾರೆ. ಒಟ್ಟಾರೆ ಬೆಂಕಿ, ನೀರು, ಭೂಮಿ ಹಾಗೂ ಗಾಳಿಯನ್ನು ಪ್ರಮುಖವಾಗಿಟ್ಟುಕ್ಕೊಂಡು, ಅದಕ್ಕೆ ಹೊಂದುವ ಬಣ್ಣದ ಬಟ್ಟೆ ತೊಟ್ಟು ಫೋಟೋ ಶೂಟ್‌ ಮಾಡಿಸಿದ್ದಾರೆ.